ಚಿತ್ರರಂಗದಲ್ಲಿ ನಾಯಕಿಯರ ನಡುವೆ ಪೈಪೋಟಿ ಹೊಸದೇನಲ್ಲ. ಇದೀಗ ಸಂಗೀತ ಭಟ್ ಹಾಗೂ ಶ್ರುತಿ ಹರಿಹರನ್ ನಡುವೆ ಕೂಡಾ ಜಟಾಪಟಿ ನಡೆಯುತ್ತಿದೆ. ಅದೂ ಕೂಡಾ ಈ ಇಬ್ಬರು ಕೂಡಾ 'ಮೀ ಟೂ' ಆರೋಪ ಮಾಡಿ ನಟನೆಯಿಂದ ಹಿಂದೆ ಸರಿದು ಮತ್ತೆ ವಾಪಸಾದವರು.
ಆದರೆ ಇವರಿಬ್ಬರ ನಡುವೆ ಇರುವುದು ನಿಜ ಜೀವನದಲ್ಲಿ ಅಲ್ಲ, 'ಆದ್ಯಾ' ಸಿನಿಮಾದಲ್ಲಿ. ಈ ಚಿತ್ರದಲ್ಲಿ ಸಂಗೀತ ಭಟ್ ಹಾಗೂ ಶೃತಿ ಇಬ್ಬರೂ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ. ಸಂಗೀತ ಭಟ್ಗೆ ‘ಆದ್ಯಾ’ ಎಂಬ ಪುಟ್ಟ ಮಗು ಇರುತ್ತದೆ. ಇನ್ನೊಂದೆಡೆ ಎಸಿಪಿ ಶೃತಿ ಹರಿಹರನ್ ಗರ್ಭಿಣಿ ಇದ್ದು ಪತಿ ಜೊತೆ ಸೇರಿ ಮಗುವಿಗೆ 'ಆದ್ಯಾ' ಎಂದು ನಾಮಕರಣ ಮಾಡಬೇಕೆಂದು ಮೊದಲೇ ನಿರ್ಧರಿಸಿರುತ್ತಾರೆ. ಆದರೆ ಆಕೆಗೆ ಗರ್ಭಪಾತ ಆಗಿ ಇನ್ನು ಜೀವನದಲ್ಲಿ ಮಗುವೇ ಆಗುವುದಿಲ್ಲ ಎಂಬ ಮಟ್ಟಕ್ಕೆ ಪರಿಸ್ಥಿತಿ ತಲುಪುತ್ತದೆ. ಹತಾಶೆಗೆ ಒಳಗಾಗುವ ಶ್ರುತಿ , ಸಂಗೀತ ಮಗು 'ಆದ್ಯಾ' ಳನ್ನು ಕಿಡ್ನಾಪ್ ಮಾಡಿ ತನ್ನದಾಗಿಸಿಕೊಳ್ಳುವ ಸಾಹಸ ಮಾಡುತ್ತಾರೆ.
ಮಗುವನ್ನು ಕಿಡ್ನಾಪ್ ಮಾಡುವ ನಿಟ್ಟಿನಲ್ಲಿ ಸಾಲು ಸಾಲು ಕೊಲೆಗಳು ಜರುಗುತ್ತವೆ. ಆದರೆ ಇದನ್ನೆಲ್ಲಾ ದಾಟಿ ಮಗುವನ್ನು ಶ್ರುತಿ ತನ್ನದಾಗಿಸಿಕೊಳ್ಳುತ್ತಾರಾ..?, ಈ ಬಗ್ಗೆ ನಾಯಕ ಯಾವ ಕ್ರಮ ಕೈಗೊಳ್ಳುತ್ತಾನೆ...? ಕೊನೆಗೆ ಆದ್ಯಾ ಹೇಗೆ ರಕ್ಷಣೆ ಆಗುತ್ತಾಳೆ ಎಂಬುದನ್ನು ಬಹಳ ಕುತೂಹಲಕಾರಿಯಾಗಿ ನಿರ್ದೇಶಕ ಕೆ.ಎಂ. ಚೈತನ್ಯ ಚಿತ್ರದಲ್ಲಿ ವಿವರಿಸುತ್ತಾ ಹೋಗುತ್ತಾರೆ. ಈ ಸಿನಿಮಾ ತಮಿಳಿನಲ್ಲಿ 'ಸತ್ಯ' ಆಗಿ, ಹಿಂದಿಯಲ್ಲಿ ಭಾಗಿ-2 ಆಗಿ ಈಗಾಗಲೇ ತೆರೆ ಕಂಡಿದ್ದು ಈಗ ಕನ್ನಡದಲ್ಲಿ ತಯಾರಾಗಿ ಇಂದು ಬಿಡುಗಡೆಯಾಗುತ್ತಿದೆ.
