'ರಾಜಾ ರಾಣಿ'ಯಾಗಿ ಬರ್ತಾರಾ ಬಿಗ್​ಬಾಸ್ ಅರ್ವಿಯಾ ಜೋಡಿ?

ಇತ್ತೀಚೆಗಷ್ಟೇ ಕಲರ್ಸ್‌ ಕನ್ನಡದಲ್ಲಿ ಪ್ರಾರಂಭವಾಗಿರುವ ರಾಜಾ-ರಾಣಿ ರಿಯಾಲಿಟಿ ಶೋನಲ್ಲಿ ವೈಲ್ಡ್ ಕಾರ್ಡ್ ಮೂಲಕ ಅರ್ವಿಯಾ ಜೋಡಿಯನ್ನು ಕರೆತರುವ ಯೋಚನೆಯಲ್ಲಿದೆ.

ಬಿಗ್​ಬಾಸ್ ಸೀಸನ್ 8ರ ಸ್ಪರ್ಧೆಯಲ್ಲಿ ರನ್ನರ್‌ಅಪ್​ ಅರವಿಂದ್ ಹಾಗೂ ಮೂರನೇ ಸ್ಥಾನದ ಪಡೆದ ದಿವ್ಯಾ ಉರುಡುಗ ಜೋಡಿಗೆ ಅಭಿಮಾನಿ ಬಳಗವೇ ಇದೆ. ಈ ಜೋಡಿ ಈಗಾಗಲೇ 'ಅರ್ವಿಯಾ' ಎಂದೇ ಜನಪ್ರಿಯತೆ ಗಳಿಸಿದ್ದು, ಸೋಶಿಯಲ್​ ಮೀಡಿಯಾದಲ್ಲಿ ಪ್ರತ್ಯೇಕ​ ಫ್ಯಾನ್ಸ್​​ ಗ್ರೂಪ್​ ಹೊಂದಿದೆ. ಇದೀಗ ಇಬ್ಬರನ್ನು ಮತ್ತೆ ಕಿರುತೆರೆಗೆ ತರುವ ಚಿಂತನೆಯಲ್ಲಿದೆ ಕಲರ್ಸ್ ಕನ್ನಡ ವಾಹಿನಿ.

ಇತ್ತೀಚೆಗಷ್ಟೇ ಪ್ರಾರಂಭವಾಗಿರುವ ಈ ರಿಯಾಲಿಟಿ ಶೋನಲ್ಲಿ ವಾಹಿನಿಯು ವೈಲ್ಡ್ ಕಾರ್ಡ್ ಮೂಲಕ ಅರ್ವಿಯಾ ಜೋಡಿಯನ್ನು ಕರೆತರುವ ಯೋಚನೆಯಲ್ಲಿದೆ. ಇದರಿಂದಾಗಿ ಟಿಆರ್​ಪಿ (ಟೆಲಿವಿಷನ್ ರೇಟಿಂಗ್‌ ಪಾಯಿಂಟ್‌) ಕೂಡ ಹೆಚ್ಚಾಗಬಹುದು ಅನ್ನೋದು ವಾಹಿನಿಯ ಯೋಜನೆಯೂ ಆಗಿದೆ.

ಅರ್ವಿಯಾ ಜೋಡಿ (ಬಿಗ್‌ ಬಾಸ್ ಕಾರ್ಯಕ್ರಮ)

ದಿವ್ಯಾ ಉರುಡುಗ ಹಾಗೂ ಅರವಿಂದ್ ಮೊದಲ ಇನ್ನಿಂಗ್ಸ್​ನಿಂದಲೇ ಸ್ನೇಹ ಹಾಗೂ ಪ್ರೀತಿ ಗಳಿಸುವ ಮೂಲಕ ಪ್ರೇಕ್ಷಕರ ಮನಗೆದ್ದಿದ್ದರು. ಅಲ್ಲದೇ ಸಾಮಾಜಿಕ ಜಾಲತಾಣದಲ್ಲಿ ಹೆಚ್ಚು ಅಭಿಮಾನಿಗಳನ್ನು ಪಡೆದುಕೊಂಡರು. ಎರಡನೇ ಇನ್ನಿಂಗ್ಸ್ ಪ್ರಾರಂಭವಾಗುವ ಮೊದಲೇ ಇಬ್ಬರಲ್ಲೂ ಪ್ರೀತಿ ಆರಂಭವಾಗಿದೆ ಎನ್ನಲಾಗಿತ್ತು.

ಈ ಜೋಡಿಯು ಪ್ರೇಕ್ಷಕರ ಮೆಚ್ಚುಗೆ ಗಳಿಸಿದ್ದರು ಅನ್ನೋದಕ್ಕೆ ಅರವಿಂದ್ ಹಾಗೂ ದಿವ್ಯಾ ಉರುಡುಗ ಪಡೆದ ಮತಗಳೇ ಸಾಕ್ಷಿ. ಹೀಗಾಗಿ, ಅದೇ ಗುಂಗಿನಲ್ಲಿರುವ ಪ್ರೇಕ್ಷಕರಿಗೆ ರಾಜಾ ರಾಣಿ ರಿಯಾಲಿಟಿ ಶೋ ಮೂಲಕ ಇವರನ್ನು ಮತ್ತೆ ತೆರೆಯ ಮೇಲೆ ತೋರಿಸಲು ವಾಹಿನಿಯು ಉತ್ಸುಕವಾಗಿದೆ ಎನ್ನಲಾಗಿದೆ.