ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಜನಪ್ರಿಯ ಧಾರಾವಾಹಿ 'ನಮ್ಮನೆ ಯುವರಾಣಿ' ಯಶಸ್ವಿ ಎರಡು ವರ್ಷಗಳನ್ನು ಪೂರೈಸಿದೆ. 'ನಮ್ಮನೆ ಯುವರಾಣಿ' ಧಾರಾವಾಹಿ ವಿಭಿನ್ನ ಕಥಾ ಹಂದರದ ಮೂಲಕ ಕಿರುತೆರೆ ಪ್ರೇಕ್ಷಕರ ಮೆಚ್ಚುಗೆ ಪಡೆದಿದೆ. ಎರಡು ವರ್ಷಗಳ ಹಿಂದೆ ಆರಂಭವಾದ ಈ ಧಾರಾವಾಹಿ, ಇಂದಿಗೂ ಪ್ರೇಕ್ಷಕರನ್ನು ಹಿಡಿದಿಟ್ಟುಕೊಳ್ಳುವಲ್ಲಿ ಯಶಸ್ವಿಯಾಗಿದೆ.
ಇದನ್ನೂ ಓದಿ: ಅಮ್ಮನಾದ ಖುಷಿಯಲ್ಲಿ ಪಾರು ಧಾರಾವಾಹಿಯ ವಿಲನ್ ದಿಶಾ
ರಾಜ್ ಗುರು ಮನೆತನಕ್ಕೆ ಸೇರಿದ ಸಾಕೇತ್, ಮನೆ ಕೆಲಸದಾಕೆಯ ಮಗಳಾಗಿರುವ ಮೀರಾಳನ್ನು ತನ್ನ ಮನೆಯವರಂತೆ ಕಾಣುತ್ತಿರುತ್ತಾನೆ. ಇನ್ನು ಮನೆಯವರೊಂದಿಗೆ ಗಟ್ಟಿ ಸಂಬಂಧವನ್ನು ವೃದ್ದಿಸಿಕೊಳ್ಳುವ ಮೀರಾ, ರಾಜ್ ಗುರು ಮನೆತನವನ್ನು ಕಾಪಾಡುವ ಸಲುವಾಗಿ ಅನಿಕೇತ್ ಮಡದಿಯಾಗಿ ಆ ಮನೆಗೆ ಸೊಸೆಯಾಗಿ ಬರುತ್ತಾಳೆ. ಮಾತ್ರವಲ್ಲ ಶತ್ರುಗಳ ಸಂಚಿನಿಂದ ತಾನು ಬೆಳೆದ ಮನೆಯನ್ನು, ತನ್ನವರು ಎನಿಸಿಕೊಂಡವರನ್ನು ಆಕೆ ಕಾಪಾಡುತ್ತಾಳೆ. 'ನಮ್ಮನೆ ಯುವರಾಣಿ' ಇತ್ತೀಚಿಗಷ್ಟೇ ರೋಚಕ ತಿರುವು ಕೂಡಾ ಪಡೆದುಕೊಂಡಿತ್ತು. ತನ್ನ ಕುತಂತ್ರ ಅನಿಕೇತ್ಗೆ ತಿಳಿದ ಕಾರಣ ಅಹಲ್ಯಾ ಅನಿಕೇತ್ನನ್ನು ಸಾಯಿಸುತ್ತಾಳೆ. ಆದರೆ ಅನಿಕೇತ್ ವಾಪಸ್ ಬಂದಿರುವುದು ಅಹಲ್ಯಾಗೆ ಭಯ ಮೂಡಿಸಿದೆ. ಅಹಲ್ಯಾಳ ಎಲ್ಲಾ ದುಷ್ಕೃತ್ಯಗಳನ್ನು ತಿಳಿದ ಅನಿಕೇತ್ ಆಕೆಯನ್ನು ಮನೆ ಬಿಟ್ಟು ಹೋಗುವಂತೆ ಒತ್ತಾಯಿಸುತ್ತಿದ್ದಾನೆ. ಅನಿಕೇತ್ ಅಹಲ್ಯಾಳನ್ನು ಮನೆ ಬಿಟ್ಟು ಓಡಿಸುತ್ತಾನಾ...? ಇದಕ್ಕೆ ಅಹಲ್ಯಾ ಏನು ಮಾಡುತ್ತಾಳೆ ಎಂಬುದು ಕುತೂಹಲಕ್ಕೆ ಕಾರಣವಾಗಿದೆ.
