ಕೆಜಿಎಫ್ ನಿರ್ದೇಶಕ ಪ್ರಶಾಂತ್ ನೀಲ್, ತೆಲುಗು ನಟ ಜ್ಯೂನಿಯರ್ ಎನ್ಟಿಆರ್ ಅವರೊಂದಿಗೆ ಸಿನಿಮಾ ಮಾಡಲಿದ್ದಾರೆ ಎಂಬ ಸುದ್ದಿ ಕಳೆದ ವರ್ಷದಿಂದ ಹರಿದಾಡುತ್ತಿದೆ. ಬಹುಶ: ಕೆಜಿಎಫ್ 2 ಮುಗಿದ ನಂತರ ಪ್ರಶಾಂತ್ ನೀಲ್ ಜ್ಯೂ ಎನ್ಟಿಆರ್ ಜೊತೆ ಸಿನಿಮಾ ಆರಂಭಿಸಬಹುದು ಎನ್ನಲಾದರೂ ಪ್ರಶಾಂತ್ ನೀಲ್, ಪ್ರಭಾಸ್ ಅಭಿನಯದಲ್ಲಿ 'ಸಲಾರ್' ಚಿತ್ರವನ್ನು ಘೋಷಿಸಿದರು.
ಇದನ್ನೂ ಓದಿ: ನಿರ್ದೇಶಕರಾಗಿ ಕಿರುತೆರೆಗೆ ಕಮ್ಬ್ಯಾಕ್ ಮಾಡಿದ ಮಾಸ್ಟರ್ ಆನಂದ್
ಸಲಾರ್ ಸಿನಿಮಾ ಚಿತ್ರೀಕರಣ ಈಗಾಗಲೇ ಆರಂಭವಾಗಿದೆ. ಹಾಗಿದ್ದಲ್ಲಿ ಜ್ಯೂನಿಯರ್ ಎನ್ಟಿಆರ್ ಜೊತೆ ಪ್ರಶಾಂತ್ ನೀಲ್ ಸಿನಿಮಾ ಮಾಡ್ತಾರಾ ..? ಇಲ್ಲವಾ...? ಎಂದು ಯೋಚಿಸುತ್ತಿರುವ ಅಭಿಮಾನಿಗಳಿಗೆ ಮೈತ್ರಿ ಮೂವಿ ಮೇಕರ್ಸ್ ಸಂತೋಷದ ವಿಚಾರವನ್ನು ನೀಡಿದೆ. "ತಾರಕ್ ಜೊತೆ ಪ್ರಶಾಂತ್ ನೀಲ್ ಸಿನಿಮಾ ಮಾಡುವುದು ಖಚಿತವಾಗಿದ್ದು ಈಗಾಗಲೇ ಪ್ರಶಾಂತ್ ನೀಲ್ಗೆ ಮೈತ್ರಿ ಮೂವಿ ಮೇಕರ್ಸ್ ಕಡೆಯಿಂದ ದೊಡ್ಡ ಮೊತ್ತದ ಸಂಭಾವನೆ ನೀಡಲಾಗಿದೆ. ಸಲಾರ್ ಮುಗಿಯುತ್ತಿದ್ದಂತೆ ಪ್ರಶಾಂತ್ ನೀಲ್ ಜ್ಯೂನಿಯರ್ ಎನ್ಟಿಆರ್ ಚಿತ್ರವನ್ನು ಕೈಗೆತ್ತಿಕೊಳ್ಳಲಿದ್ದಾರೆ. ಈಗಷ್ಟೇ ತಾರಕ್ ಆರ್ಆರ್ಆರ್ ಸಿನಿಮಾ ಮುಗಿಸಿದ್ದು ತ್ರಿವಿಕ್ರಮ್ ಶ್ರೀನಿವಾಸ್ ನಿರ್ದೇಶನದ ಹೊಸ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಸಲಾರ್ ಮುಗಿಯುವ ವೇಳೆಗೆ ಈ ಸಿನಿಮಾ ಕೂಡಾ ಮುಗಿಯಲಿದೆ. ನಂತರ ಇಬ್ಬರೂ ಸೇರಿ ಸಿನಿಮಾ ಮಾಡಲಿದ್ದಾರೆ" ಎಂದು ಮೈತ್ರಿ ಮೂವಿ ಮೇಕರ್ಸ್ ಸಂಸ್ಥಾಪಕರಾದ ನವೀನ್ ಹಾಗೂ ರವಿ ಮಾಹಿತಿ ನೀಡಿದ್ದಾರೆ.
