ರೋರಿಂಗ್ ಸ್ಟಾರ್ ಶ್ರೀಮುರಳಿ 'ಭರಾಟೆ' ಚಿತ್ರದ ಪ್ರಮೋಷನ್ನಲ್ಲಿ ಬಹಳ ಬ್ಯುಸಿ ಆಗಿದ್ದಾರೆ. ಅಕ್ಟೋಬರ್ 18ಕ್ಕೆ 'ಭರಾಟೆ' ಚಿತ್ರ ರಿಲೀಸ್ ಆಗಲಿದ್ದು, ನವೆಂಬರ್ 1ಕ್ಕೆ ಮುರಳಿ ಮುಂದಿನ ಸಿನಿಮಾ 'ಮದಗಜ' ಸೆಟ್ಟೇರಲಿದೆ. 15 ರಿಂದ ಚಿತ್ರದ ಶೂಟಿಂಗ್ ಆರಂಭವಾಗಲಿದೆ ಎಂದು ಚಿತ್ರದ ನಿರ್ದೇಶಕ ಮಹೇಶ್ ತಿಳಿಸಿದ್ದಾರೆ.
ಶ್ರೀ ಮುರಳಿ ಈ ಸಿನಿಮಾದಲ್ಲಿ ಬಹಳ ವಿಭಿನ್ನ ಲುಕ್ನಲ್ಲಿ ಕಾಣಿಸಿಕೊಳ್ಳಲಿದ್ದು ಈ ಪಾತ್ರಕ್ಕಾಗಿ ಈಗಾಗಲೇ ಎಲ್ಲಾ ತಯಾರಿಯಲ್ಲಿದ್ದಾರೆ ಎಂದು ರೋರಿಂಗ್ ಸ್ಟಾರ್ ಪಾತ್ರದ ಬಗ್ಗೆ ಮಾಹಿತಿ ನೀಡಿದ್ದಾರೆ ನಿರ್ದೇಶಕ ಮಹೇಶ್ ಕುಮಾರ್. ಕನ್ನಡ ರಾಜ್ಯೋತ್ಸವದಂದು 'ಮದಗಜ' ಸೆಟ್ಟೇರಲಿದೆ. ಈ ಚಿತ್ರದಲ್ಲಿ ಮುರಳಿ ಅವರನ್ನು ಬಹಳ ಸ್ಟೈಲಿಶ್ ಆಗಿ ತೋರಿಸಲು ಪ್ಲ್ಯಾನ್ ಮಾಡಿದ್ದೇನೆ. ಭಾರತದ 50 ಶ್ರೀಮಂತ ವ್ಯಕ್ತಿಗಳ ಪಟ್ಟಿಯಲ್ಲಿರುವ ವ್ಯಕ್ತಿಯಾಗಿ ಮುರಳಿ ಈ ಚಿತ್ರದಲ್ಲಿ ನಟಿಸಿದ್ದಾರೆ. ಚಿತ್ರದ ಆರಂಭದಿಂದ ಕೊನೆವರೆಗೂ ಇದುವರೆಗೂ ಮುರಳಿಯನ್ನು ಯಾರೂ ತೋರಿಸದ ರೀತಿಯಲ್ಲಿ ನಾನು ಈ ಚಿತ್ರದಲ್ಲಿ ತೋರಿಸಲಿದ್ದೇನೆ. ಇದಕ್ಕೆ ಮುರಳಿ ಕೂಡಾ ನನಗೆ ಸಪೋರ್ಟ್ ಮಾಡುತ್ತಿದ್ದಾರೆ ಎಂದು ಮಹೇಶ್ ಹೇಳಿದ್ದಾರೆ.
ಚಿತ್ರಕ್ಕಾಗಿ ಈಗಾಗಲೇ ಸ್ಲೊವೆನಿಯಾ, ಸ್ವಿಡ್ಜರ್ಲೆಂಡ್ ಹಾಗೂ ಫ್ರಾನ್ಸ್ನಲ್ಲಿ ಲೊಕೇಶನ್ ನೋಡಿ ಬಂದಿದ್ದೇವೆ. ಸುಮಾರು 35-40 ದಿನಗಳ ಕಾಲ ಶೂಟಿಂಗ್ ನಡೆಸಲು ಪ್ಲ್ಯಾನ್ ಮಾಡಿದ್ದೇವೆ. ಅಲ್ಲದೆ ಸ್ವಿಜರ್ಲೆಂಡಿನಲ್ಲಿ ಶ್ರೀ ಮುರಳಿ ಕ್ಯಾರೆಕ್ಟರ್ ರಿವೀಲ್ ಆಗಲಿದೆ. ಅಕ್ಟೋಬರ್ 25ಕ್ಕೆ ಫೋಟೋಶೂಟ್ ಮಾಡಲಿದ್ದೇವೆ. 'ಭರಾಟೆ' ಚಿತ್ರದ ಬಿಡುಗಡೆಗೂ ಮುನ್ನವೇ 'ಮದಗಜ' ಮೋಷನ್ ಪೋಸ್ಟರ್ ರಿಲೀಸ್ ಮಾಡಲು ಪ್ಲ್ಯಾನ್ ಮಾಡಿದ್ದೇವೆ. ಈಗಾಗಲೇ ಚಿತ್ರದ ನಾಯಕಿ ಕೂಡಾ ಫೈನಲ್ ಆಗಿದ್ದು , ಕೆಲವೇ ದಿನಗಳಲ್ಲಿ ಎಲ್ಲಾ ಮಾಹಿತಿಯನ್ನು ರಿವೀಲ್ ಮಾಡುವುದಾಗಿ ಮಹೇಶ್ ಕುಮಾರ್ ತಿಳಿಸಿದರು.
