ಈ ನಟಿ ಯಾರೆಂದು ಪತ್ತೆ ಹಚ್ಚುತ್ತೀರಾ...? ಅಂದಹಾಗೆ ಇವರು ನಟಿ ಅಲ್ಲ, ಹಾಸ್ಯನಟ. ಜೀ ಕನ್ನಡ ವಾಹಿನಿಯಲ್ಲಿ ಪ್ರಸಾರವಾಗುವ 'ಕಾಮಿಡಿ ಕಿಲಾಡಿಗಳು' ಸೀಸನ್ 3 ರಲ್ಲಿ ಇವರು ಸಖತ್ ಫೇಮಸ್ ಆಗಿದ್ದಾರೆ. ಜಡ್ಜ್ಗಳಿಂದ ಕೂಡಾ ಮೆಚ್ಚುಗೆ ಗಳಿಸಿದ್ದಾರೆ.
ಕಳೆದ ವರ್ಷ ಆಗಸ್ಟ್ನಿಂದ ಆರಂಭವಾದ 'ಕಾಮಿಡಿ ಕಿಲಾಡಿಗಳು' ಕಾರ್ಯಕ್ರಮದ ಸುಮಾರು 50 ಕ್ಕೂ ಹೆಚ್ಚು ಎಪಿಸೋಡ್ಗಳಲ್ಲಿ ಅಕ್ಕ, ತಂಗಿ, ನಾದಿನಿ, ಪ್ರೇಯಸಿ, ಅತ್ತಿಗೆ, ಅಮ್ಮ, ಅತ್ತೆ ಹೀಗೆ ಹಲವಾರು ಮಹಿಳಾ ಪ್ರಧಾನ ಪಾತ್ರ ಮಾಡಿ ಸೈ ಎನ್ನಿಸಿಕೊಂಡಿದ್ದಾರೆ. ಇವರು ಹೆಸರು ದಾನಪ್ಪ ಬಸಪ್ಪ ಮೂಡಲಗಿ, ಮೂಲತ: ಬಾಗಲಕೋಟೆ ಜಿಲ್ಲೆಯವರು. ಇವರು ರಂಗಭೂಮಿ ನಟ. ಸಿನಿಮಾ ಹಾಗೂ ಕಿರುತೆರೆಯಲ್ಲೂ ಕೂಡಾ ಹೆಸರು ಮಾಡಿದವರು. 'ಕಾಮಿಡಿ ಕಿಲಾಡಿ' ಕಾರ್ಯಕ್ರಮದ ಉಳಿದ ಸ್ಪರ್ಧಿಗಳಲ್ಲಿ ದಾನಪ್ಪ ಹೆಚ್ಚಿನ ಮಟ್ಟದಲ್ಲೇ ಹೆಸರು ಗಳಿಸಿದ್ದಾರೆ ಎನ್ನಬಹುದು. ಇದಕ್ಕೆ ಇವರ ವೈವಿಧ್ಯತೆಯೇ ಕಾರಣ. ತೀರ್ಪುಗಾರರಾದ ಯೋಗರಾಜ್ಭಟ್, ರಕ್ಷಿತಾ ಪ್ರೇಮ್, ನವರಸ ನಾಯಕ ಜಗ್ಗೇಶ್ ದಾನಪ್ಪ ಅವರ ನಟನೆಯನ್ನು ಪ್ರಶಂಸೆ ಮಾಡಿದ್ದಾರೆ.
ಮಂಡ್ಯ, ಉಡುಪಿ, ಮಂಗಳೂರು, ಕುಂದಾಪುರ, ದಾವಣಗೆರೆ, ಗದಗ, ಮೈಸೂರು, ಚಿಕ್ಕಮಗಳೂರು, ಬಾಗಲಕೋಟೆಯಿಂದ ಸ್ಪರ್ಧಿಗಳು ಹಾಸ್ಯ ರಸಾಯನ ನೀಡುತ್ತಿದ್ದಾರೆ. ಪ್ರತಿ ರಾತ್ರಿ 7.30 ಕ್ಕೆ ಪ್ರಸಾರವಾಗುತ್ತಿದ್ದ 'ಕಾಮಿಡಿ ಕಿಲಾಡಿಗಳು' ಕಾರ್ಯಕ್ರಮ ಇನ್ನುಮುಂದೆ ರಾತ್ರಿ 9ಕ್ಕೆ ಪ್ರಸಾರವಾಗಲಿದೆ. ಒಂದೆರಡು ತಿಂಗಳಲ್ಲಿ ಈ ಕಾರ್ಯಕ್ರಮ ಅಂತಿಮ ಹಂತ ತಲುಪುತ್ತದೆ. ಮಾಸ್ಟರ್ ಆನಂದ್ ಈ ರಿಯಾಲಿಟಿ ಶೋ ನಿರೂಪಕರಾಗಿದ್ದಾರೆ.
