ಮಕ್ಕಳನ್ನು ದೇವರಿಗೆ ಹೋಲಿಸುತ್ತಾರೆ. ಆದರೆ ಆ ಮಗುವೇ ದೇವರನ್ನು ಹುಡುಕಲು ಹೊರಟರೆ...? ಆ ಮುಗ್ಧತೆಯೇ 'ದೇವರು ಬೇಕಾಗಿದ್ದಾರೆ' ಚಿತ್ರದ ಜೀವಾಳ. ಕೆಂಜಾ ಚೇತನ್ ಕುಮಾರ್ ಪ್ರಥಮ ನಿರ್ದೇಶನದಲ್ಲಿ ಒಂದು ಗಮನಾರ್ಹ ವಿಚಾರವನ್ನು ಸಮಾಜದ ಮುಂದೆ ಇಟ್ಟಿದ್ದಾರೆ. ದೇಶದಲ್ಲಿ ಸುಮಾರು 2 ಕೋಟಿಗೂ ಹೆಚ್ಚು ಅನಾಥ ಮಕ್ಕಳು ಇದ್ದಾರೆ. ಕುಟುಂಬದಲ್ಲಿ ಎರಡನೇ ಮಗು ಬದಲು ಒಂದು ಮಗುವನ್ನು ದತ್ತು ಪಡೆದರೆ ಈ ದೇಶದಲ್ಲಿ ಅನಾಥ ಮಕ್ಕಳೇ ಇರುವುದಿಲ್ಲ ಎಂಬ ಅಭಿಪ್ರಾಯ ಅವರದ್ದು.
ಒಂದು ಅಪಘಾತದಲ್ಲಿ 13 ವ್ಯಕ್ತಿಗಳು ಸಾವನಪ್ಪುತ್ತಾರೆ. ಆದರೆ ಅಲ್ಲಿ ಒಂದು ಹಸುಗೂಸು ಬದುಕಿ ಉಳಿಯುತ್ತದೆ. ಆ ಮಗುವನ್ನು ಹಿರಿಯರೊಬ್ಬರು (ಶಿವರಾಮ್) ತಮ್ಮ ಮನೆಯವರ ವಿರೋಧ ಕಟ್ಟಿಕೊಂಡು ಸಾಕುವ ಜವಾಬ್ದಾರಿ ಹೋರುತ್ತಾರೆ. ಆ ಮಗುವಿಗೆ ಅಪ್ಪು (ಮಾಸ್ಟರ್ ಅನೂಪ್) ಎಂದು ನಾಮಕರಣ ಮಾಡಿ ತನ್ನ ಸಿಡಿ ಅಂಗಡಿಯಲ್ಲಿ ಸಹಾಯಕ ಕಿಟ್ಟಿ ಜೊತೆ ಮಗುವಿನ ಲಾಲನೆ ಪಾಲನೆ ಮಾಡುತ್ತಾರೆ. ಮಗುವನ್ನು ಅಂಗನವಾಡಿ ಕನ್ನಡ ಶಾಲೆಗೆ ಸೇರಿಸುತ್ತಾರೆ. ಚೂಟಿ ಹುಡುಗ ಅಪ್ಪುಗೆ ಪ್ರತಿ ದಿನ ಡಾ. ರಾಜ್ಕುಮಾರ್ ಸಿನಿಮಾ ನೋಡುವ ಅಭ್ಯಾಸ ಆಗಿಹೋಗುತ್ತದೆ.
ಈ ಅಣ್ಣಾವ್ರು ಯಾರು, ಅವರು ಎಲ್ಲಿದ್ದಾರೆ ಎಂದು ಆ ಪುಟ್ಟ ಹುಡುಗ ಪ್ರಶ್ನೆ ಮಾಡಿದಾಗ ಅಜ್ಜ, ಅವರು ದೇವರ ಹತ್ತಿರ ಹೋಗಿದ್ದಾರೆ. ನಿನ್ನ ಅಪ್ಪ-ಅಮ್ಮ ಕೂಡಾ ದೇವರ ಹತ್ತಿರ ಹೋಗಿದ್ದಾರೆ ಎಂದು ನೀಡುವ ಉತ್ತರ ಮುಗ್ಧ ಮಗುವನ್ನು ಕಾಡುತ್ತದೆ. ಮತ್ತೊಂದು ದಿನ ‘ಭಕ್ತ ಪ್ರಹ್ಲಾದ’ ಸಿನಿಮಾ ನೋಡಿದಾಗ ಡಾ. ರಾಜ್ಕುಮಾರ್ ಹಾಗೂ ಪುನೀತ್ ರಾಜಕುಮಾರ್ ಇಬ್ಬರ ನಡುವೆ ನಡೆಯುವ 'ದೇವರು ಎಲ್ಲಿಯೂ ಇದ್ದಾನೆ' ಸಂಭಾಷಣೆ ದೃಶ್ಯ, 'ಕಂಬದಿಂದ ಉಗ್ರ ನರಸಿಂಹ ಹೊರಬರುವ ದೃಶ್ಯ' ಮಗುವನ್ನು ಬಹಳ ಕಾಡುತ್ತದೆ. ಪುನೀತ್ ರಾಜ್ಕುಮಾರ್ ಅವರನ್ನು ಸಂಪರ್ಕಿಸಿದರೆ ದೇವರು ಸಿಗುತ್ತಾರೆ. ನಂತರ ನನ್ನ ಅಪ್ಪ, ಅಮ್ಮ ಎಲ್ಲಿದ್ದಾರೆ ತಿಳಿದುಕೊಳ್ಳಬಹುದು ಎಂದು ಪುಟ್ಟ ಬಾಲಕ ಆಲೋಚಿಸುತ್ತಾನೆ.
ಕೆಲವು ದಿನಗಳ ನಂತರ ಅಪ್ಪುವನ್ನು ಸಾಕಿ ಸಲಹಿದ ಅಜ್ಜ ಸಾವನ್ನಪ್ಪುತ್ತಾರೆ. ಆಗ ಈ ಮುಗ್ಧ ಅಪ್ಪು ಬೆಂಗಳೂರಿಗೆ ಬಂದು ಪುನೀತ್ ರಾಜಕುಮಾರ್ಗಾಗಿ ಹುಡುಕಾಟ ನಡೆಸುತ್ತಾನೆ. ಈ ಅಪ್ಪುವಿಗೆ ಪ್ರಸಾದ್ ಹಾಗೂ ರಾಮಣ್ಣ ಎಂಬುವವರು ಪರಿಚಯ ಆಗುತ್ತಾರೆ. ಇವರಿಬ್ಬರ ಸಹಾಯದಿಂದ ಅಪ್ಪು ಪುನೀತ್ ರಾಜ್ಕುಮಾರ್ ಅವರನ್ನು ಹುಡುಕಲು ಹೊರಡುತ್ತಾನೆ. ಅಲ್ಲದೆ ಶ್ರೀಮಂತ ಕುಟುಂಬವೊಂದರಿಂದ ಮಗುವನ್ನು ದತ್ತು ಪಡೆಯುವ ಪ್ರಯತ್ನ ಕೂಡಾ ಆಗುತ್ತದೆ. ಅಪ್ಪುವಿಗೆ ಪುನೀತ್ ರಾಜ್ಕುಮಾರ್ ಸಿಗುತ್ತಾರಾ..? ಆತನನ್ನು ಯಾರಾದರೂ ದತ್ತು ಪಡೆಯುತ್ತಾರಾ ಎಂಬುದು ಮುಂದಿನ ಕಥೆ.
ಈ ಚಿತ್ರದ ಕೇಂದ್ರ ಬಿಂದು ಅಂದರೆ ಬಾಲ ನಟ ಮಾಸ್ಟರ್ ಅನೂಪ್. ಈ ಮಗುವಿನ ಕೋಪ, ನಗು, ನಿರಂತರ ಹುಡುಕಾಟದಲ್ಲಿ ಪಡುವ ಕಷ್ಟ ಬಹಳ ಮೆಚ್ಚುಗೆ ಆಗುತ್ತದೆ. ಅಯ್ಯೋ ಈ ಮಗುವಿಗೆ ಅಪ್ಪ-ಅಮ್ಮ ಸಿಗಬಾರದಾ ಎನ್ನುವಷ್ಟು ಮನಸ್ಸು ಮಿಡಿಯುತ್ತದೆ. ಹಿರಿಯ ನಟ ಶಿವರಾಮ್ ಅವರದ್ದು ತೂಕದ ಅಭಿನಯ. ಪ್ರಸಾದ್ ವಸಿಷ್ಠ, ಸತ್ಯನಾಥ್, ಕಿಟ್ಟಿ ಪೋಷಕ ಪಾತ್ರಗಳಲ್ಲಿ ಅಚ್ಚುಕಟ್ಟಾಗಿ ಅಭಿನಯಿಸಿದ್ದಾರೆ. ಟೈಟಲ್ ಕಾರ್ಡಿನಲ್ಲಿ ಬರುವ ಹಾಡು ಮತ್ತು ಆಕಾಶಕ್ಕೆ... ದೂರದ ಊರಿಗೆ.. ಹಾಡು ಜುವಿನ್ ಸಿಂಗ್ ಸಂಗೀತ ನಿರ್ದೇಶನದಲ್ಲಿ ಸುಂದರವಾಗಿ ಮೂಡಿಬಂದಿದೆ. ಚಿತ್ರದಲ್ಲಿ ಅಣ್ಣಾವ್ರ ಸಿನಿಮಾಗಳ ಕೆಲವೊಂದು ತುಣುಕುಗಳನ್ನು ಕೂಡಾ ಕಾಣಬಹುದು. ರುದ್ರಮುನಿ ಅವರ ಛಾಯಾಗ್ರಹಣ ಕೂಡಾ ಮೆಚ್ಚುವಂತಿದೆ. ಒಟ್ಟಿನಲ್ಲಿ ಇದು ನಿಜಕ್ಕೂ ಹೃದಯ ತಟ್ಟುವ ಸಿನಿಮಾ ಎನ್ನಬಹುದು.
