'ಲೆಜೆಂಡ್ಸ್' ಕಾರ್ಯಕ್ರಮದಲ್ಲಿ ತ್ರಿಮೂರ್ತಿಗಳ ಸಂಗಮ... ನವೆಂಬರ್​ನಲ್ಲಿ ಕಾರ್ಯಕ್ರಮ ಆಯೋಜನೆ

ನವೆಂಬರ್ ತಿಂಗಳಲ್ಲಿ ಹೈದರಾಬಾದ್​​​​​ನಲ್ಲಿ ನಡೆಯುತ್ತಿರುವ 'ಲೆಜೆಂಡ್ಸ್​​​​​' ಹೆಸರಿನ ಕಾರ್ಯಕ್ರಮದಲ್ಲಿ ಏಸುದಾಸ್, ಚಿತ್ರ ಹಾಗೂ ಎಸ್​.ಪಿ.ಬಾಲಸುಬ್ರಹ್ಮಣ್ಯಂ ಮೂವರೂ ಖ್ಯಾತ ಗಾಯಕರು ಒಂದೇ ವೇದಿಕೆ ಮೇಲೆ ಹಾಡಲಿದ್ದಾರೆ. ಟಾಲಿವುಡ್​​​​​ನಲ್ಲಿ ಇಂತಹ ಕಾರ್ಯಕ್ರಮ ಜರುಗುತ್ತಿರುವುದು ಇದೇ ಮೊದಲ ಬಾರಿ.

ಖ್ಯಾತ ಗಾಯಕರಾದ ಕೆ.ಜೆ.ಏಸುದಾಸ್, ಎಸ್​.ಪಿ.ಬಾಲಸುಬ್ರಹ್ಮಣ್ಯಂ, ಚಿತ್ರ ಮೂವರೂ ಒಂದೇ ವೇದಿಕೆ ಮೇಲೆ ಹಾಡಲು ವೇದಿಕೆ ಸಿದ್ಧವಾಗುತ್ತಿದೆ. ತಾವೇ ಹಾಡಿರುವ ಸುಮಧುರ ಚಿತ್ರಗೀತೆಗಳನ್ನು ಮತ್ತೆ ಅಭಿಮಾನಿಗಳ ಮುಂದೆ ಈ ತ್ರಿಮೂರ್ತಿಗಳು ಹಾಡಲಿದ್ದಾರೆ.

ಬುಕ್​ ಮೈ ಶೋ ಹಾಗೂ ಎಲೆವೆನ್ ಪಾಯಿಂಟ್ ಟೂ ಜೊತೆಯಾಗಿ ಸೇರಿ 'ಲೆಜೆಂಡ್ಸ್​​​​​' ಹೆಸರಿನ ಕಾರ್ಯಕ್ರಮವನ್ನು ನವೆಂಬರ್ 30ರಂದು ಹೈದರಾಬಾದ್​​​ನಲ್ಲಿ ಆಯೋಜಿಸಿದ್ದಾರೆ. ನಿನ್ನೆ ನಡೆದ ಮಾಧ್ಯಮಗೋಷ್ಠಿಯಲ್ಲಿ ಎಸ್​​ಪಿಬಿ ಮಾತನಾಡಿ, ತೆಲುಗಿನಲ್ಲಿ ಈ ರೀತಿಯ ಕಾರ್ಯಕ್ರಮ ಮಾಡುತ್ತಿರುವುದು ಮೊದಲ ಬಾರಿ. ಈ ಕಾರ್ಯಕ್ರಮ ದೊಡ್ಡ ಮಟ್ಟದಲ್ಲಿ ಜರುಗುತ್ತಿದೆ. ನಾನು, ಅಣ್ಣನ ಸಮಾನರಾದಂತಹ ಏಸುದಾಸ್ ಹಾಗೂ ಚಿತ್ರ ಮೂವರೂ ಇದುವರೆಗೂ ಲಕ್ಷಕ್ಕೂ ಹೆಚ್ಚು ಚಿತ್ರಗೀತೆಗಳನ್ನು ಹಾಡಿದ್ದೇವೆ. ಆ ಹಾಡುಗಳಲ್ಲಿ 30 ಹಾಡುಗಳನ್ನು ಮಾತ್ರ ಆಯ್ಕೆ ಮಾಡಿಕೊಂಡು ಕಾರ್ಯಕ್ರಮದಲ್ಲಿ ಹಾಡಲಿದ್ದೇವೆ. ಆದರೆ ಯಾವ ಹಾಡುಗಳನ್ನು ಆಯ್ಕೆ ಮಾಡಿಕೊಳ್ಳಬೇಕು ಎಂಬುದರ ಬಗ್ಗೆ ಕಸರತ್ತು ನಡೆಸುತ್ತಿದ್ದೇವೆ. ಅದು ಬಹಳ ಕಷ್ಟಕರ ವಿಷಯ.

ಸಿಂಗಪೂರ್​ನಲ್ಲಿ 'ಲೆಜೆಂಡ್ಸ್​​​​​' ಹೆಸರಿನಲ್ಲಿ ಇದೇ ರೀತಿಯ ಕಾರ್ಯಕ್ರಮ ಮಾಡಿದ್ದೆವು. ಈ ಕಾರ್ಯಕ್ರಮಕ್ಕೆ ಒಳ್ಳೆಯ ಪ್ರಶಂಸೆ ದೊರೆತಿತ್ತು. ಪ್ರಪಂಚದಾದ್ಯಂತ ಇಂತಹ ಕಾರ್ಯಕ್ರಮಗಳನ್ನು ಆಯೋಜಿಸಲು ಪ್ಲ್ಯಾನ್​​​​ ಮಾಡಿದ್ದೇವೆ. ಹೈದರಾಬಾದ್​​ 'ಲೆಜೆಂಡ್ಸ್​​​​​' ಕಾರ್ಯಕ್ರಮದಲ್ಲಿ ರೆಹಮಾನ್ ಆರ್ಕೆಸ್ಟ್ರಾ ಸ್ಕೂಲ್​​ ವಿದ್ಯಾರ್ಥಿಗಳು ಕೂಡಾ ಹಾಡಲಿದ್ದಾರೆ. ನಾವು ಮೂವರೂ ಗಾಯಕರ ನಡುವೆ ಒಳ್ಳೆಯ ಅನುಬಂಧವಿದೆ. ಇಲ್ಲದಿದ್ದರೆ ಇಂತಹ ಕಾರ್ಯಕ್ರಮಗಳನ್ನು ಆಯೋಜಿಸಲು ಸಾಧ್ಯವೇ ಇಲ್ಲ ಎಂದು ಎಸ್​.ಪಿ.ಬಾಲಸುಬ್ರಹ್ಮಣ್ಯಂ ಹೇಳಿದ್ದಾರೆ.