ಕನ್ನಡ ಸಿನಿಮಾಗಳಿಗೆ ಡಿಜಿಟಲ್ ಹಕ್ಕುಗಳ ಮಾರಾಟದ ಹೊಸ ಪ್ಲಾಟ್ಫಾರ್ಮ್ ಉದ್ಭವ ಆಗಿರುವುದರಿಂದ ಮುಂದಿನ ದಿನಗಳಲ್ಲಿ ಈಗಾಗಲೇ ಬಿಡುಗಡೆ ಆಗಿರುವ ಮತ್ತು ಡಿಜಿಟಲ್ ಹಕ್ಕು ನೀಡದೆ ಇರುವ ಸಿನಿಮಾಗಳಿಗೆ ಆದಾಯ ಗಳಿಸುವ ಒಂದು ಹೊಸ ಮಾರ್ಗ ಸಿಕ್ಕಿರುವುದಂತೂ ನಿಜ.
ಈಗಾಗಲೇ 250 ಕನ್ನಡ ಸಿನಿಮಾಗಳ ಪಟ್ಟಿ ತಯಾರಾಗಿದೆ. ಈ ಸಿನಿಮಾ ನಿರ್ಮಾಪಕರು ವಿವಿಧ ಹಕ್ಕುಗಳನ್ನು ಟಿವಿ ವಾಹಿನಿಗೆ ನೀಡಿ, ಡಬ್ಬಿಂಗ್ ಹಕ್ಕುಗಳನ್ನೂ ಮಾರಿದ್ದರೂ ಕೂಡಾ ‘ನೆಟ್ಫ್ಲಿಕ್ಸ್, ಅಮೆಜಾನ್, ಜಿಯೋ ಅಂತಹ ಡಿಜಿಟಲ್ ವ್ಯಾಪಾರಸ್ಥರು ಅವುಗಳ ಹಕ್ಕುಗಳನ್ನು ಖರೀದಿಸಲು ಸಜ್ಜಾಗಿದ್ದಾರೆ.
ಕನ್ನಡದ 250 ಸಿನಿಮಾಗಳನ್ನು ಎರಡು ವಿಭಾಗಗಳಾಗಿ ವಿಂಗಡಿಸಿ ವಾಣಿಜ್ಯ ಮಂಡಳಿ ವತಿಯಿಂದ ಡಿಜಿಟಲ್ ಹಕ್ಕು ಪಡೆಯುವವರ ಮುಂದೆ ಇಡಲಾಗುವುದು. ಇದರಿಂದ ಕನ್ನಡ ಸಿನಿಮಾ ನಿರ್ಮಾಪಕರಿಗೆ ಎಲ್ಲಾ ರೀತಿಯಲ್ಲಿ ಹಕ್ಕುಗಳನ್ನು ಕೊಟ್ಟಿದ್ದರೂ ಈ ಡಿಜಿಟಲ್ ಪ್ಲಾಟ್ಫಾರ್ಮ್ ಒಂದು ರೀತಿ ಸಮಾಧಾನಕರ ಬಹುಮಾನ ಇದ್ದಂತೆ. ಈಗ ಕಡಿಮೆ ಬಜೆಟಿನ ಸಿನಿಮಾಗಳಿಗೆ 25 ಲಕ್ಷದಿಂದ ಡಿಜಿಟಲ್ ಹಕ್ಕು ಸಂದಾಯ ಆಗುತ್ತಿದೆ. ಕೆಲವು ಸಿನಿಮಾಗಳಿಗೆ ಕೋಟ್ಯಂತರ ರೂಪಾಯಿ ನೀಡಲಾಗಿದೆ. ಡಿಜಿಟಲ್ ವ್ಯಾಪಾರಸ್ಥರಿಗೆ ಬೇಕಾಗಿರುವುದು ಒಳ್ಳೆಯ ಸಾಫ್ಟ್ವೇರ್. ಅದು ಅವರಿಗೆ ಸಿನಿಮಾಗಳ ಮೂಲಕ ಸಿಕ್ಕುವುದು ದೊಡ್ಡ ಅನುಕೂಲ.
ಡಿಜಿಟಲ್ ಪ್ಲಾಟ್ಫಾರ್ಮ್ ವಾಹಿನಿಗಳಂತೆ ನಿಗದಿತ ದಿನಾಂಕದಲ್ಲಿ ಆಯಾ ಚಿತ್ರಗಳ ಪ್ರಸಾರ ಮಾಡಲಾಗುತ್ತದೆ. ನೀಡಿದ ಮೊತ್ತಕ್ಕೆ ನಿರ್ಮಾಪಕರು ಜಾಹೀರಾತು ಮುಖಾಂತರ ಹಣ ಸಂಪಾದಿಸುತ್ತಾರೆ. ಈ ಕಾರ್ಯ ಕರ್ನಾಟಕ ಚಲನಚಿತ್ರ ವಾಣಿಜ್ಯ ಮಂಡಳಿ ವತಿಯಿಂದ ಆಗಲಿದೆ ಎಂದು ಹಿರಿಯ ನಿರ್ಮಾಪಕ, ವಾಣಿಜ್ಯ ಮಂಡಳಿಯಲ್ಲಿ ಅನೇಕ ಹುದ್ದೆಗಳನ್ನು ನಿರ್ವಹಿಸಿದ ಉಮೇಶ್ ಬಣಕರ್ ಹೇಳಿದ್ದಾರೆ.
