ಶ್ರೀನಗರ ಕಿಟ್ಟಿ ಹೀರೋ ಆಗಿ ನಟಿಸಿ ಮೂರು ವರ್ಷಗಳ ಮೇಲಾಗಿದೆ. 'ಸಿಲಿಕಾನ್ ಸಿಟಿ' ಚಿತ್ರದಲ್ಲಿ ಕಡೆಯದಾಗಿ ಹೀರೋ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದ ಕಿಟ್ಟಿ, ಆ ನಂತರ ಪೋಷಕ ಪಾತ್ರಗಳಿಗೆ ಸೀಮಿತವಾಗಿದ್ದರು. ಈಗ ಮೂರು ವರ್ಷಗಳ ನಂತರ 'ಗೌಳಿ' ಎಂಬ ಚಿತ್ರದಲ್ಲಿ ಹೀರೋ ಆಗಿ ರೀ ಎಂಟ್ರಿ ಕೊಡುತ್ತಿದ್ದಾರೆ.
'ಗೌಳಿ' ಚಿತ್ರದ ಚಿತ್ರೀಕರಣ ಮುಂದಿನ ತಿಂಗಳು ಅಧಿಕೃತವಾಗಿ ಪ್ರಾರಂಭವಾಗಲಿದೆ. ಶುಕ್ರವಾರ ಚಿತ್ರದ ಪೋಸ್ಟರ್ವೊಂದು ಬಿಡುಗಡೆಯಾಗಿದ್ದು, ಹಲವರ ಹುಬ್ಬೇರಿಸಿದೆ. ಸಖತ್ ರಗಡ್ ಲುಕ್ನಲ್ಲಿ ಕಿಟ್ಟಿ ಕಾಣಿಸಿಕೊಂಡಿದ್ದು, ಈ ಚಿತ್ರದ ಬಗ್ಗೆ ಕುತೂಹಲ ಕೆರಳಿಸಿದೆ. 'ಅವತಾರ ಪುರುಷ' ಮತ್ತು 'ವೀರಂ' ಚಿತ್ರಗಳಿಗಾಗಿ ಕಿಟ್ಟಿ ಉದ್ದಗಡ್ಡ ಬಿಟ್ಟಿದ್ದು, 'ಗೌಳಿ' ಚಿತ್ರದಲ್ಲೂ ಅದೇ ಲುಕ್ನಲ್ಲಿ ಮುಂದುವರೆಯಲಿದ್ದಾರೆ.
'ಗೌಳಿ' ಚಿತ್ರವನ್ನು ಸೂರ ಎನ್ನುವವರು ಕಥೆ, ಚಿತ್ರಕಥೆ ಬರೆದು ನಿರ್ದೇಶನ ಮಾಡುತ್ತಿದ್ದಾರೆ. ರಘು ಸಿಂಗಂ ಎನ್ನುವವರು ತಮ್ಮ ಸೋಹನ್ ಫಿಲಂ ಫ್ಯಾಕ್ಟರಿ ಮೂಲಕ ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ಶಶಾಂಕ್ ಶೇಷಗಿರಿ ಸಂಗೀತ ಸಂಯೋಜಿಸುತ್ತಿದ್ದು, ಮಿಕ್ಕಂತೆ ಉಳಿದ ಕಲಾವಿದರು ಹಾಗೂ ತಂತ್ರಜ್ಞರ ಆಯ್ಕೆ ಇನ್ನಷ್ಟೇ ಆಗಬೇಕಿದೆ.
ಕಿಟ್ಟಿ ಈಗಾಗಲೇ 'ಗರುಡ', 'ಅವತಾರ್ ಪುರುಷ' ಮತ್ತು 'ವೀರಂ' ಚಿತ್ರಗಳಲ್ಲಿ ನಟಿಸಿದ್ದು, ಈ ಚಿತ್ರಗಳು ಇದೇ ವರ್ಷ ಬಿಡುಗಡೆಯಾಗಲಿವೆ.
