ಕಿರುತೆರೆಯ ನಟಿಯರು ತಮ್ಮ ಪ್ರತಿಭೆಯಿಂದ ಸಿನಿಮಾಗಳಲ್ಲಿ ಅವಕಾಶ ಪಡೆದಿರುವ ಎಷ್ಟೋ ಉದಾಹರಣೆಗಳಿವೆ. ಇದೀಗ ಮತ್ತೊಬ್ಬ ಕಿರುತೆರೆ ನಟಿ ಮೋನಿಕಾ ಕೂಡಾ ತಮ್ಮ ಅಭಿನಯದಿಂದ ಸ್ಯಾಂಡಲ್ವುಡ್ನಲ್ಲಿ ಸಾಲು ಸಾಲು ಅವಕಾಶ ಗಳಿಸುತ್ತಿದ್ದಾರೆ.
ಬೆಂಗಳೂರಿನಲ್ಲೇ ಹುಟ್ಟಿ, ಬೆಳೆದ ಅಪ್ಪಟ ಕನ್ನಡತಿ ಈ ಮೋನಿಕಾ. ಕಂಪನಿಯೊಂದರಲ್ಲಿ ಸುಮಾರು 3 ವರ್ಷಗಳ ಕಾಲ ಮೋನಿಕಾ ಹೆಚ್ಆರ್ ಆಗಿ ಕಾರ್ಯನಿರ್ವಹಿಸಿದ್ದಾರೆ. ಗ್ಲಾಮರ್ ಲೋಕಕ್ಕೆ ಕಾಲಿಟ್ಟಿದ್ದು ಆಕಸ್ಮಿಕ ಎನ್ನುತ್ತಾರೆ ಮೋನಿಕಾ. ಉಪೇಂದ್ರ ಅವರ 'ಐ ಲವ್ ಯು' ಸಿನಿಮಾ ಮೂಲಕ ಕಿರುತೆರೆಯಿಂದ ಬೆಳ್ಳಿ ತೆರೆಗೂ ಕಾಲಿಟ್ಟಿದ್ದಾರೆ. 'ಪದ್ಮಾವತಿ' ಧಾರಾವಾಹಿಯಲ್ಲೂ ಮೋನಿಕಾ ಗೆಸ್ಟ್ ರೋಲ್ನಲ್ಲಿ ಕಾಣಿಸಿಕೊಂಡಿದ್ದರು. ಶೂಟಿಂಗ್ ಸೆಟ್ನಲ್ಲಿ ಬಿಂದಾಸ್, ರಿಯಲ್ ಲೈಫ್ನಲ್ಲಿ ಬಹಳ ಸೈಲೆಂಟ್ ಆಗಿರುವ ಈ ನಟಿ ಬಿಡುವಿನ ವೇಳೆಯಲ್ಲಿ ಹೊಸ ಹೊಸ ರುಚಿ ಟ್ರೈ ಮಾಡುತ್ತಾರಂತೆ. ಬಿರ್ಯಾನಿ ಇವರಿಗೆ ಬಹಳ ಇಷ್ಟವಾದ ಫುಡ್ ಅಂತೆ.
ಇದೆಲ್ಲದರ ಜೊತೆ ಸ್ವಲ್ಪ ಬಿಡುವು ದೊರೆತರೆ ಶಾಪಿಂಗ್ ಹೋಗುತ್ತಾರೆ ಈ ಮಾದಕ ಚೆಲುವೆ. 'ಐ ಲವ್ ಯು' ಚಿತ್ರದ ಜೊತೆ 'ಕೆಫೆ ಗ್ಯಾರೇಜ್', 'ಕನಸು ಕಂಡ ಮನಸು', 'ರವಿಚಂದ್ರ' ಸಿನಿಮಾಗಳಲ್ಲಿ ಕೂಡಾ ನಟಿಸಿರುವ ಮೋನಿಕಾಗೆ ಇದೀಗ ಒಂದರ ಮೇಲೊಂದು ಅವಕಾಶಗಳು ಒಲಿದು ಬರುತ್ತಿದೆಯಂತೆ. ಪೌರಾಣಿಕ ಪಾತ್ರಗಳಲ್ಲಿ ನಟಿಸುವುದು ಇವರ ಕನಸಂತೆ. ಸ್ವಿಡ್ಜರ್ಲೆಂಡ್ ಬಹಳ ಇಷ್ಟವಾದ ಸ್ಥಳ. ಆದ್ರೂ ಎಲ್ಲೇ ಹೋದ್ರೂ ನಮ್ಮ ಬೆಂಗಳೂರಿಗಿಂತ ಚೆಂದ ಯಾವುದೂ ಇಲ್ಲ ಅಂತಾರೆ. ಈ ಬೆಡಗಿಗೆ ಕನ್ನಡ ಚಿತ್ರರಂಗದಲ್ಲೇ ನೆಲೆಯೂರುವ ಆಸೆಯಂತೆ.
