ಡಬ್ಬಿಂಗ್ ಧಾರಾವಾಹಿಗಳ ನಂತರ ಇದೀಗ ಕಿರುತೆರೆಯಲ್ಲಿ ಡಬ್ಬಿಂಗ್ ಸಿನಿಮಾಗಳ ಪರ್ವ ಆರಂಭವಾಗಿದೆ. ಪ್ರತಿ ವಾರ ಒಂದೊಂದು ಡಬ್ಬಿಂಗ್ ಸಿನಿಮಾ ಪ್ರಸಾರವಾಗುತ್ತಿದೆ. ಸೆಪ್ಟೆಂಬರ್ 26 ಶನಿವಾರ ಉದಯ ಟಿವಿಯಲ್ಲಿ ಮತ್ತೊಂದು ಡಬ್ಬಿಂಗ್ ಸಿನಿಮಾ ಪ್ರಸಾರವಾಗುತ್ತಿದೆ.
2018 ರಲ್ಲಿ ಬಿಡುಗಡೆಯಾದ ತೆಲುಗು ಸಿನಿಮಾ 'ಶೈಲಜಾರೆಡ್ಡಿ ಅಲ್ಲುಡು' ಶನಿವಾರ ಸಂಜೆ 6.30ಕ್ಕೆ 'ಶೈಲಜಾಗೌಡರ ಅಳಿಯಂದ್ರು' ಹೆಸರಿನಲ್ಲಿ ಉದಯ ಟಿವಿಯಲ್ಲಿ ಪ್ರಸಾರವಾಗುತ್ತಿದೆ. ಇದೊಂದು ರೊಮ್ಯಾಂಟಿಕ್, ಕಾಮಿಡಿ ಚಿತ್ರವಾಗಿದ್ದು ಚಿತ್ರದಲ್ಲಿ ಶೈಲಜಾರೆಡ್ಡಿ ಆಗಿ ರಮ್ಯಕೃಷ್ಣನ್, ಅಳಿಯ ಆಗಿ ನಾಗಚೈತನ್ಯ ಹಾಗೂ ಪುತ್ರಿಯಾಗಿ ಅನು ಎಮ್ಯಾನುಯಲ್ ನಟಿಸಿದ್ದಾರೆ. ಇವರೊಂದಿಗೆ ನರೇಶ್, ಮುರಳಿ ಶರ್ಮ, ವೆನ್ನಿಲ ಕಿಶೋರ್ ಹಾಗೂ ಇನ್ನಿತರರು ನಟಿಸಿದ್ದಾರೆ.
ಚಿತ್ರವನ್ನು ಸಿತಾರ ಎಂಟರ್ನ್ಮೈಂಟ್ ಬ್ಯಾನರ್ ಅಡಿ ಎಸ್. ರಾಧಾಕೃಷ್ಣ, ನಾಗವಂಶಿ.ಎಸ್. ಪಿಡಿವಿ ಪ್ರಸಾದ್ ನಿರ್ಮಿಸಿದ್ದರೆ ಮಾರುತಿ ದಾಸರಿ ಕಥೆ ಬರೆದು ನಿರ್ದೇಶಿಸಿದ್ದಾರೆ. ಚಿತ್ರದ ಹಾಡುಗಳಿಗೆ ಗೋಜಿ ಸುಂದರ್ ಸಂಗೀತ ಸಂಯೋಜಿಸಿದ್ದು, ನಿಜಾರ್ ಶಫಿ ಛಾಯಾಗ್ರಹಣ ಮತ್ತು ಕೋಟಗಿರಿ ವೆಂಕಟೇಶ್ವರ ರಾವ್ ಸಂಕಲನವಿದೆ.
ಚಿತ್ರದ ನಾಯಕ ಚೈತು, ನಾಯಕಿ ಅನುಗೌಡ ಇಬ್ಬರೂ ಪ್ರೀತಿಸುತ್ತಾರೆ. ಆದರೆ ಈ ಪ್ರೀತಿ ಹಾಗೂ ಮದುವೆಗೆ ಅನು ತಾಯಿ ಶೈಲಜಾ ಗೌಡ ಒಪ್ಪುವುದಿಲ್ಲ. ಆಕೆಯನ್ನು ಒಲಿಸಲು ಚೈತು ಏನೆಲ್ಲಾ ಸರ್ಕಸ್ ಮಾಡುತ್ತಾನೆ...?ಕೊನೆಗೆ ಶೈಲಜಾ ಗೌಡ, ಚೈತುವನ್ನು ಅಳಿಯ ಎಂದು ಒಪ್ಪಿಕೊಳ್ಳುತ್ತಾರಾ..? ಎಂಬುದೇ ಚಿತ್ರದ ಕಥೆ.
