ಬಿಗ್ಬಾಸ್ ಸೀಸನ್ 7 ಸ್ಫರ್ಧಿಯಾಗಿದ್ದ ಹಿರಿಯ ಪತ್ರಕರ್ತ ರವಿ ಬೆಳಗೆರೆ, ದೊಡ್ಮನೆಯಿಂದ ಹೊರ ಬಂದಿದ್ದಾರೆ. ಸ್ಫರ್ಧಿಯಾಗಿ ಬಿಗ್ ಬಾಸ್ ಮನೆಗೆ ಸೇರಿದ್ದ ರವಿ ಬೆಳಗೆರೆ ಅನಾರೋಗ್ಯದ ಕಾರಣದಿಂದ ಅಲ್ಲಿ ತುಂಬಾ ದಿನ ಇರಲು ಸಾಧ್ಯವಾಗಲಿಲ್ಲ. ಆದ ಕಾರಣ ಒಂದು ವಾರದ ಕಾಲ ಅಲ್ಲಿ ಅತಿಥಿಯಾಗಿ ಇದ್ದರು.
ಒಂದು ವಾರ, ಬಿಗ್ಬಾಸ್ ಮನೆಯಲ್ಲಿ ಉಳಿದ ಸ್ಪರ್ಧಿಗಳೊಂದಿಗೆ ಸಂತಸದಿಂದ ಕಾಲ ಕಳೆದಿರುವ ಬೆಳಗೆರೆ, ಮನೆಯಿಂದ ಹೊರ ಬರುವಾಗ ಬಹಳ ಭಾವುಕರಾಗಿದ್ದರು. ತಮ್ಮ ವಿಶಿಷ್ಟ ಶೈಲಿಯ ಬರವಣಿಗೆ ಮೂಲಕ ಮನೆ ಮಾತಾಗಿರುವ ರವಿ ಬೆಳಗೆರೆ, ಬಿಗ್ಬಾಸ್ ಮನೆಯಲ್ಲಿನ ಒಬ್ಬ ಸ್ಪರ್ಧಿ ಬಗ್ಗೆ ಪುಸ್ತಕ ಬರೆಯುತ್ತಾರಂತೆ. ಪುಟ್ಟಣ್ಣ ಕಣಗಾಲ್ ನಿರ್ದೇಶನದ ಚಿತ್ರದ ಮೂಲಕ ಕನ್ನಡ ಚಿತ್ರರಂಗಕ್ಕೆ ಬಂದ ಜೈಜಗದೀಶ್, ಸುಮಾರು 40 ವರ್ಷಗಳಿಂದ ಕನ್ನಡ ಚಿತ್ರರಂಗದಲ್ಲಿದ್ದಾರೆ. ಅವರ ರಿಯಲ್ ಲೈಫ್ ಬಗ್ಗೆ ಹೆಚ್ಚಿನವರಿಗೆ ತಿಳಿದಿಲ್ಲ. ಇದೀಗ ರವಿ ಬೆಳಗೆರೆ, ಜೈಜಗದೀಶ್ ಬಗ್ಗೆ ಪುಸ್ತಕ ಬರೆಯಲಿದ್ದಾರೆ ಎನ್ನಲಾಗಿದೆ. ಬೆಳಗೆರೆ ತಮ್ಮ ಬಗ್ಗೆ ಪುಸ್ತಕ ಬರೆಯುತ್ತಿರುವುದು ಜೈ ಜಗದೀಶ್ ಅವರಿಗೂ ತಿಳಿದ ವಿಷಯ. ಮನೆಯಿಂದ ಹೊರ ಬರುವಾಗ ನಿಮ್ಮ ಬಗ್ಗೆ ಬಯೋಗ್ರಫಿ ಬರೆಯುತ್ತೇನೆ ಎಂದು ಬೆಳಗೆರೆ ಹೇಳಿದಾಗ ಜೈ ಜಗದೀಶ್ ಥ್ಯಾಂಕ್ಸ್ ಹೇಳಲು ಮರೆಯಲಿಲ್ಲ.
