ಕೊರೊನಾ ಭೀತಿ ನಡುವೆಯೂ ಕ್ರೀಡಾಪ್ರಿಯರು ಐಪಿಎಲ್ ಪಂದ್ಯಾವಳಿಯನ್ನು ಎಂಜಾಯ್ ಮಾಡುತ್ತಿದ್ದಾರೆ. ಇಂದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡ ಡೆಲ್ಲಿ ಕ್ಯಾಪಿಟಲ್ಸ್ ತಂಡವನ್ನು ಎದುರಿಸಲಿದೆ. 3 ಪಂದ್ಯಗಳಲ್ಲಿ ಗೆಲುವು ಸಾಧಿಸಿರುವ ಆರ್ಸಿಬಿ ತಂಡಕ್ಕೆ ಗಾಯಕಿ ಐಶ್ವರ್ಯ ರಂಗರಾಜನ್ ವಿಭಿನ್ನವಾಗಿ ಶುಭ ಕೋರಿದ್ದಾರೆ.
ಗೆಲುವಿನ ಹಾದಿಯಲ್ಲಿರುವ ಆರ್ಸಿಬಿ ತಂಡಕ್ಕೆ ರೀಮಿಕ್ಸ್ ಹಾಡಿನ ಮೂಲಕ ಐಶ್ವರ್ಯ ಶುಭ ಕೋರಿದ್ದಾರೆ. 'ಸೋಲೇ ಇಲ್ಲ ನಿನ್ನ ಹಾಡು ಹಾಡುವಾಗ' ಹಾಡಿನ ಮ್ಯೂಸಿಕ್ ಬಳಸಿ ಆ ಹಾಡಿಗೆ ಬೇರೆ ಸಾಹಿತ್ಯ ಬಳಸುವ ಮೂಲಕ ಆರ್ಸಿಬಿ ತಂಡಕ್ಕೆ ಶುಭ ಕೋರಿದ್ದಾರೆ. ಐಶ್ವರ್ಯ ಅವರ ಅಣ್ಣ ಶ್ರೀನಿಧಿ ರಂಗರಾಜನ್ ಈ ಹಾಡಿನ ಸಾಹಿತ್ಯ ಬರೆದಿದ್ದಾರೆ. ಅಣ್ಣ,ತಂಗಿ ಇಬ್ಬರೂ ಈ ಹಾಡನ್ನು ಹಾಡಿದ್ದಾರೆ. ''ಸೋಲೇ ಇಲ್ಲಾ ನಮ್ಮ ಬಾಸ್ ಫಾರ್ಮ್ನಲ್ಲಿ ಇರುವಾಗ ಗೆಲುವೇ ಎಲ್ಲಾ ಆರ್ಸಿಬಿ ಫ್ಯಾನ್ಸ್ ಇರುವಾಗ ಕಪ್ ನಮ್ದೆ...'' ಎಂಬ ಹಾಡು ಆರ್ಸಿಬಿ ಅಭಿಮಾನಿಗಳನ್ನು ರಂಜಿಸಿದೆ. ಐಶ್ವರ್ಯ ಹಾಗೂ ಅವರ ಅಣ್ಣನಿಗೆ ಕ್ರಿಕೆಟ್ ಬಗ್ಗೆ ಮೊದಲಿನಿಂದಲೂ ಆಸಕ್ತಿ. ಬೆಂಗಳೂರಿನಲ್ಲಿ ಯಾವುದೇ ಪಂದ್ಯ ನಡೆದರೂ ಅಣ್ಣ ತಂಗಿ ಅಲ್ಲಿ ಹಾಜರಿರುತ್ತಾರೆ. ಈಗ ದುಬೈನಲ್ಲಿ ನಡೆಯುತ್ತಿರುವ ಪಂದ್ಯದಲ್ಲಿ ಆರ್ಸಿಬಿ ತಂಡಕ್ಕೆ ಇವರಿಬ್ಬರೂ ಬೆಂಬಲ ನೀಡಿದ್ದಾರೆ.
