ಕಿಚ್ಚ ಸುದೀಪ್ ಹೊಸ ಪ್ರಯತ್ನಗಳಿಗೆ ಹಾಗೂ ಪ್ರತಿಭೆಗಳಿಗೆ ಯಾವಾಗಲೂ ನೀರೆರೆದು ಪ್ರೋತ್ಸಾಹಿಸುತ್ತಾರೆ. ಅದೇ ರೀತಿ ನಾಳೆ ತಮ್ಮ ಸ್ನೇಹಿತ ಹುಟ್ಟುಹಾಕಿರುವ ಫಿಲ್ಮ್ ಅಕಾಡೆಮಿಯೊಂದನ್ನು ಕಿಚ್ಚ ಸುದೀಪ್ ಉದ್ಘಾಟಿಸಲಿದ್ದಾರೆ.
’ಮೈ ಆಟೋಗ್ರಾಫ್’ ಸಿನಿಮಾದಿಂದ ಸ್ನೇಹಿತರಾಗಿದ್ದ ಯತಿರಾಜ್ ಬೆಂಗಳೂರಿನ ಬಸವೇಶ್ವರ ನಗರದಲ್ಲಿ ಕಲಾ ವಿಧ ಫಿಲ್ಮ್ ಅಕಾಡೆಮಿಯನ್ನು ಸ್ಥಾಪಿಸಿದ್ದು, ನಾಳೆ ಸಂಜೆ 6.30ಕ್ಕೆ ಕಿಚ್ಚ ಸುದೀಪ್ ಈ ಫಿಲ್ಮ್ ಸಂಸ್ಥೆಯನ್ನು ಉದ್ಘಾಟಿಸಿ ಶುಭ ಕೋರಲಿದ್ದಾರೆ.
ಕಿರುತೆರೆ, ಸಿನಿಮಾ ಎರಡರಲ್ಲೂ ತಮ್ಮನ್ನು ತೊಡಗಿಸಿಕೊಂಡಿರುವ ಅರವಿಂದ್ ಹಾಗೂ ಪತ್ರಕರ್ತರೂ ಆಗಿರುವ ಯತಿರಾಜ್ ಇಬ್ಬರೂ ಸೇರಿ ಈ ಫಿಲ್ಮ್ ಅಕಾಡೆಮಿಯನ್ನು ಸ್ಥಾಪಿಸಿದ್ದಾರೆ.
ನಟನೆ, ನಿರೂಪಣೆ, ನಿರ್ದೇಶನ, ಸಂಕಲನ ಹಾಗೂ ಇನ್ನಿತರ ವಿಭಾಗಗಳಲ್ಲಿ ಈ ಅಕಾಡೆಮಿಯಲ್ಲಿ ತರಬೇತಿ ನೀಡಲಾಗುತ್ತದೆ. ಇದರೊಂದಿಗೆ ಯೋಗ, ಮೆಡಿಟೇಶನ್ ಕೂಡಾ ಕಲಿಸಲಾಗುತ್ತದೆ. 3 ತಿಂಗಳ ತರಬೇತಿಗೆ 30 ಸಾವಿರ ರೂಪಾಯಿ ಫೀಸ್ ಇದ್ದು, ಎಪ್ರಿಲ್ ಮೊದಲ ವಾರದಲ್ಲಿ ತರಬೇತಿ ಆರಂಭವಾಗುತ್ತಿದೆ. ಹಿರಿಯ ಹಾಗೂ ಜನಪ್ರಿಯ ಸಿನಿಮಾ ಹಾಗೂ ಕಿರುತೆರೆ ಸೆಲಿಬ್ರಿಟಿಗಳು ವಿದ್ಯಾರ್ಥಿಗಳಿಗೆ ತರಬೇತಿ ನೀಡಲಿದ್ದಾರೆ.
