ಕೆಜಿಎಫ್ 2 ಚಿತ್ರದ ಬಿಡುಗಡೆಯ ದಿನಾಂಕ ಘೋಷಣೆಯಾದ ಬಳಿಕ ಚಿತ್ರ ತಂಡದಿಂದ ಚಿತ್ರದ ಬಗ್ಗೆ ಯಾವುದೇ ಅಪ್‍ಡೇಟ್‍ಗಳು ಈವರೆಗೂ ಸಿಕ್ಕಿಲ್ಲ. ಆದರೆ, ಚಿತ್ರದ ವಿಷಯವಾಗಿ ಒಂದಿಲ್ಲೊಂದು ಸುದ್ದಿಗಳು ಆಗಾಗ ಕೇಳಿಬರುತ್ತಲೇ ಇರುತ್ತವೆ. ಹೊಸ ಸುದ್ದಿಯ ಪ್ರಕಾರ, ಐಟಂ ಡ್ಯಾನ್ಸ್ಗಳಿಗೆ ಫೇಮಸ್ ಆಗಿರುವ ನೋರಾ ಫತೇಹಿ ಚಿತ್ರದ ಸ್ಪೆಷಲ್ ಹಾಡಿಗೊಂದು ಹೆಜ್ಜೆ ಹಾಕಿದ್ದಾರೆನ್ನುವ ವಿಚಾರ ಹರಿದಾಡುತ್ತಿದೆ.
ಕೆಜಿಎಫ್ 1 ಚಿತ್ರದಲ್ಲಿ 'ಜೋಕೆ ನಾನು ಬಳ್ಳಿಯ ಮಿಂಚು ...' ಹಾಡಿಗೆ ಯಶ್ ಜತೆಗೆ ತಮನ್ನಾ ಭಾಟಿಯಾ ಹೆಜ್ಜೆ ಹಾಕಿದ್ದು ನೆನಪಿರಬಹುದು. ಕೊನೆಗೆ ಚಿತ್ರವು ಬೇರೆ ಭಾಷೆಗಳಿಗೆ ಡಬ್ ಆಗಿ ಬಿಡುಗಡೆಯಾಗುತ್ತಿದೆ ಎಂಬ ಸುದ್ದಿ ಬಂದಾಗ, ಮೌನಿ ರಾಯ್ ಅವರನ್ನು ಕರೆಸಿ ಐಟಂ ಡ್ಯಾನ್ಸ್ ಮಾಡಿಸಲಾಯಿತು. ಈ ಹಾಡಿನಲ್ಲಿ ಯಶ್ ಸಹ ಕಾಣಿಸಿಕೊಂಡಿದ್ದರು. ಇದೀಗ ಕೆಜಿಎಫ್ 2ನಲ್ಲಿ ಸಹ ಒಂದು ವಿಶೇಷ ಹಾಡಿದ್ದು, ಈ ಹಾಡಿಗೆ ನೋರಾ ಫತೇಹಿ ಹೆಜ್ಜೆ ಹಾಕಿದ್ದಾರೆ ಎಂಬ ಸುದ್ದಿಯೊಂದು ಟಾಲಿವುಡ್ ಅಂಗಳದಿಂದ ಬಂದಿದೆ.
ಫೆಬ್ರವರಿಯಲ್ಲೇ ಈ ಹಾಡಿನ ಚಿತ್ರೀಕರಣ ಸದ್ದಿಲ್ಲದೆ ಮುಗಿದಿದ್ದು, ಈ ಹಾಡಿಗಾಗಿ ಹೈದರಾಬಾದ್‍ನಲ್ಲಿ ವಿಶೇಷ ಸೆಟ್ ಹಾಕಿ ಚಿತ್ರೀಕರಣ ಮಾಡಲಾಗಿದೆ ಎಂದು ಹೇಳಲಾಗಿದೆ.
ಇದನ್ನೂ ಓದಿ: ಟಾಲಿವುಡ್ ಸ್ಟೈಲಿಷ್ ಸ್ಟಾರ್ ಅಲ್ಲು ಅರ್ಜುನ್ಗೆ ಕೊರೊನಾ
ನಿಜಕ್ಕೂ ಕೆಜಿಎಫ್ 2 ಚಿತ್ರದ ಹಾಡಿನಲ್ಲಿ ನೋರಾ ಫತೇಹಿ ನಟಿಸಿದ್ದಾರಾ ಅಥವಾ ಇದೊಂದು ಗಾಳಿಸುದ್ದಿಯಾ ಎಂಬುದನ್ನು ಚಿತ್ರತಂಡದವರು ಇನ್ನಷ್ಟೇ ಬಹಿರಂಗಗೊಳಿಸಬೇಕಿದೆ. ಸದ್ಯಕ್ಕಂತೂ ಚಿತ್ರ ತಂಡದವರು ಯಾವುದೇ ವಿಷಯವನ್ನು ಸಹ ಬಹಿರಂಗಗೊಳಿಸಿಲ್ಲ.
