ಜೀ ವಾಹಿನಿಯ ಜನಪ್ರಿಯ ಕಾರ್ಯಕ್ರಮ ಸರಿಗಮಪ ಯಶಸ್ವಿ 25 ವರ್ಷಗಳನ್ನು ಪೂರೈಸಿದೆ. ಕನ್ನಡದಲ್ಲಿ 15 ಸೀಸನ್ಗಳನ್ನು ಯಶಸ್ವಿಯಾಗಿಸಿದೆ. ಸರಿಗಮಪ ಹಲವು ಸೀಸನ್ಗಳಲ್ಲಿ ಕನ್ನಡ ವೀಕ್ಷಕರನ್ನು ರಂಜಿಸಿರುವುದಲ್ಲದೆ, ಸಾಕಷ್ಟು ಉದಯೋನ್ಮುಖ ಗಾಯಕ, ಗಾಯಕಿಯರಿಗೆ ವೇದಿಕೆ ಒದಗಿಸಿ ವೃತ್ತಿಜೀವನಕ್ಕೆ ಪ್ರವೇಶ ಪಡೆಯಲು ನೆರವಾಗಿದೆ. ಈ ಕಾರ್ಯಕ್ರಮ ಇಂದು ಹಲವು ಸ್ಟಾರ್ ಗಾಯಕರಿಗೆ ವೇದಿಕೆಯಾಗಿದೆ. ಅಂತಹ ಐದು ಗಾಯಕರು ಇಂದು ಮನೆಮಾತಾಗಿದ್ದಾರೆ.
ಸಂಜಿತ್ ಹೆಗ್ಡೆ, ಸರಿಗಮಪ-13 : ಭಾರತದ ಜಸ್ಟಿನ್ ಬೈಬರ್ ಎಂದೇ ಕರೆಸಿಕೊಳ್ಳುವ ಸಂಜಿತ್ ಹೆಗ್ಡೆ ಪಾಪ್ ಸಂಗೀತ ಲೋಕದಲ್ಲಿ ಹೊಸ ಸಂಚಲನವನ್ನು ಉಂಟು ಮಾಡಿರುವ ಕನ್ನಡದ ಪ್ರತಿಭೆ. ಸರಿಗಮಪದಿಂದ ಹಿಡಿದು ಕನ್ನಡ, ತಮಿಳು ಮತ್ತು ತೆಲುಗು ಚಿತ್ರರಂಗಗಳಲ್ಲಿ ತನ್ನ ಕಂಠದಿಂದಲೇ ಸದ್ದು ಮಾಡುತ್ತಿದ್ದಾರೆ. ಈ ಗಾಯಕ ಭಾರತದ ಹಲವು ನಗರಗಳಲ್ಲಿ ಮತ್ತು ವಿದೇಶದಲ್ಲಿ ಸಂಗೀತ ಕಾರ್ಯಕ್ರಮಗಳನ್ನು ನೀಡಿದ್ದಾರೆ. ಬೆಂಗಳೂರಿನಲ್ಲಿ ಜನಿಸಿದ ಸಂಜಿತ್, ಸಿಎಮ್ಆರ್ ಕಾಲೇಜಿನಿಂದ ಪಿಯುಸಿ ಮುಗಿಸಿ ಜೆಎಸ್‌ಎಸ್ ಎಂಜಿನಿಯರಿಂಗ್ ಕಾಲೇಜ್ ಸೇರಿದರು. ನಂತರ ಎಂಜಿನಿಯರಿಂಗ್ ಮಧ್ಯದಲ್ಲಿಯೇ ಬಿಟ್ಟು ಬಿಬಿಎ ಕೋರ್ಸ್ ಸೇರಿದರು.
ಜೀ ಕನ್ನಡ ವಾಹಿನಿಯ ಸರಿಗಮಪ 13ನೇ ಸೀಸನ್ ಸ್ಪರ್ಧಿಯಾಗಿ ಮುನ್ನೆಲೆಗೆ ಬಂದ ಸಂಜಿತ್ ದಳಪತಿ ಚಿತ್ರದ `ಗುನು ಗುನುಗುವ' ಹಾಡಿನಿಂದ ಪ್ರಸಿದ್ದರಾದರು. ಜೀ ತಮಿಳು ವಾಹಿನಿಯ ಸರಿಗಮಪ ಕಾರ್ಯಕ್ರಮದಲ್ಲಿಯೂ ಹಾಡಿದ್ದಾರೆ. ಕೆಲವು ತೆಲುಗು ಮತ್ತು ತಮಿಳು ಗೀತೆಗಳನ್ನು ಹಾಡಿರುವ ಇವರು `ಚಮಕ್' ಚಿತ್ರದ `ಕುಷ್ ಕುಷ್' ಹಾಡಿಗೆ ಗಾನಾ ಮಿರ್ಚಿ ಮ್ಯೂಸಿಕ್ ಅವಾರ್ಡ್ ಪಡೆದರು. ಪ್ರೇಮ ಗೀತೆಗಳಿಂದ ಹಿಡಿದು ಪಾಪ್ ಗೀತೆಗಳನ್ನು ಹಾಡುವ ಗುಂಗುರು ಕೂದಲಿನ ಸಂಜಿತ್ ಹಿಂದೂಸ್ತಾನಿ ಶಾಸ್ತ್ರೀಯ ಸಂಗೀತ ಕೂಡ ಬಲ್ಲರು.
ಕೀರ್ತನ್ ಹೊಳ್ಳ, ಸರಿಗಮಪ-15 : ಜೀ ಕನ್ನಡದ ಜನಪ್ರಿಯ ಸಿಂಗಿಂಗ್ ರಿಯಾಲಿಟಿ ಶೋ ಸರಿಗಮಪ ಸೀಸನ್-15 ಚಾಂಪಿಯನ್ ಆಗಿ ಕೀರ್ತನ್ ಹೊಳ್ಳ ಪ್ರಶಸ್ತಿ ಮುಡಿಗೇರಿಸಿಕೊಂಡಿದ್ದಾರೆ. ಕ್ಲಾಸಿಕಲ್ ಕಿಂಗ್ ಕೀರ್ತನ್ ಕಾರ್ಯಕ್ರಮದ ಸ್ಪರ್ಧಿಯಾಗಿದ್ದ ಕೀರ್ತನ್ ಹೊಳ್ಳ, ತಮ್ಮ ಹಾಡುಗಳ ಮೂಲಕ ಹಂತ ಹಂತವಾಗಿ ಮುಂದೆ ಬಂದರು. ಫೈನಲ್ನಲ್ಲಿ ಎರಡು ಹಾಡುಗಳ ಮೂಲಕ ತೀರ್ಪುಗಾರರಿಂದ ಉತ್ತಮ ಪ್ರತಿಕ್ರಿಯೆ ಪಡೆದ ಕೀರ್ತನ್ ಟಾಪ್ 1 ಸ್ಪರ್ಧಿಯಾಗಿದ್ದರು. ಜೊತೆಗೆ ಸರಿಗಮಪ ವಿಜೇತ ಎಂಬ ಪಟ್ಟ ಪಡೆದಿದ್ದಾರೆ.
ಹನುಮಂತಪ್ಪ ಲಮಾಣಿ, ಸರಿಗಮಪ-15 : ಸೀಸನ್ 15' ನಲ್ಲಿ ಹನುಮಂತಪ್ಪ ಸಿಕ್ಕಾಪಟ್ಟೆ ಮೋಡಿ ಮಾಡಿದ್ದಾರೆ. ಕುರಿ ಕಾಯುವ ಕೆಲಸವನ್ನು ಮಾಡುವ ಹನುಮಂತಪ್ಪ ಸಂಗೀತವನ್ನು ಕಲಿಯದೇ ಸರಿಗಮಪ ವೇದಿಕೆಯಲ್ಲಿ ಅದ್ಭುತವಾಗಿ ಹಾಡಿ ಕೋಟ್ಯಂತರ ಅಭಿಮಾನಿಗಳನ್ನು ಗಳಿಸಿದ್ದಾರೆ. ಸ್ಟೇಜ್ ಹತ್ತಿ ಮೈಕ್ ಹಿಡಿದರೆಂದರೆ ಗಾನ ಸುಧೆಯೇ ಹರಿಯುತ್ತದೆ. ಹನುಮಂತಪ್ಪನ ಪ್ರತಿಭೆಗೆ ಯಾರಾದರೂ ತಲೆದೂಗಲೇಬೇಕು. ಜೀ ಕನ್ನಡದಲ್ಲಿ ಪ್ರಸಾರವಾಗುವ ಸರಿಗಮಪ ಅನೇಕ ಗಾಯಕರನ್ನ ಪರಿಚಯಿಸಿದೆ. ಈ ಶೋ ಮೂಲಕ ಬೆಳಕಿಗೆ ಬಂದ ಪ್ರತಿಭೆಗಳು ಇಂದು ಸ್ಯಾಂಡಲ್‌ವುಡ್ ಮತ್ತು ಬೇರೆ ಇಂಡಸ್ಟ್ರಿಯಲ್ಲಿ ಜೀವನ ಕಂಡುಕೊಂಡಿದ್ದಾರೆ.
ಚನ್ನಪ್ಪ ಹುದ್ದರ್, ಸರಿಗಮಪ-11 ವಿನ್ನರ್: ಚನ್ನಪ್ಪ ಆಟೋ ಓಡಿಸುತ್ತಿದ್ದಾರೆ. ತಾನು ಒಬ್ಬ ಒಳ್ಳೆ ಸಿಂಗರ್ ಆಗ್ಬೇಕು ಅಂತಾ ತುಂಬ ಕನಸು ಕಂಡಿದ್ದ. ಜೀ ಕನ್ನಡದಲ್ಲಿ ಒಂದು ಒಳ್ಳೆ ಅವಕಾಶ ಸಿಕ್ಕ ಮೇಲೆ ಚನ್ನಪ್ಪ ಅವರ ಜೀವನ ತುಂಬ ಬದಲಾವಣೆ ಕಂಡಿತು. ಸರಿಗಮಪ-11ರ ವಿನ್ನರ್ ಆಗಿ ಮತ್ತು ಲೈಟ್ ಆಗಿ ಲವ್ ಆಗಿದೆ ಅನ್ನೋ ಚಿತ್ರದಲ್ಲಿ ಹೀರೋ ಆಗಿ ಕೂಡ ಮಿಂಚಿದ್ದಾರೆ.
ಸುನಿಲ್ ಗುಜಗೊಂಡ _ ಸರಿಗಮಪ-13 : ತಮ್ಮ ಗಾಯನದ ಮೂಲಕ ಇಡೀ ಕರ್ನಾಟಕ ಜನತೆ ಮನಗೆದ್ದು ಶೋ ವಿನ್ನರ್ ಆದ ಅಪ್ಪಟ ಹಳ್ಳಿ ಪ್ರತಿಭೆ ಸುನಿಲ್ ಮೊದಲು ಹಳ್ಳಿಯಲ್ಲಿ ಏನು ಮಾಡ್ತಿದ್ರು, ಸಾಧನೆಯ ಹಿಂದಿನ ಕಥೆಯೇನು ಅನ್ನೋ ಕುತೂಹಲ ಜನರಿಗಿದೆ. ಕಲಬುರ್ಗಿ ಜಿಲ್ಲೆ ಜೇವರ್ಗಿ ತಾಲೂಕು, ನೆಲೋಗಿ ಅನ್ನೋ ಪುಟ್ಟ ಗ್ರಾಮದಲ್ಲಿ ಸುನಿಲ್ ಓದುತಿದ್ರು. ಚಿಕ್ಕ ವಯಸ್ಸಿನಿಂದಲೂ ಅವರ ತಂದೆಗೆ ತನ್ನ ಮಗ ದೊಡ್ಡ ಸಿಂಗರ್ ಆಗ್ಬೇಕು ಅನ್ನೋ ಕನಸಿತ್ತು. ತನ್ನ ಅಪ್ಪನ ಆಸೆಯಂತೆ ಸುನಿಲ್ ಈಗ ದೊಡ್ಡ ಸಿಂಗರ್ ಆಗಿದ್ದಾರೆ. ಸರಿಗಮಪ-12 ವಿನ್ನರ್ ಆಗಿ ಅವರ ಬಗ್ಗೆ ಅವಮಾನ ಮಾಡಿದವರಿಗೆ ತಕ್ಕ ಉತ್ತರ ಕೊಟ್ಟಿದ್ದಾರೆ.
