ರಮೇಶ್ ಅರವಿಂದ್ ಅವರ 101 ನೇ ಸಿನಿಮಾ 'ಶಿವಾಜಿ ಸುರತ್ಕಲ್' ಫೆಬ್ರವರಿ 21 ರಂದು ಬಿಡುಗಡೆಯಾಗಿ ಮೂರು ವಾರಗಳ ಕಾಲ ಯಶಸ್ವಿ ಪ್ರದರ್ಶನ ಕಂಡಿತ್ತು. ಈ ಚಿತ್ರಕ್ಕೆ ಸಿನಿಪ್ರಿಯರಿಂದ ಉತ್ತಮ ಪ್ರತಿಕ್ರಿಯೆ ಕೂಡಾ ವ್ಯಕ್ತವಾಗಿತ್ತು.
ಆದರೆ ಕೆಲವು ದಿನಗಳ ನಂತರ ಕೊರೊನಾ ಭಯ ಆರಂಭವಾದ ಕಾರಣ ಥಿಯೇಟರ್ಗಳನ್ನು ಮುಚ್ಚಬೇಕಾಗಿ ಬಂತು. ಇದೀಗ ಸಂತೋಷದ ವಿಚಾರವೆಂದರೆ 'ಶಿವಾಜಿ ಸುರತ್ಕಲ್' ಹಿಂದಿಗೆ ರೀಮೇಕ್ ಆಗಲಿದ್ದು ಬಿ 4 ಮೂವೀಸ್ ಸಂಸ್ಥೆ ಈ ರೀಮೇಕ್ ಹಕ್ಕನ್ನು ಪಡೆದುಕೊಂಡಿದೆ. ಕೆಲವೇ ದಿನಗಳಲ್ಲಿ ಈ ಚಿತ್ರವನ್ನು ಹಿಂದಿಯಲ್ಲಿ ಯಾವ ನಿರ್ದೇಶಕ, ಯಾವ ನಟ ಮಾಡಲಿದ್ದಾರೆ ಎಂಬ ವಿಚಾರ ತಿಳಿದುಬರಲಿದೆ.
'ಶಿವಾಜಿ ಸುರತ್ಕಲ್' ಚಿತ್ರಕ್ಕೆ ಅಭಿಜಿತ್ ರಮೇಶ್ ಹಾಗೂ ಆಕಾಶ್ ಶ್ರೀವತ್ಸ ಕಥೆ ಬರೆದಿದ್ದಾರೆ. ಆಕಾಶ್ ಅವರೇ ಚಿತ್ರಕ್ಕೆ ಆ್ಯಕ್ಷನ್ ಕಟ್ ಕೂಡಾ ಹೇಳಿದ್ದಾರೆ. ಅಂಜನಾದ್ರಿ ಸಿನಿ ಕ್ರಿಯೇಷನ್ಸ್ ಬ್ಯಾನರ್ ಮೂಲಕ ಅನೂಪ್ ಗೌಡ ಹಾಗೂ ರೇಖಾ ಕೆ.ಎನ್. ಈ ಚಿತ್ರವನ್ನು ನಿರ್ಮಿಸಿದ್ದಾರೆ.
ಚಿತ್ರ ಬಿಡುಗಡೆಯಾಗುವ ಸಮಯದಲ್ಲಿ ಆಕಾಶ್ ಹೇಳಿದ್ದ ಪ್ರಕಾರ ಸದ್ಯಕ್ಕೆ ಚಿತ್ರದ ಸೀಕ್ವೆಲ್ಗೆ ಎಲ್ಲಾ ತಯಾರಿ ನಡೆಯುತ್ತಿದೆ. ಆಕಾಶ್ ಶ್ರೀವತ್ಸ ಹಾಗೂ ರಮೇಶ್ ಅರವಿಂದ್ ಇಬ್ಬರೂ ವಿಡಿಯೋ ಕಾಲ್ ಮೂಲಕ ಚಿತ್ರದ ಬಗ್ಗೆ ಚರ್ಚಿಸುತ್ತಿದ್ದಾರಂತೆ. ಕೆಲವೇ ದಿನಗಳಲ್ಲಿ 'ಶಿವಾಜಿ ಸುರತ್ಕಲ್- 2' ಚಿತ್ರೀಕರಣ ಆರಂಭವಾಗುವ ಸಾಧ್ಯತೆಗಳಿವೆ ಎನ್ನಲಾಗಿದೆ.
