ಸೂಪರ್​ಸ್ಟಾರ್​ ಚಿತ್ರಕ್ಕೆ ತಪ್ಪಿದ ನ್ಯಾಷನಲ್ ಅವಾರ್ಡ್​; ಅಭಿಮಾನಿಗಳು ಕೆಂಡಾಮಂಡಲ!

ಕಳೆದ ವರ್ಷ ಸೂಪರ್​ಸ್ಟಾರ್ ಮಮ್ಮುಟ್ಟಿ ನಟನೆಯ ವಿಭಿನ್ನ ಕಥಾಹಂದರದ ಪೇರಂಬು ಸಿನಿಮಾ ತಮಿಳಿನಲ್ಲಿ ರಿಲೀಸ್ ಆಗಿತ್ತು. ಆದರೆ ಈ ಚಿತ್ರಕ್ಕೆ ಪ್ರಶಸ್ತಿ ಬಾರದಿರುವುದು ಮಮ್ಮುಟ್ಟಿ ಅಭಿಮಾನಿಗಳ ಬೇಸರ ಹಾಗೂ ಆಕ್ರೋಶಕ್ಕೆ ಕಾರಣವಾಗಿದೆ.

66ನೇ ರಾಷ್ಟ್ರೀಯ ಚಲನಚಿತ್ರ ಪ್ರಶಸ್ತಿ ಈಗಾಗಲೇ ಪ್ರಕಟವಾಗಿದ್ದು, ಇದೇ ವಿಚಾರಕ್ಕೆ ಮಲಯಾಳಂ ಸ್ಟಾರ್​ ನಟನ ಫ್ಯಾನ್ಸ್​​ ಜ್ಯೂರಿ ಮೇಲೆ ಕೋಪಗೊಂಡಿದ್ದಾರೆ.

ಕಳೆದ ವರ್ಷ ಬಿಡುಗಡೆಯಾದ ಚಿತ್ರಗಳ ಪೈಕಿ ಎಲ್ಲ ವಿಭಾಗದಲ್ಲೂ ಅತ್ಯುತ್ತಮ ಎಂದು ಪರಿಗಣಿಸಿ ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿತ್ತು. ಕಳೆದ ವರ್ಷ ಸೂಪರ್​ಸ್ಟಾರ್ ಮಮ್ಮುಟ್ಟಿ ನಟನೆಯ ವಿಭಿನ್ನ ಕಥಾಹಂದರದ ಪೇರಂಬು ಸಿನಿಮಾ ತಮಿಳಿನಲ್ಲಿ ರಿಲೀಸ್ ಆಗಿತ್ತು. ಆದರೆ ಈ ಚಿತ್ರಕ್ಕೆ ಪ್ರಶಸ್ತಿ ಬಾರದಿರುವುದು ಮಮ್ಮುಟ್ಟಿ ಅಭಿಮಾನಿಗಳ ಅಸಮಾಧಾನಕ್ಕೆ ಕಾರಣವಾಗಿದೆ.

ಪೇರಂಬು ಚಿತ್ರದ ಪೋಸ್ಟರ್

ಸದ್ಯ ಮಮ್ಮುಟ್ಟಿ ಅಭಿಮಾನಿಗಳು ಜ್ಯೂರಿ ಸದಸ್ಯ ರಾಹುಲ್ ರವೈಲ್ ಫೇಸ್​ಬುಕ್​​ಗೆ ಆಕ್ರೋಶದಲ್ಲಿ ಮೆಸೇಜ್​ಗಳನ್ನು ಕಳುಹಿಸುತ್ತಿದ್ದಾರೆ. ಪೇರಂಬು ಚಿತ್ರವನ್ನು ಕಡೆಗಣಿಸಿದ್ದಕ್ಕೆ ರಾಹುಲ್ ವಿರುದ್ಧ ಬೈಗುಳಗಳ ಸುರಿಮಳೆಯನ್ನೇ ಹರಿಸಿದ್ದಾರೆ. ಸದ್ಯ ಈ ಬೆಳವಣಿಗೆಗೆ ಫೇಸ್​ಬುಕ್ ಮೂಲಕ ಸ್ವತಃ ರಾಹುಲ್ ಪೋಸ್ಟ್ ಒಂದನ್ನು ಮಾಡಿದ್ದು ಕೆಲ ಹೊತ್ತಿನಲ್ಲೇ ಡಿಲೀಟ್ ಮಾಡಿದ್ದಾರೆ.

"ಹಾಯ್ ಮಿ.ಮಮ್ಮುಟ್ಟಿ, ನನ್ನ ಬಗ್ಗೆ ತುಂಬಾ ಬೈಗುಳದ ಸಂದೇಶಗಳು ಇನ್​ಬಾಕ್ಸಿಗೆ ಬರುತ್ತಿವೆ. ನಿಮ್ಮ ಅಭಿಮಾನಿಗಳು, ಅಭಿಮಾನಿಗಳ ಸಂಘಗಳಿಂದ ಈ ಮೆಸೇಜ್​ಗಳು ಬರುತ್ತಿದ್ದು, ಪೇರಂಬು ಚಿತ್ರಕ್ಕೆ ನಿಮಗೆ ಪ್ರಶಸ್ತಿ ಬಾರದಿರುವುದೇ ಇದಕ್ಕೆಲ್ಲಾ ಕಾರಣ. ಮೊದಲಿಗೆ, ಜ್ಯೂರಿ ನಿರ್ಣಯವನ್ನು ಯಾರೊಬ್ಬರೂ ಪ್ರಶ್ನಿಸುವಂತಿಲ್ಲ. ಎರಡನೇಯದಾಗಿ, ಪೇರಂಬು ಚಿತ್ರವನ್ನು ನಾವು ತಿರಸ್ಕರಿಸಿಲ್ಲ. ಪ್ರಾದೇಶಿಕ ಸಮಿತಿಯೇ ಚಿತ್ರವನ್ನು ತಿರಸ್ಕರಿಸಿತ್ತು. ಹೀಗಾಗಿ ನಮ್ಮ ಸಮಿತಿಗೆ ಆ ಚಿತ್ರ ಬಂದಿರಲಿಲ್ಲ. ನಿಮ್ಮ ಅಭಿಮಾನಿಗಳು ಕಳೆದುಹೋದ ವಿಚಾರಕ್ಕೆ ಜಗಳ ಮಾಡುವುದು ಸರಿಯಲ್ಲ ಮತ್ತು ಯಾವತ್ತು ಜ್ಯೂರಿಯನ್ನು ಪ್ರಶ್ನಿಸಬಾರದು" ಎಂದು ರಾಹುಲ್ ರವೈಲ್ ತಮ್ಮ ಎಫ್​ಬಿ ಖಾತೆಯಲ್ಲಿ ಬರೆದುಕೊಂಡಿದ್ದರು.

ಜ್ಯೂರಿ ರಾಹುಲ್ ರವೈಲ್

ರಾಹುಲ್​ ಎಫ್​ಬಿ ಪೋಸ್ಟ್ ಕೆಲವೇ ಹೊತ್ತಿನಲ್ಲಿ ಮಮ್ಮುಟ್ಟಿ ಗಮನಕ್ಕೆ ಬಂದಿದ್ದು, ತಕ್ಷಣವೇ ಕ್ಷಮೆಯಾಚಿಸಿದ್ದಾರೆ. "ಈ ವಿಚಾರದ ಬಗ್ಗೆ ನನಗೆ ತಿಳಿದಿರಲಿಲ್ಲ. ಆದರೂ ಸದ್ಯ ನಡೆದಿರುವ ಬೆಳವಣಿಗೆ ಬಗ್ಗೆ ನಾನು ಕ್ಷಮೆ ಕೇಳುತ್ತೇನೆ" ಎಂದಿದ್ದಾರೆ.