ಸಾಮಾನ್ಯವಾಗಿ ಟೆಕ್ಕಿಗಳು ಅಂದರೆ ನಮಗೆ ತಕ್ಷಣ ಹೊಳೆಯೋದು ವಾರದ 5 ದಿನ ಕೆಲ್ಸ, ಮತ್ತೆರಡು ದಿನ ಭರ್ಜರಿ ಪಾರ್ಟಿ. ಆದರೆ ಇಲ್ಲೊಂದು ಟೆಕ್ಕಿಗಳ ತಂಡ ವಾರ ಪೂರ್ತಿ ಆಫೀಸಿನಲ್ಲಿ ಕೆಲಸ, ವಾರಂತ್ಯದಲ್ಲಿ ಸಿನಿಮಾ ಅಂತ ತಲೆಕೆಡಿಸಿಕೊಂಡಿದ್ದಾರೆ. ಕೊನೆಗೂ ಎರಡು ವರ್ಷಗಳಿಂದ ಇವರು ಮಾಡುತ್ತಿದ್ದ ಸಿನಿಮಾ ಈಗ ಬಿಡುಗಡೆಗೆ ಸಿದ್ಧವಾಗಿದೆ.
ನಿರಂಜನ್ ಹೆಚ್.ಹೆಚ್ ಎಂಬುವವರು ‘ಇಂಜೆಕ್ಟ್ 0.7’ ಎಂಬ ಸಿನಿಮಾ ತಯಾರಿಸಿದ್ದು ನಿನ್ನೆ ಚಿತ್ರದ ಆಡಿಯೋ ಲಾಂಚ್ ಮಾಡಲಾಗಿದೆ. ಈಗಾಗಲೇ ಐಟಿ ಬಿಟಿಯ ಸಾಕಷ್ಟು ಮಂದಿ ಸಿನಿಮಾ ಸೆಳೆತಕ್ಕೆ ಸಿಕ್ಕಿದ್ದು ಅಂಥವರ ಸಾಲಿಗೆ ನಿರಂಜನ್ ಸೇರಿದ್ದಾರೆ. ಕಥೆ, ಚಿತ್ರಕಥೆ, ನಿರ್ದೇಶನ ಮಾಡುವುದರ ಜೊತೆಗೆ ನಿರಂಜನ್ ನಾಯಕನಾಗಿ ಕೂಡಾ ಚಿತ್ರದಲ್ಲಿ ಬಣ್ಣ ಹಚ್ಚಿದ್ದಾರೆ. ಜೊತೆಗೆ ಚಿತ್ರದಲ್ಲಿ ಡಬಲ್ ರೋಲ್ನಲ್ಲಿ ನಟಿಸಿದ್ದಾರೆ. ಇದೊಂದು ಸಸ್ಪೆನ್ಸ್ ಥ್ರಿಲ್ಲರ್, ಮರ್ಡರ್ ಮಿಸ್ಟರಿ ಕಥೆ ಹೊಂದಿದ್ದು ‘ಸತ್ತ ನಂತರ ಜೀವನ ಹೇಗಿರುತ್ತದೆ ಎಂಬುದನ್ನು ತಿಳಿಯಲು ವೈದ್ಯೆಯೊಬ್ಬಳು ಆತ್ಮಹತ್ಯೆ ಮಾಡಿಕೊಳ್ಳುತ್ತಾಳೆ. ಆದರೆ ಆಕೆ ನಿಜವಾಗಿಯೂ ಆತ್ಮಹತ್ಯೆ ಮಾಡಿಕೊಂಡಿದ್ದಾಳೋ ಅಥವಾ ಕೊಲೆ ಆಗಿದೆಯೋ ಎಂಬುದು ಕಥೆಯ ಮುಖ್ಯ ತಿರುಳು. ಸಿನಿಮಾದಲ್ಲಿ ಡಾಕ್ಟರ್ ಪಾತ್ರದಲ್ಲಿ ಪೂಜಾ ಗೌಡ ನಟಿಸಿದ್ದಾರೆ. ಚಿತ್ರದಲ್ಲಿ ನಾಯಕ-ನಾಯಕಿ ಅಂತ ಯಾರೂ ಇಲ್ಲ. ಚಿತ್ರದ ಕಥೆಯೇ ಪ್ರಮುಖವಾಗಿದ್ದು, ಸುಮಾರು ನೂರು ಕಲಾವಿದರು ಚಿತ್ರದಲ್ಲಿ ನಟಿಸಿದ್ದಾರೆ ಎಂದು ನಿರ್ದೇಶಕ ನಿರಂಜನ್ ಹೇಳಿದ್ದಾರೆ.
ಇನ್ನು ಚಿತ್ರಕ್ಕೆ ಶ್ರೀಧರ್ ಕಶ್ಯಪ್ ಸಂಗೀತ ನೀಡಿದ್ದು ಆನಂದ್ ಆಡಿಯೋ ಚಿತ್ರದ ಆಡಿಯೋ ಹಕ್ಕನ್ನು ಖರೀದಿಸಿದೆ. ಬೆಂಗಳೂರು, ಶಿವಮೊಗ್ಗ ಸುತ್ತಮುತ್ತ 25 ದಿನಗಳು ಶೂಟಿಂಗ್ ಮಾಡಲಾಗಿದೆ. ಸಿನಿಮಾಗಾಗಿ 25 ಲಕ್ಷ ರೂಪಾಯಿ ಖರ್ಚು ಮಾಡಲಾಗಿದೆ. ಆರ್ಥಿಕ ಕೊರತೆಯಿಂದ ನಿರಂಜನ್ ಸಿನಿಮಾ ಆಸೆಯನ್ನು ಕೈ ಬಿಟ್ಟಿದ್ದರಂತೆ. ಅದಕ್ಕಾಗಿ ಜಪಾನಿನಲ್ಲಿ 2.5 ಲಕ್ಷ ರೂಪಾಯಿ ಸಂಬಳಕ್ಕಾಗಿ ಕೆಲಸಕ್ಕೆ ಸೇರಿದ್ದಾರೆ. ಆದರೆ ಸಿನಿಮಾ ಮೋಹದಿಂದ ಮತ್ತೆ ಅಲ್ಲಿ ಕೆಲಸ ಬಿಟ್ಟು ಬೆಂಗಳೂರಿನಲ್ಲಿ ಕೆಲಸಕ್ಕೆ ಸೇರಿದ್ದಾರೆ. ಸಿನಿಮಾ ಬಿಡುಗಡೆ ಮಾಡಲು ಪತ್ನಿ ಪವಿತ್ರಾ ಗೌಡ ನಿರಂಜನ್ ಬೆನ್ನಿಗೆ ನಿಂತಿದ್ದಾರೆ. ಅಕ್ಟೋಬರ್ 11 ರಂದು ಸುಮಾರು 40 ಚಿತ್ರಮಂದಿರಗಳಲ್ಲಿ ಸಿನಿಮಾ ಮಾಡಲು ನಿರಂಜನ್ ರೆಡಿಯಾಗಿದ್ದಾರೆ.
