ಬಹಳ ದಿನಗಳಿಂದ ಕಿರುತೆರೆಪ್ರಿಯರು ಕಾತರದಿಂದ ಕಾಯುತ್ತಿದ್ದ ಬಿಗ್ಬಾಸ್ ಸೀಸನ್ 8 ಕ್ಕೆ ಅದ್ಧೂರಿ ಓಪನಿಂಗ್ ದೊರೆತಿದೆ. 17 ಮಂದಿ ಸ್ಪರ್ಧಿಗಳು ಈ ಬಾರಿ ದೊಡ್ಮನೆಯೊಳಗೆ ಎಂಟ್ರಿ ನೀಡಿದ್ದಾರೆ. ಸ್ಪರ್ಧಿಗಳು ದೊಡ್ಮನೆಯೊಳಗೆ ಕಾಲಿಡುತ್ತಿದ್ದಂತೆ ಇತ್ತ ಸುದೀಪ್ ಕೂಡಾ ಬಿಡದಿ ಬಳಿ ಇರುವ ಇನ್ನೋವೇಟಿವ್ ಸಿಟಿಯಲ್ಲಿ ತಮಗಾಗಿ ನಿರ್ಮಿಸಿರುವ ಹೊಸ ಮನೆಗೆ ಬಂದು ಸೇರಿದ್ದಾರೆ.
ಇದನ್ನೂ ಓದಿ: ಮೊದಲ ಬಾರಿಗೆ ಕಂಠದಾನ ಮಾಡಿದ ಖುಷಿಯಲ್ಲಿರುವ ರಾಧಾ ಮಿಸ್
ಪ್ರತಿ ಶನಿವಾರ ಹಾಗೂ ಭಾನುವಾರ ಸುದೀಪ್ ಉಳಿದುಕೊಳ್ಳುವ ಸಲುವಾಗಿ ದೊಡ್ಮನೆ ಸಮೀಪದಲ್ಲೇ ಸುದೀಪ್ಗಾಗಿ ಮನೆಯೊಂದನ್ನು ವಿಶೇಷವಾಗಿ ನಿರ್ಮಾಣ ಮಾಡಲಾಗಿದೆ. ಈ ಮನೆಗೆ 'ಕಿಚ್ಚನ್ ಹೌಸ್' ಎಂದೇ ಹೆಸರಿಡಲಾಗಿದೆ. ಹೊಸ ಮನೆಗೆ ಎಂಟ್ರಿ ನೀಡುತ್ತಿದ್ದಂತೆ ಸುದೀಪ್, ದೇವರಿಗೆ ಪೂಜೆ ಸಲ್ಲಿಸುವ ಮೂಲಕ ಮನೆಯನ್ನು ಉದ್ಘಾಟನೆ ಮಾಡಿದ್ದಾರೆ. ದೊಡ್ಮನೆಗೆ ಎಂಟ್ರಿ ನೀಡಿರುವ 17 ಸ್ಪರ್ಧಿಗಳು ಟಾಸ್ಕ್ನಲ್ಲಿ ಏನೆಲ್ಲಾ ಆಟ ಆಡಿದ್ದಾರೆ..? ಅವರ ಆಸಕ್ತಿ ಹೇಗಿದೆ..?ಎಂಬ ವಿಚಾರವನ್ನು ಚರ್ಚೆ ಮಾಡಲು ಈ ಕಿಚ್ಚನ ಮನೆಯನ್ನು ನಿರ್ಮಿಸಲಾಗಿದೆ. ಸುದೀಪ್ಗಾಗಿ ಐಷಾರಾಮಿ ಜಿಮ್, ಕಿಚನ್, ಮೇಕಪ್ ರೂಮ್, ವಿಶ್ರಾಂತಿ ಪಡೆಯಲು ಒಂದು ಕೋಣೆಯನ್ನು ಈ ಮನೆ ಒಳಗೊಂಡಿದೆ. ಬಿಗ್ ಬಾಸ್ ಮನೆಯಷ್ಟು ದೊಡ್ಡದಾಗಿಲ್ಲದಿದ್ದರೂ ಆ ಮನೆಯಷ್ಟೇ ನೋಡಲು ಸುಂದರವಾಗಿರುವುದು ಈ ಕಿಚ್ಚನ ಹೌಸ್ ವಿಶೇಷ.
