ಕಿಚ್ಚ ಸುದೀಪ್ ಸಾರಥ್ಯದಲ್ಲಿ ಆರಂಭವಾಗುತ್ತಿರುವ ಕನ್ನಡದ ಹೆಸರಾಂತ ರಿಯಾಲಿಟಿ ಶೋ ಬಿಗ್ಬಾಸ್ಗೆ ಇನ್ನು ಕೇವಲ ನಾಲ್ಕು ದಿನಗಳಷ್ಟೇ ಬಾಕಿ ಉಳಿದಿದೆ. ಬಿಗ್ಬಾಸ್ ಸೀಸನ್ 7 ಆರಂಭವಾಗಲಿದೆ ಎಂದು ಕೇಳಿ ಬಂದಾಗಿನಿಂದಲೂ ವೀಕ್ಷಕರಿಗೆ ಅದರಲ್ಲೂ ಬಿಗ್ಬಾಸ್ ಪ್ರಿಯರಿಗೆ ಈ ಬಾರಿ ಯಾವ ಸೆಲಬ್ರಿಟಿಗಳು ಸ್ಫರ್ಧಿಗಳಾಗಿ ಹೋಗಲಿದ್ದಾರೆ ಎಂಬ ಕುತೂಹಲ.
- " class="align-text-top noRightClick twitterSection" data="
">
ಈಗಾಗಲೇ ಕೆಲವು ಸೆಲಬ್ರಿಟಿಗಳ ಹೆಸರು ಕೇಳಿಬಂದಿದ್ದು ವೀಕ್ಷಕರ ಕುತೂಹಲ ಇನ್ನು ನಾಲ್ಕೇ ನಾಲ್ಕು ದಿನಗಳಲ್ಲಿ ತಣಿಯಲಿದೆ. ಇನ್ನು ಇದರ ಜೊತೆಗೆ ಸುದೀಪ್ ಸಂಭಾವನೆ ಎಷ್ಟಿರಬಹುದು ಎಂಬ ಕುತೂಹಲ ಕೂಡಾ ವೀಕ್ಷಕರಿಗೆ ಇದೆ. ಸ್ಯಾಂಡಲ್ವುಡ್ನಲ್ಲಿ ಅತ್ಯಧಿಕ ಸಂಭಾವನೆ ಪಡೆಯುತ್ತಿರುವ ನಟ ಕಿಚ್ಚ ಸುದೀಪ್ ಬಿಗ್ಬಾಸ್ ಕಾರ್ಯಕ್ರಮ ನಡೆಸಿಕೊಡಲು ಎಷ್ಟು ಸಂಭಾವನೆ ಪಡೆಯುತ್ತಿರಬಹುದು ಎಂಬ ಚರ್ಚೆ ಕೂಡಾ ಆರಂಭವಾಗಿದೆ. ಕಿಚ್ಚ ಈಗಾಗಲೇ ಬಿಗ್ಬಾಸ್ 6 ಸೀಸನ್ಗಳನ್ನು ಯಶಸ್ವಿಯಾಗಿ ಪೂರೈಸಿರುವುದು ನಿಮಗೆಲ್ಲಾ ತಿಳಿದ ವಿಷಯ. ಮುಂದಿನ ಐದು ಸೀಸನ್ಗಳನ್ನು ಕೂಡಾ ಸುದೀಪ್ ಅವರೇ ನಡೆಸಿಕೊಡಲಿದ್ದು, ಈಗಾಗಲೇ ಕಾಂಟ್ರಾಕ್ಟ್ಗೆ ಸಹಿ ಮಾಡಿದ್ದಾರೆ ಎಂಬ ಮಾತು ಕೂಡಾ ಕೇಳಿಬರುತ್ತಿದೆ. ಅದೂ ಕೂಡಾ ಸುಮಾರು 15-20 ಕೋಟಿ ರೂಪಾಯಿಗೆ ಎಂಬ ಸುದ್ದಿ ಹರಿದಾಡುತ್ತಿದೆ.
ಆದರೆ ಸುದೀಪ್ ಸಂಭಾವನೆ ಮಾತು ಎಷ್ಟಾದರೂ ಇರಲಿ, ವಿಭಿನ್ನ ಶೈಲಿಯ ನಿರೂಪಣೆ ಮೂಲಕ ವೀಕ್ಷಕರ ಮನದಲ್ಲಿ ಶಾಶ್ವತ ಸ್ಥಾನ ಪಡೆದಿರುವ ಅಭಿನಯ ಚಕ್ರವರ್ತಿ ಬಿಗ್ಬಾಸ್ ಕಾರ್ಯಕ್ರಮದ ವಾರಾಂತ್ಯದಲ್ಲಿ ಮನರಂಜನೆ ನೀಡಲಿದ್ದಾರೆ. ಅವರನ್ನು ನೋಡಲು, ಅವರು ಹೇಳುವ ಮಾತುಗಳನ್ನು ಕೇಳಲೆಂದೇ ವೀಕ್ಷಕರು ವಾರಾಂತ್ಯದವರೆಗೂ ಕಾಯುತ್ತಾರೆ. ಅಷ್ಟರ ಮಟ್ಟಿಗೆ ಸುದೀಪ್ ಮೋಡಿ ಮಾಡಿರುವುದಂತೂ ಸತ್ಯ. ಸದ್ಯಕ್ಕೆ ಸಿನಿಮಾಗಳಲ್ಲಿ ಬ್ಯುಸಿಯಾಗಿರುವ ಕಿಚ್ಚ ಇನ್ನು ನಾಲ್ಕೇ ದಿನಗಳಲ್ಲಿ ನಿಮ್ಮ ಮನೆಗೆ ಬರಲಿದ್ದಾರೆ. ಟಿವಿ ಆನ್ ಮಾಡಲು ಮರೆಯದಿರಿ.
