ಮುಂಬೈ : ಸೈರಾಟ್ ಸುಂದರಿ ರಿಂಕು ರಾಜ್ಗುರು HSC (ದ್ವಿತೀಯ ಪಿಯುಸಿ) ಪರೀಕ್ಷೆಯಲ್ಲಿ ಅತ್ಯುತ್ತಮ ಸಾಧನೆ ಮಾಡಿದ್ದಾರೆ. ಪ್ರತಿಶತ 82 ಅಂಕ ಬಾಚಿಕೊಂಡು ಪ್ರಥಮ ದರ್ಜೆಯಲ್ಲಿ ತೇರ್ಗಡೆಯಾಗಿದ್ದಾರೆ.
ಮರಾಠಿಯ ಬ್ಲಾಕ್ ಬಸ್ಟರ್ 'ಸೈರಾಟ್' ಸಿನಿಮಾ ಮೂಲಕ ನ್ಯಾಷನಲ್ ಸ್ಟಾರ್ ಆಗಿರುವ ರಿಂಕು, ಓದಿನಲ್ಲಿ ಹಿಂದೆ ಬಿದ್ದಿಲ್ಲ. ಅಭಿನಯದ ಜತೆಗೆ ವಿದ್ಯಾಭ್ಯಾಸಕ್ಕೆ ಪ್ರಾಮುಖ್ಯತೆ ನೀಡುತ್ತ ಬಂದಿದ್ದಾರೆ. ಜೈ ತುಳಜಾ ಭವಾನಿ ಕಲಾ ಮತ್ತು ವಿಜ್ಞಾನ ಕಾಲೇಜಿನಲ್ಲಿ ಬಾಹ್ಯ ವಿದ್ಯಾರ್ಥಿಯಾಗಿ ಪರೀಕ್ಷೆಗೆ ಹಾಜರಾಗಿದ್ದ ರಿಂಕು, ಭೌಗೋಳ ಶಾಸ್ತ್ರದಲ್ಲಿ ಅತೀ ಹೆಚ್ಚು ಅಂಕ ಪಡೆದಿದ್ದಾರೆ. ಇನ್ನುಳಿದಂತೆ ಇಂಗ್ಲಿಷ್- 54, ಮರಾಠಿ - 83, ರಾಜ್ಯಶಾಸ್ತ್ರ-77, ಅರ್ಥಶಾಸ್ತ್ರ-77 ಹಾಗೂ ಪರಿಸರ ಅಧ್ಯಯನದಲ್ಲಿ 49 ಅಂಕಗಳನ್ನು ತಮ್ಮದಾಗಿಸಿಕೊಂಡಿದ್ದಾರೆ.
ಎಸ್ಎಸ್ಸಿ ಓದುತ್ತಿರುವಾಗಲೇ ಸೈರಾಟ್ ಚಿತ್ರದಿಂದ ಅವಕಾಶ ಈಕೆಯನ್ನು ಹುಡುಕಿಕೊಂಡು ಬಂದಿತ್ತು. ಚೊಚ್ಚಲ ಚಿತ್ರದಲ್ಲಿಯೇ ಅದ್ಭುತವಾಗಿ ನಟಿಸಿ, ಚಿತ್ರದ ಗೆಲುವಿಗೆ ಕಾರಣವಾಗಿದ್ದರು. ಅಭಿನಯ ಹಾಗೂ ತರಗತಿಗಳನ್ನು ಸರಿದೂಗಿಸಿಕೊಂಡು ಹೋಗಿದ್ದ ಅರ್ಚಿ, 2017 ರಲ್ಲಿ ಪ್ರಕಟಗೊಂಡಿದ್ದ ಎಸ್ಎಸ್ಸಿ ಪರೀಕ್ಷೆಯಲ್ಲಿ 66.40 ರಷ್ಟು ಸಾಧನೆ ಮಾಡಿದ್ದರು. ಇದೀಗ ಮತ್ತೊಮ್ಮೆ ನಾನು ಬುದ್ಧಿವಂತೆ ಎಂಬುದನ್ನು ಅಭಿಮಾನಿಗಳಿಗೆ ತೋರಿಸಿದ್ದಾರೆ.
ಇನ್ನು ಸೈರಾಟ್ ಚಿತ್ರದ ಕನ್ನಡ ರಿಮೇಕ್ ಮನಸ್ಸು ಮಲ್ಲಿಗೆಯಲ್ಲೂ ರಿಂಕು ರಾಜ್ಗುರು ನಟಿಸಿ, ಕನ್ನಡಿಗರು ಮೆಚ್ಚುಗೆ ಪಡೆದಿದ್ದಾರೆ. ಕನ್ನಡ ಸಿನಿರಸಿಕರಿಗೂ ಈಕೆಯ ಮುಖ ಪರಿಚಿತ. ಇವರು ನಟಿಸಿದ್ದ ಮರಾಠಿಯ ಕಾಗರ್ ಚಿತ್ರ ಕಳೆದ ತಿಂಗಳವಷ್ಟೆ ತೆರೆ ಕಂಡು ಅದ್ಭುತ ಪ್ರದರ್ಶನ ಕಾಣುತ್ತಿದೆ.
