ಕೊಲಂಬೊ(ಶ್ರೀಲಂಕಾ): ಆರ್.ಪ್ರೇಮದಾಸ್ ಮೈದಾನದಲ್ಲಿ ನಡೆದ ಎರಡನೇ ಟಿ-20 ಪಂದ್ಯದಲ್ಲೂ ಗೆಲುವಿನ ನಗೆ ಬೀರಿರುವ ಪ್ರವಾಸಿ ಆಸ್ಟ್ರೇಲಿಯಾ ಒಂದು ಪಂದ್ಯ ಬಾಕಿ ಇರುವಾಗಲೇ ಟಿ-20 ಸರಣಿ ವಶ ಮಾಡಿಕೊಂಡಿದೆ. ತವರಿನಲ್ಲೇ ನಡೆದ ಪಂದ್ಯದ ಲಾಭ ಪಡೆದುಕೊಳ್ಳುವಲ್ಲಿ ವಿಫಲವಾದ ಶ್ರೀಲಂಕಾ ತಂಡ ಸೋತು ಮುಖಭಂಗಕ್ಕೊಳಗಾಗಿದೆ.
ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಶ್ರೀಲಂಕಾ ತಂಡ ನಿಗದಿತ 20 ಓವರ್ಗಳಲ್ಲಿ 9 ವಿಕೆಟ್ನಷ್ಟಕ್ಕೆ ಕೇವಲ 124 ರನ್ಗಳಿಕೆ ಮಾಡಿತು. ತಂಡದ ಪರ ಮಧ್ಯಮ ಕ್ರಮಾಂಕದಲ್ಲಿ ಅಸಲಂಕಾ(39), ಕುಶಾಲ್ ಮೆಂಡಿಸ್(36) ರನ್ಗಳಿಕೆ ಮಾಡಿದರು. ಆಸ್ಟ್ರೇಲಿಯಾ ಪರ ಕೇನ್ ರಿಚರ್ಡ್ಸನ್ 4 ವಿಕೆಟ್, ಜಾಯ್ ರಿಚರ್ಡ್ಸನ್ 3 ವಿಕೆಟ್ ಪಡೆದರೆ, ಮ್ಯಾಕ್ಸವೆಲ್ 2 ವಿಕೆಟ್ ಕಿತ್ತರು.
ಇದನ್ನೂ ಓದಿ: ವೆಸ್ಟ್ ಇಂಡೀಸ್ ವಿರುದ್ಧ ಶತಕ ಸಿಡಿಸಿ ಅಬ್ಬರ, ಕಿಂಗ್ ಕೊಹ್ಲಿ ದಾಖಲೆ ಮುರಿದ ಬಾಬರ್ ಆಜಂ
125 ರನ್ಗಳ ಗುರಿ ಬೆನ್ನಟ್ಟಿದ ಆಸ್ಟ್ರೇಲಿಯಾ ಮತ್ತೊಮ್ಮೆ ಉತ್ತಮ ಆರಂಭ ಪಡೆದುಕೊಂಡಿತು. ಕಣಕ್ಕಿಳಿದ ವಾರ್ನರ್-ಫಿಂಚ್ ಜೋಡಿ ತಂಡಕ್ಕೆ 33ರನ್ಗಳ ಜೊತೆಯಾಟವಾಡಿದರು. ಈ ವೇಳೆ, 24ರನ್ಗಳಿಸಿದ್ದ ಫಿಂಚ್ ವಿಕೆಟ್ ಒಪ್ಪಿಸಿದರು.
ಆದರೆ, ಇದಾದ ಬಳಿಕ ಬಂದ ಮಾರ್ಷ್ (11), ಸ್ಮಿತ್(5) ಸ್ಟೋಯ್ನಿಸ್(9) ವಿಕೆಟ್ ಒಪ್ಪಿಸಿ, ತಂಡಕ್ಕೆ ಆತಂಕ ಮೂಡಿಸಿದ್ದರು. ಆದರೆ, ಮ್ಯಾಕ್ಸವೆಲ್ ಹಾಗೂ ಮ್ಯಾಥ್ಯೂ ವೇಡ್(26)ರನ್ಗಳಿಕೆ ಮಾಡಿ ತಂಡವನ್ನ ಗೆಲುವಿನ ದಡ ಸೇರಿಸಿದರು. ಹೀಗಾಗಿ, ತಂಡ 17.5 ಓವರ್ಗಳಲ್ಲಿ 7 ವಿಕೆಟ್ನಷ್ಟಕ್ಕೆ 126ರನ್ಗಳಿಸಿ, ಗೆಲುವು ಸಾಧಿಸಿತು.
ಶ್ರೀಲಂಕಾ ತಂಡದ ಪರ ವನಿಂದು ಹಸರಂಗ ನಾಲ್ಕು ವಿಕೆಟ್ ಪಡೆದುಕೊಂಡು ಮಾರಕವಾದ್ರೂ, ಪ್ರಯೋಜನವಾಗಲಿಲ್ಲ. ಹಿಂದತೆ ತುಸ್ಸಾರ್, ಚಮೀರ್ ತಲಾ 1 ವಿಕೆಟ್ ಪಡೆದುಕೊಂಡರು. ಶ್ರೀಲಂಕಾ ವಿರುದ್ಧ ನಡೆದ ಮೊದಲ ಟಿ-20 ಪಂದ್ಯದಲ್ಲಿ ಪ್ರವಾಸಿ ಆಸ್ಟ್ರೇಲಿಯಾ 10 ವಿಕೆಟ್ಗಳ ಭರ್ಜರಿ ಗೆಲುವು ದಾಖಲು ಮಾಡಿತ್ತು.
