ಟೈಟಲ್ನಿಂದಲೇ ಸ್ಯಾಂಡಲ್ ವುಡ್ನಲ್ಲಿ ಭರವಸೆ ಮೂಡಿಸುತ್ತಿರುವ ಕನ್ನಡದ ಖ್ಯಾತ ನಿರ್ಮಾಪಕ ಕೆ.ಮಂಜು ಪುತ್ರ ಶ್ರೇಯಸ್ ಅಭಿನಯದ ಎರಡನೇ ಚಿತ್ರ 'ವಿಷ್ಣು ಪ್ರಿಯ'ದ ಟ್ರೈಲರ್ ರಿಲೀಸ್ ಆಗಿದೆ. 'ಪಡ್ಡೆಹುಲಿ' ಚಿತ್ರದ ಬಳಿಕ 2ನೇ ಇನ್ನಿಂಗ್ಸ್ ಸ್ಟಾರ್ಟ್ ಮಾಡಿರುವ ಶ್ರೇಯಸ್ಗೆ ಕಣ್ಸನ್ನೆ ಬೆಡಗಿ ಪ್ರಿಯಾ ವಾರಿಯರ್ ಜೊತೆಯಾಗಿದ್ದಾರೆ.
ಚಿತ್ರದ ಆಫೀಶಿಯಲ್ ಟ್ರೈಲರ್‌ನ ಪವರ್ಸ್ಟಾರ್ ಪುನೀತ್ ರಾಜ್‍ಕುಮಾರ್ ಬಿಡುಗಡೆ ಮಾಡಿ, ಸಿನಿಮಾ ಪ್ರಾಮಿಸ್ಸಿಂಗ್ ಆಗಿದೆ ಅಂತಾ ಮೆಚ್ಚುಗೆ ವ್ಯಕ್ತಪಡಿಸಿದರು. ನಿರ್ದೇಶಕ ಇಂದ್ರಜಿತ್ ಲಂಕೇಶ್, ನಿರ್ಮಾಪಕ ರಮೇಶ್ ರೆಡ್ಡಿ ಟ್ರೈಲರ್ ನೋಡಿ ಹರ್ಷ ವ್ಯಕ್ತಪಡಿಸಿದರು.
ನಿರ್ಮಾಪಕ ಕೆ.ಮಂಜು ಮಾತನಾಡಿ, 'ವಿಷ್ಣು ಪ್ರಿಯ' ಸಿನಿಮಾ ನೈಜ ಘಟನೆಯ ಲವ್ ಸ್ಟೋರಿ, ಇವತ್ತಿನ ಯುವ ಮನಸ್ಸುಗಳಿಗೆ ಈ ಸಿನಿಮಾ ಇಷ್ಟ ಆಗುತ್ತೆ ಅಂತಾ ಮಗನ ಸಿನಿಮಾದ ಬಗ್ಗೆ ಭರವಸೆಯ ಮಾತುಗಳನ್ನಾಡಿದರು. ನಾನು ಡ್ಯಾನ್ಸ್, ಫೈಟ್ ಮಾಡೋದಕ್ಕೆ ಅಪ್ಪು ಅವರೇ ಸ್ಫೂರ್ತಿ ಅಂತಾ ನಟ ಶ್ರೇಯಸ್ ಹೇಳಿದರು.
25ಕ್ಕೂ ಹೆಚ್ಚು ಚಿತ್ರಗಳು, ಹಲವು ಜಾಹೀರಾತುಗಳನ್ನು ನಿರ್ದೇಶಿಸಿರುವ ಮಾಲಿವುಡ್ ನಿರ್ದೇಶಕ ವಿ.ಕೆ ಪ್ರಕಾಶ್‌ 'ವಿಷ್ಣುಪ್ರಿಯ' ಚಿತ್ರಕ್ಕೆ ಆ್ಯಕ್ಷನ್‌-ಕಟ್‌ ಹೇಳಿದ್ದಾರೆ. ಶ್ರೇಯಸ್ ಜೊತೆ ಪ್ರಿಯಾ ವಾರಿಯರ್ ನಟಿಸುವ ಮೂಲಕ, ಚಂದನವನಕ್ಕೆ ಪ್ರಿಯಾ ಎಂಟ್ರಿ ಕೊಟ್ಟಿದ್ದಾರೆ.
ಚಿತ್ರದಲ್ಲಿ ಅಚ್ಯುತ್ ಕುಮಾರ್, ಸುಚೇಂದ್ರ ಪ್ರಸಾದ್, ಸುಂದರ ರಾಜ್, ಅಶ್ವಿನಿ ಗೌಡ ಸೇರಿ ಸಾಕಷ್ಟು ಕಲಾವಿದರು ಅಭಿನಯಿಸಿದ್ದಾರೆ. ಗೋಪಿ ಸುಂದರ್ ಸಂಗೀತ, ವಿನೋದ್ ಭಾರತಿ ಕ್ಯಾಮೆರಾ ವರ್ಕ್ ಹಾಗೂ ರವಿ ಶ್ರೀವತ್ಸ ಅವ್ರ ಸಂಭಾಷಣೆ ಈ ಚಿತ್ರಕ್ಕಿದೆ.
ಸದ್ಯ ರಿವೀಲ್ ಆಗಿರುವ ಟ್ರೈಲರ್ನಲ್ಲಿ ಶ್ರೇಯಸ್ ಹಾಗೂ ಪ್ರಿಯಾ ವಾರಿಯರ್ ಜೋಡಿ ವರ್ಕ್ ಔಟ್ ಆಗಿದ್ದು, ಅದ್ದೂರಿ ವೆಚ್ಚದಲ್ಲಿ ನಿರ್ಮಾಪಕ ಕೆ.ಮಂಜು ನಿರ್ಮಾಣ ಮಾಡಿದ್ದಾರೆ. ಬಿಗ್ ಬಜೆಟ್ ಸಿನಿಮಾಗಳು ಬಿಡುಗಡೆ ಬಳಿಕ ವಿಷ್ಣು ಪ್ರಿಯ ಸಿನಿಮಾ ತೆರೆಗೆ ಬರಲಿದೆ.
