ಇತ್ತೀಚಿನ ದಿನಗಳಲ್ಲಿ ಸ್ಯಾಂಡಲ್ವುಡ್ನಲ್ಲಿ ಸೀಕ್ವೆಲ್ ಸಿನಿಮಾಗಳ ಟ್ರೆಂಡ್ ಶುರುವಾಗಿದ್ದು, ಹಿಟ್ ಚಿತ್ರಗಳ ಟೈಟಲ್ಗಳನ್ನು ಬಳಸಿಕೊಂಡು ಸಿನಿಮಾ ಮಾಡುವವರ ಸಂಖ್ಯೆ ಕೂಡಾ ಜಾಸ್ತಿಯಾಗಿದೆ. ಈಗ ಅವುಗಳ ಸಾಲಿಗೆ 'ಒಲವೇ ಮಂದಾರ -2' ಸಿನಿಮಾ ಸೇರಿದೆ.
ನಿರ್ದೇಶಕ ಜಯತೀರ್ಥ 2011 ರಲ್ಲಿ 'ಒಲವೇ ಮಂದಾರ' ಎಂಬ ಹಿಟ್ ಚಿತ್ರ ನೀಡಿದ್ದರು. ಅಲ್ಲದೆ ಈ ಚಿತ್ರದ ಮೂಲಕ ಶ್ರೀಕಿಯನ್ನು ಗಾಂಧಿನಗರಕ್ಕೆ ಪರಿಚಯಿಸಿದ್ದರು. ಈಗ ಬರೋಬ್ಬರಿ 9 ವರ್ಷಗಳ ನಂತರ ನಿರ್ದೇಶಕ ಎ.ಆರ್. ಪಾಟೀಲ್ ಮತ್ತೆ 'ಒಲವೇ ಮಂದಾರ 2' ಹೆಸರಿನಲ್ಲಿ ಸಿನಿಮಾ ಮಾಡುತ್ತಿದ್ದು ಈ ಸಿನಿಮಾದ ಟೈಟಲ್ ಪೋಸ್ಟರನ್ನು ಲವ್ಲಿ ಸ್ಟಾರ್ ಪ್ರೇಮ್ ಬಿಡುಗಡೆ ಮಾಡಿ ಚಿತ್ರ ತಂಡಕ್ಕೆ ಶುಭ ಕೋರಿದ್ದಾರೆ. ಬಸವ ಕಂಬೈನ್ಸ್ ಬ್ಯಾನರ್ ಅಡಿಯಲ್ಲಿ ರಮೇಶ್ ಮರಗೋಳ, ಚೇತನ್ ರಾಜ್ ಮತ್ತು ಟಿ.ಎಮ್. ಸುರೇಶ್ ಬಂಡವಾಳ ಹೂಡಿರುವ ಈ 'ಒಲವೇ ಮಂದಾರ 2' ಸಿನಿಮಾ ಶೂಟಿಂಗ್ ಹಂತದಲ್ಲಿದ್ದು. 'ಇದಂ ಪ್ರೇಮಂ ಜೀವನಂ', 'ಕಮರೊಟ್ಟು ಚೆಕ್ಪೋಸ್ಟ್' ಖ್ಯಾತಿಯ ನಟ ಸನತ್ ನಾಯಕನಾಗಿ ನಟಿಸುತ್ತಿದ್ದಾರೆ. ಮಲೆನಾಡು ಹುಡುಗಿ ಪ್ರಜ್ಞಾ ಭಟ್ ಸನತ್ಗೆ ನಾಯಕಿಯಾಗಿ ನಟಿಸುತ್ತಿದ್ದಾರೆ.
ಇದಕ್ಕೂ ಮುನ್ನ ಎಸ್.ಆರ್. ಪಾಟೀಲ್ 'ಇದೀಗ ಬಂದ ಸುದ್ದಿ' ಚಿತ್ರವನ್ನು ನಿರ್ದೇಶಿಸಿದ್ದರು. ಈ ಚಿತ್ರದಲ್ಲಿ ಒಂದು ಕ್ಯೂಟ್ ಲವ್ ಸ್ಟೋರಿಯನ್ನು ಹೇಳಲು ಪ್ರಯತ್ನಿಸಲಾಗಿದೆ. ಈಗಾಗಲೇ ಸುಮಾರು 50 % ಚಿತ್ರೀಕರಣ ಮುಗಿದಿದೆ. ಸದ್ಯ ಚಿತ್ರತಂಡ ಕಲಬುರಗಿಯಲ್ಲಿ ಚಿತ್ರೀಕರಣದಲ್ಲಿ ಬ್ಯುಸಿಯಾಗಿದೆ. ಚಿತ್ರದ ಹಾಡುಗಳಿಗೆ 'ಐಲವ್ಯು' ಖ್ಯಾತಿಯ ಸಂಗೀತ ನಿರ್ದೇಶಕ ಕಿರಣ್ ತೋಟಂಬೈಲು ಸಂಗೀತ ನೀಡಿದ್ದಾರೆ. ಸಿನಿಮಾ ಖಂಡಿತ ಎಲ್ಲರಿಗೂ ಇಷ್ಟವಾಗಲಿದೆ ಎಂದು ಚಿತ್ರತಂಡ ಭರವಸೆ ವ್ಯಕ್ತಪಡಿಸಿದೆ.
