ಮುಂಬೈ : ನಟಿ, ನಿರ್ಮಾಪಕಿ ಪ್ರಿಯಾಂಕಾ ಚೋಪ್ರಾ ಜೊನಾಸ್ ದಿ ಮ್ಯಾಟ್ರಿಕ್ಸ್ 4 ಚಿತ್ರದ ಶೂಟಿಂಗ್ ಪ್ರಾರಂಭಿಸಿದ್ದಾರೆ. ವಾರ್ನರ್ ಬ್ರದರ್ಸ್ ಮತ್ತು ವಿಲೇಜ್ ರೋಡ್ ಶೋ ನಿರ್ಮಿಸುತ್ತಿರುವ ಈ ಚಿತ್ರವನ್ನು ಸಿರೀಸ್ ಕೊ - ಕ್ರಿಯೇಟರ್ ಲಾನಾ ವಾಚೋವ್ಸ್ಕಿ ನಿರ್ದೇಶಿಸುತ್ತಿದ್ದಾರೆ. ಈ ಹಿಂದೆ ಘೋಷಿಸಿದಂತೆ ಕೀನು ರೀವ್ಸ್, ಕ್ಯಾರಿ - ಆನ್ ಮಾಸ್, ಯಾಹ್ಯಾ ಅಬ್ದುಲ್-ಮಾತೀನ್ II ಮತ್ತು ನೀಲ್ ಪ್ಯಾಟ್ರಿಕ್ ಹ್ಯಾರಿಸ್ ಚಿತ್ರ ತಂಡದಲ್ಲಿ ಸೇರಿಕೊಂಡಿದ್ದಾರೆ. ಚಿತ್ರದಲ್ಲಿ ಪ್ರಿಯಾಂಕ ಚೋಪ್ರಾ ಪಾತ್ರದ ಬಗ್ಗೆ ಇನ್ನೂ ಸರಿಯಾದ ಮಾಹಿತಿ ದೊರೆತಿಲ್ಲ.
ಕೋವಿಡ್ ಹಿನ್ನೆಲೆ ದಿ ಮ್ಯಾಟ್ರಿಕ್ಸ್ 4 ರ ಶೂಟಿಂಗ್ ಮಾರ್ಚ್ ಮಧ್ಯದಲ್ಲಿ ಸ್ಥಗಿತಗೊಂಡಿತ್ತು. ಅಷ್ಟೊತ್ತಿಗೆ ತಂಡವು ಸುಮಾರು ಒಂದು ತಿಂಗಳ ಕಾಲ ಶೂಟಿಂಗ್ ಮುಗಿಸಿತ್ತು. ಲಾಕ್ಡೌನ್ ಘೋಷಿಸಿದ್ದರಿಂದ ಚಿತ್ರದ ಹೆಚ್ಚಿನ ಕೆಲಸಗಳು ಬಾಕಿ ಉಳಿದಿವೆ. ಹೀಗಾಗಿ ಬಿಡುಗಡೆ ದಿನಾಂಕವನ್ನು 2021 ರ ಆರಂಭದಿಂದ 2022 ರ ಏಪ್ರಿಲ್ಗೆ ಮುಂದೂಡಲಾಗಿದೆ.
ವರದಿಗಳ ಪ್ರಕಾರ, ಉತ್ತರ ಕ್ಯಾಲಿಫೋರ್ನಿಯಾದಲ್ಲಿ ಚಿತ್ರೀಕರಣ ಪ್ರಾರಂಭವಾಗುವ ಮೊದಲು ದಿ ಮ್ಯಾಟ್ರಿಕ್ಸ್ 4 ನ ಫೈಟ್ ಸೀನ್ಗಾಗಿ ಚಿತ್ರ ತಂಡ ಕಠಿಣ ತರಬೇತಿ ಪಡೆದಿದೆ. ಕಳೆದ ಆಗಸ್ಟ್ನಲ್ಲಿ ವಾರ್ನರ್ ಬ್ರದರ್ಸ್ ಮ್ಯಾಟ್ರಿಕ್ಸ್ 4 ಚಿತ್ರದ ಕೆಲಸ ನಡೆಯುತ್ತಿದೆ ಎಂದು ಘೋಷಿಸಿತ್ತು. ಬಳಿಕ ರೀವ್ಸ್ ಮತ್ತು ಮಾಸ್ ತಂಡದೊಂದಿಗೆ ಸೇರಿಕೊಂಡಿದ್ದಾರೆ. ಲಾನಾ ವಾಚೋವ್ಸ್ಕಿ ಬರೆದು, ನಿರ್ದೇಶನ ಮಾಡುತ್ತಿದ್ದಾರೆ.
