ಕೊಲಂಬೋ (ಶ್ರೀಲಂಕಾ): ಏಷ್ಯಾ ಕಪ್ ಟೂರ್ನಿಯ ಫೈನಲ್ಗೆ ಶ್ರೀಲಂಕಾ ತಂಡ ಲಗ್ಗೆ ಇಟ್ಟಿದೆ. ಗುರುವಾರ ನಡೆದ ಸೂಪರ್ 4 ಪಂದ್ಯದಲ್ಲಿ ಪಾಕಿಸ್ತಾನ ವಿರುದ್ಧ ರೋಚಕ ಗೆಲುವು ದಾಖಲಿಸಿದೆ. ಫೈನಲ್ ಪಂದ್ಯದಲ್ಲಿ ಟ್ರೋಫಿಗಾಗಿ ಭಾರತದ ಎದುರು ಲಂಕಾ ಸೆಣಸಲಿದೆ.
ಸೆಮಿಫೈನಲ್ ಎಂದೇ ಬಿಂಬಿತವಾಗಿದ್ದ ಪಾಕಿಸ್ತಾನ ಹಾಗೂ ಶ್ರೀಲಂಕಾ ನಡುವಿನ ಐದನೇ ಸೂಪರ್ 4 ಪಂದ್ಯಕ್ಕೆ ಆರಂಭದಲ್ಲೇ ಮಳೆ ಅಡ್ಡಿ ಪಡಿಸಿತ್ತು. ಇದರಿಂದ ಪಂದ್ಯ ಆರಂಭ ವಿಳಂಬವಾಗಿ 42 ಓವರ್ಗಳಿಗೆ ಸೀಮಿತಗೊಳಿಸಲಾಗಿತ್ತು. ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಪಾಕಿಸ್ತಾನ ತಂಡ ಏಳು ವಿಕೆಟ್ ನಷ್ಟಕ್ಕೆ 252 ರನ್ ಪೇರಿಸಿತ್ತು. ಈ ಸವಾಲಿನ ಗುರಿ ಬೆನ್ನಟ್ಟಿದ ಶ್ರೀಲಂಕಾ ತಂಡ ಎಂಟು ವಿಕೆಟ್ ಕಳೆದುಕೊಂಡು ಕೊನೆಯ ಎಸೆತದಲ್ಲಿ ಗೆಲುವಿನ ನಗೆ ಬೀರಿತು.
ಲಂಕಾ ಇನ್ನಿಂಗ್ಸ್ ಆರಂಭಿಸಿದ ಪತುಮ್ ನಿಸ್ಸಂಕಾ ಮತ್ತು ಕುಸಲ್ ಪೆರೇರಾ ತಂಡಕ್ಕೆ ಅಷ್ಟೇನು ಉತ್ತಮ ಆರಂಭ ಒದಗಿಸಲಿಲ್ಲ. ಇಬ್ಬರೂ ಆರಂಭಿಕರು ಬಹಳ ಬೇಗನೆ ಔಟಾದರು. ಬಿರುಸಿನ ಬ್ಯಾಟ್ ಬೀಸಿದ ಪೆರೇರಾ 8 ಎಸೆತಗಳಲ್ಲಿ 4 ಬೌಂಡರಿಯೊಂದಿಗೆ 17 ಗಳಿಸಿ ಶಾದಾಬ್ ಖಾನ್ ರನೌಟ್ ಬಲೆಗೆ ಸಿಲುಕಿದರು. ನಿಧಾನಗತಿ ಬ್ಯಾಟ್ ಮಾಡಿದ ನಿಸ್ಸಂಕಾ 44 ಬಾಲ್ಗಳಲ್ಲಿ 29 ರನ್ಗೆ ಶಾದಾಬ್ ಖಾನ್ ಬೌಲಿಂಗ್ನಲ್ಲಿ ವಿಕೆಟ್ ಒಪ್ಪಿಸಿದರು.
ನಂತರ ಲಂಕಾ ತಂಡವನ್ನು ಮಧ್ಯಮ ಕ್ರಮಾಂಕದಲ್ಲಿ ಸದೀರ ಸಮರವಿಕ್ರಮ ಹಾಗೂ ಕುಸಾಲ್ ಮೆಂಡಿಸ್ ಉತ್ತಮವಾಗಿ ಮುನ್ನಡೆಸಿದರು. ಇವರಿಬ್ಬರು ಮೂರನೇ ವಿಕೆಟ್‌ಗೆ 100 ರನ್ಗಳ ಜೊತೆಯಾಟ ನೀಡಿದರು. ಆದರೆ, ಸಮರವಿಕ್ರಮ ತಮ್ಮ ಅರ್ಧಶತಕದ ಹೊಸ್ತಿಲಿನಲ್ಲಿ ಎಡವಿದರು. ಇಫ್ತಿಕರ್ ಅಹ್ಮದ್ ಅವರು 48 ರನ್ಗಳಲ್ಲಿ ಆಡುತ್ತಿದ್ದ ಸಮರವಿಕ್ರಮ ವಿಕೆಟ್ ಪಡೆಯುವ ಮೂಲಕ ಈ ಜೋಡಿಯನ್ನು ಬೇರ್ಪಡಿಸಿದರು.
ಮತ್ತೊಂದೆಡೆ, ತಮ್ಮ ಬ್ಯಾಟ್ ಮುಂದುವರೆಸಿದ ಕುಸಾಲ್ ಮೆಂಡಿಸ್ ಅವರೊಂದಿಗೆ ಚರಿತ ಅಸಲಂಕಾ ಬ್ಯಾಟಿಂಗ್ಗೆ ಸೇರಿಕೊಂಡರು. ಆದರೆ, ಇದರ ನಡುವೆ 91 ರನ್ ಗಳಿಸಿದ್ದ ಮೆಂಡಿಸ್ ಅವರನ್ನೂ ಇಫ್ತಿಕರ್ ಅಹ್ಮದ್ ಪೆವಿಲಿಯನ್ಗೆ ಸೇರಿಸಿದರು. ಇದರ ಬೆನ್ನಲ್ಲೇ ದಸುಕ ಶನಕಾ (2) ಅವರನ್ನೂ ಇಫ್ತಿಕರ್ ಔಟ್ ಮಾಡಿದರು. ಇದರಿಂದ ಪಾಕಿಸ್ತಾನ ಪಂದ್ಯದಲ್ಲಿ ಮೇಲೆ ಹಿಡಿತ ಸಾಧಿಸುವ ಲಕ್ಷಣ ತೋರಿಸಿತು.
ಮತ್ತೊಂದೆಡೆ, ತಮ್ಮ ತಂಡದ ವಿಕೆಟ್ ಬೀಳುತ್ತಿದ್ದರೂ ಚರಿತ ಅಸಲಂಕಾ ಧೃತಿಗೇಡದ ತಂಡವನ್ನು ಕೊನೆಯವರೆಗೂ ಮುನ್ನಡೆಸಿದರು. ಅಂತಿಮ ಎರಡು ಎಸತೆಗಳಲ್ಲಿ ಗೆಲುವಿಗೆ ಆರು ರನ್ಗಳ ಅಗತ್ಯವಿತ್ತು. ಆಗ ಅಸಲಂಕಾ ಬೌಂಡರಿ ಹಾಗೂ ಎರಡು ರನ್ ಸಿಡಿಸಿ ತಂಡವನ್ನು ಗೆಲ್ಲಿಸಿ ಫೈನಲ್ಗೇರಿಸಿದರು. ಅಲ್ಲದೇ, ಅಜೇಯ ಆಟವಾಡಿದ ಅವರು 49 ರನ್ ಬಾರಿಸಿ ಮಿಂಚಿದರು.
