ಭೂಮಿ ಶೆಟ್ಟಿ ತೆಲುಗು ಧಾರಾವಾಹಿಯಲ್ಲಿ ನಟಿಸುತ್ತಿರುವ ಕಾರಣದಿಂದ ಮಜಾಭಾರತದಿಂದ ಹೊರಬಂದಿದ್ದಾರೆ ಎಂಬುದು ಈಗಾಗಲೇ ತಿಳಿದ ವಿಚಾರ. ಇದೀಗ ಅವರ ಜಾಗಕ್ಕೆ ಆರ್ಜೆ ಹಾಗೂ ನಟಿ ಸಿಂಧು ಶ್ರೀಕಾಂತ್ ಎಂಟ್ರಿ ಕೊಟ್ಟಿದ್ದಾರೆ. ಈಗಾಗಲೇ ಮಜಾಭಾರತದ ಶೂಟಿಂಗ್ನಲ್ಲಿ ಸಿಂಧು ಭಾಗವಹಿಸಿದ್ದು ಇದೇ ಜನವರಿ 30 ರಿಂದ ಅವರು ತೆರೆಯ ಮೇಲೆ ಕಾಣಿಸಿಕೊಳ್ಳಲಿದ್ದಾರೆ.
ಸಿಂಧು ಮಜಾಭಾರತ ಶೋ ಮೂಲಕ ಮೊದಲ ಬಾರಿಗೆ ನಿರೂಪಕಿ ಆಗುತ್ತಿದ್ದಾರೆ. "ಈ ಜನಪ್ರಿಯ ಶೋ ನಿರೂಪಕಿಯಾಗಿ ಆಯ್ಕೆಯಾಗಿದ್ದಕ್ಕೆ ಖುಷಿಯಾಗಿದೆ. ನಾನು ದಂತವೈದ್ಯೆಯಾಗಿದ್ದರೂ ನನಗೆ ಮನರಂಜನಾ ಕ್ಷೇತ್ರದಲ್ಲಿ ಬಹಳ ಆಸಕ್ತಿ ಇದೆ. ಈ ಕಾರಣದಿಂದಲೇ ನಾನು ಆರ್ಜೆ ಆದೆ. ಈಗ ನಾನು ಮಜಾಭಾರತ ಕಾರ್ಯಕ್ರಮವನ್ನು ನಿರೂಪಿಸುವ ಮೂಲಕ ಕಿರುತೆರೆಯಲ್ಲಿ ಪಯಣ ಆರಂಭಿಸುತ್ತಿದ್ದೇನೆ. ಈ ಶೋ ನಿಮಗೆ ಖಂಡಿತ ಇನ್ನೂ ಹೆಚ್ಚಿನ ಮನರಂಜನೆ ನೀಡುತ್ತದೆ" ಎಂದು ಸಿಂಧು ಹೇಳಿದ್ದಾರೆ.
ಇದನ್ನೂ ಓದಿ: ಸುಮಲತಾ ಜೊತೆಗೆ ಅಮೆರಿಕ ಸೆನೆಟರ್...ಫೋಟೋ ಹಿಂದಿನ ಅಸಲಿ ಸತ್ಯ ಏನು..?
ಮಣಿರತ್ನಂ ನಿರ್ದೇಶನದ 'ಚೆಕ್ಕ ಚಿವಂತ ವಾನಂ' ಹಾಗೂ 'ಕೆನಡಿ ಕ್ಲಬ್' ಚಿತ್ರಗಳಲ್ಲಿ ನಟಿಸಿರುವ ಸಿಂಧು ಇತ್ತೀಚೆಗೆ ನಡೆದ ಅನುಬಂಧ ಅವಾರ್ಡ್ಸ್ ಕಾರ್ಯಕ್ರಮದ ನಿರೂಪಕರಾಗಿ ಕಾಣಿಸಿಕೊಂಡಿದ್ದರು. ಮಜಾ ಭಾರತ ಶೋ ಅಕ್ಟೋಬರ್ನಲ್ಲಿ ಆರಂಭವಾಗಿತ್ತು. ಕರ್ನಾಟಕದ ಹಲವು ಪ್ರತಿಭೆಗಳಿಗೆ ತಮ್ಮ ಹಾಸ್ಯ ಕೌಶಲ್ಯ ಪ್ರದರ್ಶಿಸಲು ಈ ವೇದಿಕೆ ಅವಕಾಶ ನೀಡಿದೆ. ಉತ್ತಮ ಪ್ರತಿಭೆಗಳಿಗೆ ಸಿನಿಮಾದಲ್ಲಿ ಅಭಿನಯಿಸಲು ಅವಕಾಶವನ್ನು ನೀಡುತ್ತದೆ. ಹಿರಿತೆರೆ ನಟಿ, ಡಿಂಪಲ್ ಕ್ವೀನ್ ರಚಿತಾ ರಾಮ್ ಜೊತೆಗೆ ಸಂಗೀತ ನಿರ್ದೇಶಕ ಗುರುಕಿರಣ್ ಈ ಕಾರ್ಯಕ್ರಮದ ತೀರ್ಪುಗಾರ ತೀರ್ಪುಗಾರರಾಗಿದ್ದಾರೆ. ನಟ ಹರೀಶ್ ರಾಜ್ ಕೂಡಾ ಈ ಶೋನ ಭಾಗವಾಗಿದ್ದಾರೆ.
