ಪೈರಸಿ ಕೇಂದ್ರವಾಗ್ತಿದ್ಯಾ ಬೆಂಗಳೂರು...ಇದರ ಬಗ್ಗೆ ಕಾರ್ತಿಕ್ ಗೌಡ ಹೇಳೋದೇನು...?

ಇತ್ತೀಚೆಗೆ ಬಿಡುಗಡೆಯಾದ ಸ್ಟಾರ್ ಸಿನಿಮಾಗಳನ್ನು ಪೈರಸಿ ಮಾಡಲು ಹೋಗಿ ಇಬ್ಬರು ಸಿಕ್ಕಿಬಿದ್ದಿದ್ದಾರೆ. ಇವರ ಮೇಲೆ ಕೇಸ್ ದಾಖಲಾಗಿದೆ. ಈ ಮೂಲಕ ಬೆಂಗಳೂರು ಪೈರಸಿ ಅಡ್ಡಾ ಆಗಿ ಬದಲಾಗುತ್ತಿದೆ ಎಂದು 'ಯುವರತ್ನ' ಚಿತ್ರದ ಕಾರ್ಯಕಾರಿ ನಿರ್ಮಾಪಕ ಕಾರ್ತಿಕ್ ಗೌಡ ಬೇಸರ ವ್ಯಕ್ತಪಡಿಸಿದ್ದಾರೆ.

ಲಾಕ್​​ಡೌನ್ ಮುಗಿದು ಚಿತ್ರರಂಗ ಎಂದಿನಂತೆ ಸಾಗುತ್ತಿದೆ ಎಂಬ ಸಮಾಧಾನ ಒಂದು ಕಡೆ ಆದರೆ, ಪೈರಸಿ ಕಾಟ ಬೆನ್ನತ್ತಿರುವುದು ಚಿತ್ರರಂಗಕ್ಕೆ ಕಾಡುತ್ತಿರುವ ಮತ್ತೊಂದು ಸಮಸ್ಯೆಯಾಗಿದೆ. ಪೈರಸಿ ಆಗುತ್ತಿರುವುದು ಬಿ ಮತ್ತು ಸಿ ಸೆಂಟರ್​​​​ಗಳಲ್ಲಿ ಅಲ್ಲ, ಬೆಂಗಳೂರಿನಲ್ಲೇ ಹೆಚ್ಚು ಪೈರಸಿ ನಡೆಯುತ್ತಿದೆ ಎಂದು 'ಯುವರತ್ನ' ಸಿನಿಮಾ ಕಾರ್ಯಕಾರಿ ನಿರ್ಮಾಪಕ ಕಾರ್ತಿಕ್ ಗೌಡ ಹೇಳಿದ್ದಾರೆ.

ಇತ್ತೀಚೆಗಷ್ಟೇ ನಡೆದ 'ಯುವರತ್ನ' ಪತ್ರಿಕಾಗೋಷ್ಠಿಯಲ್ಲಿ ಕಾರ್ಯಕಾರಿ ನಿರ್ಮಾಪಕ ಕಾರ್ತಿಕ್ ಗೌಡ ಮಾತನಾಡಿ, ಬೆಂಗಳೂರಿನಲ್ಲೇ ಪೈರಸಿ ನಡೆಯುತ್ತಿದೆ. ಆದರೆ ಯಾವ ಚಿತ್ರಮಂದಿರಗಳಲ್ಲಿ ನಡೆಯುತ್ತಿದೆ ಎಂಬುದು ಮಾತ್ರ ತಿಳಿದುಬಂದಿಲ್ಲ. ಬೆಂಗಳೂರು ಪೈರಸಿಯ ಕೇಂದ್ರಸ್ಥಾನವಾಗುತ್ತದೆ. ಮುಂದಿನ ದಿನಗಳಲ್ಲಿ ಇದರ ಬಗ್ಗೆ ಬಹಳ ಎಚ್ಚರಿಕೆಯಿಂದ ಇರಬೇಕು. ಇತ್ತೀಚೆಗೆ ರಾಮನಗರದ ಮಧು ಎನ್ನುವವರು ಜೆ.ಪಿ. ನಗರದ ಸಿದ್ದೇಶ್ವರ ಚಿತ್ರಮಂದಿರದಲ್ಲಿ 'ರಾಬರ್ಟ್' ಚಿತ್ರವನ್ನು ರೆಕಾರ್ಡ್ ಮಾಡುವ ಪ್ರಯತ್ನ ಮಾಡಿ ಸಿಕ್ಕಿಬಿದ್ದಿದ್ದಾನೆ. ಆತ ರೆಕಾರ್ಡ್ ಮಾಡುತ್ತಿದ್ದು ನೋಡಿ ಅನುಮಾನ ಬಂದ ಚಿತ್ರಮಂದಿರದವರು 'ರಾಬರ್ಟ್' ಚಿತ್ರತಂಡವನ್ನು ಕರೆಸಿ ದೂರು ನೀಡಿದ್ದಾರೆ. ಆತನ ವಿರುದ್ಧ ಪುಟ್ಟೇನಹಳ್ಳಿ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದಾರೆ. ಶನಿವಾರ ಕೂಡಾ ಮಾಗಡಿ ರಸ್ತೆಯ ಪ್ರಸನ್ನ ಚಿತ್ರಮಂದಿರದಲ್ಲಿ ವಿಶ್ವನಾಥ ಎಂಬಾತ ರೆಕಾರ್ಡ್ ಮಾಡುವಾಗ ಸಿಕ್ಕಿಬಿದ್ದಿದ್ದಾನೆ.

ಇದನ್ನೂ ಓದಿ: ಸಮಾಜವನ್ನು ತಿದ್ದುವಂತಹ ಹಾಸ್ಯದ ಅಗತ್ಯವಿದೆ: ಹಿರಿಯ ನಟ ಮುಖ್ಯಮಂತ್ರಿ ಚಂದ್ರು

ಬೆಂಗಳೂರಿನಲ್ಲಿ ಹೆಚ್ಚು ಪೈರಸಿ ಆಗುತ್ತಿದೆ ಎಂಬುದು ಈ ಮೂಲಕ ತಿಳಿಯುತ್ತಿದೆ. 'ರಾಬರ್ಟ್' ಚಿತ್ರದ ಪೈರಸಿ ತಡೆಯುವುದಕ್ಕೆಂದೇ ನಿರ್ಮಾಪಕ ಉಮಾಪತಿ ಶ್ರೀನಿವಾಸ್ ಗೌಡ ಅವರು ಖಾಸಗಿ ಸಂಸ್ಥೆಯೊಂದಕ್ಕೆ ಜವಾಬ್ದಾರಿ ನೀಡಿದ್ದಾರೆ. ಇದಕ್ಕಾಗಿ ಅವರು ಸುಮಾರು 25 ಲಕ್ಷ ರೂಪಾಯಿ ಖರ್ಚು ಮಾಡುತ್ತಾ ಬಂದಿದ್ದಾರೆ. ಎಲ್ಲೆಲ್ಲಿ ಸೋಷಿಯಲ್ ಮೀಡಿಯಾ ಮತ್ತು ವೆಬ್‍ಸೈಟ್‍ಗಳಲ್ಲಿ ಚಿತ್ರದ ಪೈರಸಿ ಲಿಂಕ್‍ಗಳು ಸಿಗುತ್ತಿವೆಯೋ ಅವನ್ನೆಲ್ಲಾ ಡಿಲೀಟ್ ಮಾಡುವುದು ಈ ಸಂಸ್ಥೆಯ ಕೆಲಸವಂತೆ. ಕಳೆದ ಮೂರು ದಿನಗಳಲ್ಲಿ ಇಂಟರ್​​ನೆಟ್​​​ನಲ್ಲಿ 8 ಸಾವಿರಕ್ಕೂ ಹೆಚ್ಚು 'ರಾಬರ್ಟ್' ಚಿತ್ರದ ಪೈರಸಿ ಲಿಂಕ್‍ಗಳನ್ನು ಅವರು ಡಿಲೀಟ್ ಮಾಡಿದ್ದಾರೆ ಎಂದು ಕಾರ್ತಿಕ್ ಗೌಡ ಹೇಳಿದರು.