ಬೆಂಗಳೂರು: ಖಾಸಗಿ ಚಾನಲ್ವೊಂದರಲ್ಲಿ ಪ್ರಸಾರವಾಗಲಿರುವ ರಾಘವೇಂದ್ರ ರಾಜ್ ಕುಮಾರ್ ನಿರ್ಮಾಣದ ಹೊಚ್ಚ ಹೊಸ ಧಾರಾವಾಹಿ "ಜೀವ ಹೂವಾಗಿದೆ"ಯ ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳುವ ಮೂಲಕ ನಟಿ ಶಿಲ್ಪಾ ರವಿ ಸೆಕೆಂಡ್ ಇನ್ನಿಂಗ್ಸ್ ಆರಂಭಿಸಿದ್ದಾರೆ.
ಸುನೀಲ್ ನಿರ್ದೇಶನದ ಜೀವ ಹೂವಾಗಿದೆ ಧಾರಾವಾಹಿಯಲ್ಲಿ ಮಧುಮಿತಾ ಪಾತ್ರದಲ್ಲಿ ನಟಿಸಲಿರುವ ಶಿಲ್ಪಾ ರವಿ, ಈ ಬಗ್ಗೆ ಸಂತಸ ವ್ಯಕ್ತಪಡಿಸಿದ್ದಾರೆ. " ವರನಟ ರಾಜ್ ಕುಮಾರ್ ಅವರ ಕುಟುಂಬದೊಂದಿಗೆ ನನ್ನ ಸಂಬಂಧ ಮುಂದುವರಿದಿದೆ ಎಂದರೆ ಅದಕ್ಕೆ ಜೀವ ಹೂವಾಗಿದೆ ಧಾರಾವಾಹಿಯೇ ಕಾರಣ. ನಾನು ಕಳೆದ ಬಾರಿ ಶಿವರಾಜ್ ಕುಮಾರ್ ನಿರ್ಮಾಣದ ಮಾನಸ ಸರೋವರದಲ್ಲಿ ನಾಯಕಿಯಾಗಿ ಅಭಿನಯಿಸಿದೆ. ಇದೀಗ ರಾಘವೇಂದ್ರ ರಾಜ್ ಕುಮಾರ್ ನಿರ್ಮಾಣದ ಧಾರಾವಾಹಿಯಲ್ಲಿ ಅಭಿನಯಿಸುವ ಅವಕಾಶ ಸಿಕ್ಕಿದೆ. ಎರಡೆರಡು ಬಾರಿ ಪ್ರತಿಷ್ಠಿತ ಬ್ಯಾನರ್ ಅಡಿಯಲ್ಲಿ ನಟಿಸಲು ಅವಕಾಶ ದೊರೆತಿರುವುದು ತುಂಬಾ ಸಂತೋಷದ ವಿಚಾರ ಎನ್ನುತ್ತಾರೆ ಶಿಲ್ಪಾ ರವಿ.
ಪ್ರಸ್ತುತ ಧಾರಾವಾಹಿಯಲ್ಲಿ ನಾಯಕಿ ಮಧುಮಿತಾಳಾಗಿ ನಟಿಸುತ್ತಿದ್ದೇನೆ. ದೂರದ ಪೇಟೆಯಲ್ಲಿ ವಿದ್ಯಾಭ್ಯಾಸ ಮುಗಿಸಿ ಹಳ್ಳಿಗೆ ಬಂದಿರುವ ಮಧುಮಿತಾಗೆ ಪ್ರೀತಿ ಆಗುತ್ತದೆ. ಅದು ಕೂಡಾ ದ್ವೇಷ ಇರುವ ಕುಟುಂಬದವರೊಡನೆ ಆಗಿರುವ ಪ್ರೀತಿ, ಇಂತಹ ಪ್ರೀತಿಯನ್ನು ಮಧುಮಿತಾ ಉಳಿಸಿಕೊಳ್ಳುತ್ತಾಳಾ? ಎಂಬುದೇ ಕಥೆಯ ಜೀವಾಳ ಎನ್ನುತ್ತಾರೆ ಶಿಲ್ಪಾ.
ಮೊದಲ ಬಾರಿ ನಾನು ತಮಿಳು ಕಿರುತೆರೆಯಲ್ಲಿ ನಟಿಸಿದ್ದೆ. ಆದರೆ ಕನ್ನಡತಿಯಾಗಿ ನಾನು ಕನ್ನಡ ಕಿರುತೆರೆಯಲ್ಲೇ ಅಭಿನಯಿಸುವ ಮಹಾದಾಸೆ ಹೊಂದಿದ್ದೆ. ಅಮ್ನೋರು ಧಾರಾವಾಹಿಯ ಮೂಲಕ ನನ್ನ ಆಸೆ ನೆರವೇರಿತು. ಮುಂದೆ ಸಪ್ತ ಮಾತೃಕಾ, ನಾಗಿಣಿ, ಮಾನಸ ಸರೋವರದಲ್ಲಿ ನಟಿಸಿರುವ ನಾನು ಇದೀಗ ಜೀವ ಹೂವಾಗಿದೆ ಮೂಲಕ ನಿಮ್ಮ ಮುಂದೆ ಬರಲಿದ್ದೇನೆ ಎಂದು ಹೇಳಿದ್ದಾರೆ.
