ರಚಿತಾ ರಾಮ್
ಬೆಂಗಳೂರಿನಲ್ಲಿ ಹುಟ್ಟಿ ಬೆಳೆದ ಡಿಂಪಲ್ ಕ್ವೀನ್ ರಚಿತಾ ರಾಮ್, ಮೂಲತ: ಭರತನಾಟ್ಯ ಕಲಾವಿದೆ. ಕಥಕ್ ಕಲಿತಿರುವ ರಚಿತಾ ಸುಮಾರು 50 ಕ್ಕೂ ಹೆಚ್ಚು ನೃತ್ಯ ಪ್ರದರ್ಶನಗಳನ್ನು ನೀಡಿದ್ದಾರೆ. ರಚಿತಾ ಸಹೋದರಿ ನಿತ್ಯಾರಾಮ್ ಕೂಡಾ ಕಿರುತೆರೆಯಲ್ಲಿ ಸಾಕಷ್ಟು ಹೆಸರು ಮಾಡಿದ್ದಾರೆ. ನಿತ್ಯಾ ನಟಿಸುತ್ತಿದ್ದ 'ಬೆಂಕಿಯಲ್ಲಿ ಅರಳಿದ ಹೂವು' ಧಾರಾವಾಹಿ ಮೂಲಕ ರಚಿತಾ ಕಿರುತೆರೆಗೆ ಕಾಲಿಟ್ಟರು. ನಂತರ 'ಅರಸಿ' ಧಾರಾವಾಹಿಯಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿದರು. ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಜೊತೆ 'ಬುಲ್ಬುಲ್' ಚಿತ್ರದಲ್ಲಿ ನಾಯಕಿಯಾಗಿ ನಟಿಸುವ ಮೂಲಕ ರಚಿತಾ ಬೆಳ್ಳಿತೆರೆಯಲ್ಲಿ ಕರಿಯರ್ ಆರಂಭಿಸಿದರು. ರಚಿತಾ ಮೂಲ ಹೆಸರು ಬಿಂದಿಯಾ ರಾಮ್. ಆದರೆ ಈಗಾಗಲೇ ಸ್ಯಾಂಡಲ್ವುಡ್ನಲ್ಲಿ 'ಬಿಂದಿಯಾ' ಹೆಸರು ಖ್ಯಾತಿ ಆಗಿದ್ದರಿಂದ ರಚಿತಾ ಎಂದು ಹೆಸರು ಬದಲಿಸಿಕೊಂಡರು. ದರ್ಶನ್, ಪುನೀತ್ ರಾಜ್ಕುಮಾರ್, ಸುದೀಪ್, ಶಿವರಾಜ್ಕುಮಾರ್ ಸೇರಿದಂತೆ ಬಹುತೇಕ ಎಲ್ಲಾ ನಟರೊಂದಿಗೆ ರಚಿತಾ ನಟಿಸಿದ್ದಾರೆ.
ಅಭಿಷೇಕ್
ರೆಬಲ್ ಸ್ಟಾರ್ ಅಂಬರೀಶ್ ಪುತ್ರ ಅಭಿಷೇಕ್, ಯಂಗ್ ರೆಬಲ್ ಸ್ಟಾರ್ ಎಂದೇ ಫೇಮಸ್. ಅಂಬರೀಶ್-ಸುಮಲತಾ ಸ್ಟಾರ್ ದಂಪತಿ ಪುತ್ರನಾಗಿ ಜನಿಸಿದ ಅಭಿಷೇಕ್ 'ಅಮರ್' ಚಿತ್ರದ ಮೂಲಕ ಸ್ಯಾಂಡಲ್ವುಡ್ಗೆ ಬಂದವರು. ಸ್ಟಾರ್ ನಟನ ಪುತ್ರನಾದರೂ 'ಅಮರ್' ಚಿತ್ರಕ್ಕಿಂತ ಮೊದಲು ಅಭಿಷೇಕ್ ತಾನಾಯಿತು, ತನ್ನ ಓದಾಯಿತು ಎಂದು ಇದ್ದವರು. ಈ ಮುನ್ನ 150 ಕಿಲೋ ತೂಕ ಇದ್ದ ಅಭಿಷೇಕ್ 'ಅಮರ್' ಚಿತ್ರಕ್ಕಾಗಿ ಜಿಮ್ಗೆ ಹೋಗಿ ಭಾರೀ ವರ್ಕೌಟ್ ಮಾಡಿ ತೂಕ ಇಳಿಸಿಕೊಂಡು ಫಿಟ್ ಆದರು. ಸಂದೇಶ್ ನಾಗರಾಜ್ ನಿರ್ಮಾಣದ 'ಅಮರ್' ಚಿತ್ರವನ್ನು ನಾಗಶೇಖರ್ ನಿರ್ದೇಶಿಸಿದ್ದರು. 'ಅಮರ್' ಸಿನಿಮಾ ಹಿಟ್ ಸಾಲಿಗೆ ಸೇರದಿದ್ದರೂ ಅಭಿಷೇಕ್ ನಟನೆಯನ್ನು ಎಲ್ಲರೂ ಮೆಚ್ಚಿಕೊಂಡಿದ್ದಾರೆ. ಸದ್ಯಕ್ಕೆ ಹೊಸ ಚಿತ್ರಕ್ಕಾಗಿ ಅಭಿಷೇಕ್ ತಯಾರಿ ನಡೆಸಿದ್ದಾರೆ. ತಂದೆ ನಿಧನ ಹಾಗೂ ಇತ್ತೀಚೆಗೆ ಸಂಬಂಧಿಕರೊಬ್ಬರು ಕೂಡಾ ನಿಧನರಾಗಿದ್ದರಿಂದ ಅಭಿಷೇಕ್ ಈ ಬಾರಿ ತಮ್ಮ ಹುಟ್ಟುಹಬ್ಬ ಆಚರಿಸಿಕೊಂಡಿಲ್ಲ.
ಸಂಜಿತ್ ಹೆಗ್ಡೆ
ಗಾಯಕ ಸಂಜಿತ್ ಹೆಗ್ಡೆ ಕೂಡಾ ಇಂದು ಹುಟ್ಟುಹಬ್ಬ ಆಚರಿಸಿಕೊಂಡಿದ್ದಾರೆ. ಖಾಸಗಿ ವಾಹಿನಿಯ ಖ್ಯಾತ ರಿಯಾಲಿಟಿ ಶೋ ಸರಿಗಮಪ ಮೂಲಕ ರಾಜ್ಯದ ಜನತೆಗೆ ಪರಿಚಿತರಾದ ಸಂಜಿತ್ ಹೆಗ್ಡೆ, ಪ್ರೇಮ್ ಹಾಗೂ ಕೃತಿ ಕರಬಂಧ ನಟನೆಯ 'ದಳಪತಿ' ಚಿತ್ರದ 'ಗುನು ಗುನುಗುವ ಹಾಡಿನಂತೆ' ಹಾಡಿನ ಮೂಲಕ ಹಿನ್ನೆಲೆ ಗಾಯಕರಾಗಿ ಸ್ಯಾಂಡಲ್ವುಡ್ಗೆ ಪರಿಚಯವಾದರು. ತಮ್ಮ ಹಾಡಿನ ಮೂಲಕ ಕಡಿಮೆ ಸಮಯದಲ್ಲಿ ಹೆಚ್ಚು ಅಭಿಮಾನಿಗಳನ್ನು ಪಡೆದ ಸಂಜಿತ್ ಕನ್ನಡ ಮಾತ್ರವಲ್ಲ ತೆಲುಗು, ತಮಿಳು ಸಿನಿಮಾಗಳಲ್ಲೂ ಹಾಡಿದ್ದಾರೆ.
ಮೂವರೂ ಸ್ಟಾರ್ಗಳಿಗೆ ಈ ಟಿವಿ ಭಾರತದ ವತಿಯಿಂದ ಜನ್ಮದಿನದ ಹಾರ್ದಿಕ ಶುಭಾಶಯಗಳು.
