ಹಿರಿಯ ನಟರು ಕಿರಿತೆರೆಯಲ್ಲಿ ನಟಿಸುವುದು ಮಾಮೂಲಿ ಸಂಗತಿ. ಆದರೆ, ಹಿರಿತೆರೆಯಲ್ಲಿ ಸಾಕಷ್ಟು ಜನಪ್ರಿಯತೆ ಗಳಿಸಿದ ಸ್ಟಾರ್ ನಟ-ನಟಿಯರೂ ಇದೀಗ ನಿರೂಪಕರಾಗಿ ಕಿರುತೆರೆಗೆ ಕಾಲಿಟ್ಟು ಸೈ ಎನಿಸಿಕೊಂಡಿದ್ದಾರೆ. ಆ ಮೂಲಕ ಕೇವಲ ಹಿರಿತೆರೆ ಮಾತ್ರವಲ್ಲದೇ ಕಿರುತೆರೆಯಲ್ಲೂ ಕಮಾಲ್ ಮಾಡಿದ್ದಾರೆ.
ಶಿವರಾಜ್ ಕುಮಾರ್: ಸೆಂಚುರಿ ಸ್ಟಾರ್, ಕರುನಾಡ ಚಕ್ರವರ್ತಿ ಶಿವರಾಜ್ ಕುಮಾರ್ ಕೂಡಾ ನಿರೂಪಕರಾಗಿ ಮನೆ ಮಾತಾಗಿದ್ದರು. ಯಾರೀ ನಂ 1 ಕಾರ್ಯಕ್ರಮದ ನಿರೂಪಕರಾಗಿ ಮೊದಲ ಬಾರಿಗೆ ಕಿರುತೆರೆ ಲೋಕಕ್ಕೆ ಕಾಲಿಟ್ಟ ಶಿವಣ್ಣ ಅಲ್ಲೂ ಸೈ ಎನಿಸಿಕೊಂಡಿದ್ದಾರೆ.
ರಮೇಶ್ ಅರವಿಂದ್ : ರಮೇಶ್ ಅರವಿಂದ್ ಅವರಿಂದು ಜನಪ್ರಿಯತೆಯ ಶಿಖರಲ್ಲಿದ್ದಾರೆ ಎಂದರೆ ಅದಕ್ಕೆ ಮೂಲ ಕಾರಣ ಕಿರುತೆರೆ. ಅವರು ನಡೆಸಿಕೊಡುತ್ತಿದ್ದ ವೀಕೆಂಡ್ ವಿತ್ ರಮೇಶ್ ಕಾರ್ಯಕ್ರಮ ರಮೇಶ್ ಅವರಿಗೆ ತುಂಬಾ ಜನಪ್ರಿಯತೆ ತಂದುಕೊಟ್ಟಿದೆ. ಸಾಧಕರನ್ನು ಪರಿಚಯಿಸುವ ಆ ಕಾರ್ಯಕ್ರಮದಲ್ಲಿ ರಮೇಶ್ ಅರವಿಂದ್ ನಿರೂಪಣೆ ಅದ್ಭುತವಾಗಿ ಮೂಡಿ ಬರುತ್ತಿತ್ತು.
ಪುನೀತ್ ರಾಜ್ ಕುಮಾರ್ : ಕನ್ನಡದ ಕೋಟ್ಯಾಧಿಪತಿ ಕಾರ್ಯಕ್ರಮದ ನಿರೂಪಕರಾಗಿ ಕಿರುತೆರೆ ಜಗತ್ತಿಗೆ ಕಾಲಿಟ್ಟ ಪವರ್ ಸ್ಟಾರ್ ಅಪ್ಪು ನಿರೂಪಣೆಯ ಮೂಲಕ ಸೈ ಎನಿಸಿಕೊಂಡವರು. ಕೇವಲ ಕನ್ನಡದ ಕೋಟ್ಯಧಿಪತಿ ಮಾತ್ರವಲ್ಲದೇ ಫ್ಯಾಮಿಲಿ ಪವರ್ ಕಾರ್ಯಕ್ರಮವನ್ನೂ ಕೂಡಾ ನಡೆಸಿಕೊಟ್ಟಿದ್ದಾರೆ.
ಗಣೇಶ್: ಕಾಮಿಡಿ ಟೈಮ್ ಕಾರ್ಯಕ್ರಮದ ಮೂಲಕ ನಟನಾ ರಂಗಕ್ಕೆ ಕಾಲಿಟ್ಟ ಗಣೇಶ್ ಮುಂದೆ ಚಂದನವನದ ಸ್ಟಾರ್ ನಟರ ಸಾಲಿಗೆ ಸೇರ್ಪಡೆಯಾದ್ರು. ಮುಂದೆ ಸೂಪರ್ ಮಿನಿಟ್ ಗೇಮ್ ಶೋ ಮೂಲಕ ಮತ್ತೆ ಕಿರುತೆರೆಗೆ ಮುಖ ಮಾಡಿದ ಗಣೇಶ್ ಸ್ಯಾಂಡಲ್ವುಡ್ ಜೊತೆಗೆ ಆ್ಯಂಕರಿಂಗ್ನಲ್ಲೂ ಮಿಂಚಿದರು.
ಲಕ್ಷ್ಮಿ: ಕಥೆ ಅಲ್ಲ ಜೀವನ ಕಾರ್ಯಕ್ರಮದ ನಿರೂಪಕರಾಗಿ ಕಿರುತೆರೆಗೆ ಪಾದಾರ್ಪಣೆ ಮಾಡಿದ ಜ್ಯೂಲಿ ಲಕ್ಷ್ಮಿ ಮುಂದೆ ನಾನಾ ನೀನಾ ಕಾರ್ಯಕ್ರಮವನ್ನೂ ನಡೆಸಿಕೊಟ್ಟು ಸದ್ದು ಮಾಡಿದರು.
ಉಮಾಶ್ರೀ: ಆರತಿಗೊಬ್ಬ ಕೀರ್ತಿಗೊಬ್ಬ ಧಾರಾವಾಹಿಯಲ್ಲಿ ಪುಟ್ಮಲ್ಲಿಯಾಗಿ ಕಿರುತೆರೆಗೆ ಕಾಲಿಟ್ಟಿರುವ ಉಮಾಶ್ರೀ ಮೊದಲ ಬಾರಿಗೆ ನಿರೂಪಕಿಯಾಗಿ ಕಾಣಿಸಿಕೊಂಡಿದ್ದಾರೆ. ಅದು ಕೂಡಾ ಮಕ್ಕಳ ಕಾರ್ಯಕ್ರಮಕ್ಕೆ. ಉದಯ ವಾಹಿನಿಯಲ್ಲಿ ಪ್ರಸಾರವಾಗುತ್ತಿರುವ ಚಿಣ್ಣರ ಚಿಲಿಪಿಲಿ ಕಾರ್ಯಕ್ರಮದ ನಿರೂಪಕಿಯಾಗಿ ಉಮಾಶ್ರೀ ಬ್ಯುಸಿಯಾಗಿದ್ದಾರೆ.
