ಬಾಲಿವುಡ್‌ ನಟ ಆಯುಷ್ಮಾನ್ ಖುರಾನಾ ಅಭಿನಯದ 'ಶುಭ್ ಮಂಗಳ್ ಜ್ಯಾದಾ ಸಾವಧಾನ್' ಸಿನಿಮಾದ ಟ್ರೇಲರ್ ಈಗಾಗಲೇ ಬಿಡುಗಡೆಯಾಗಿದೆ. ಜತೆಗೆ ಎಲ್ಲರ ಮೆಚ್ಚುಗೆಯನ್ನೂ ಗಳಿಸುತ್ತಿದೆ. ಈ ಬಗ್ಗೆ ಮಾತನಾಡಿದ ನಟ ಆಯುಷ್ಮಾನ್ ಖುರಾನಾ, ಚಿತ್ರದಲ್ಲಿ ಸಲಿಂಗಕಾಮವೇ ಮುಖ್ಯ ವಿಷಯ ಎಂಬುದನ್ನು ಖಚಿತಪಡಿಸಿದರು.
ಕೋಲ್ಕತ್ತಾದ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿದ ಅವರು, ಭಾರತವು ಸಲಿಂಗಕಾಮದ ಬಗ್ಗೆ ಒಲವು ತೋರಿಸುತ್ತಿದೆ. ಈ ವಿಷಯದ ಕುರಿ ಸಿನಿಮಾ ಸ್ವೀಕರಿಸುವಷ್ಟು ಭಾರತ ಪ್ರಬುದ್ಧ. ನಾವು ಈ ಹಿಂದೆ ನಡೆದ ಸಂದರ್ಶನವೊಂದರಲ್ಲಿ ಸಲಿಂಗಕಾಮದ ಸಿನಿಮಾ ಬಗ್ಗೆ ಮಾತುಕತೆ ನಡೆಸಿದ್ದೆವು. ಆ ದಿನಗಳಲ್ಲಿ ಈ ವಿಷಯ ಕುರಿತ ಕಥೆಗಳಿಗಾಗಿ ಹುಡುಕಾಟ ನಡೆಸುತ್ತಿದ್ದೆವು. ಸದ್ಯ ನಮ್ಮ ಸಿನಿಮಾಕ್ಕೆ ಬೇಕಾದ ಕಥೆ ಸಿಕ್ಕಿದೆ. ಸಿನಿಮಾ ನಿರ್ಮಾಣವಾಗಿದೆ ಎಂದರು.
ಈ ಸಿನಿಮಾದಲ್ಲಿ ಇಬ್ಬರು ಹುಡುಗರ ನಡುವಿನ ಪ್ರೀತಿ-ಪ್ರಣಯದ ಬಗ್ಗೆ ಹೇಳಲಾಗಿದೆ. ಚಿತ್ರದ ಕಥೆ ಬರೆದಿರುವ ಹಿತೇಶ್ ಕೇವಲ್ಯಗೆ ಅಭಿನಂದನೆ ಸಲ್ಲಿಸಿರುವ ಅವರು, ಸಿನಿಮಾಕ್ಕೆ ಸಿಗುವ ಎಲ್ಲಾ ಗೌರವಗಳೂ ನಿರ್ದೇಶಕರಿಗೇ ಸಲ್ಲಬೇಕು ಎಂದಿದ್ದಾರೆ.
ಸಿನಿಮಾಕ್ಕೆ ಹಿತೇಶ್ ನಿರ್ದೇಶನವಿದೆ. ಆನಂದ್‌ ಎಲ್‌ ರಾಯ್, ಭೂಷಣ್‌ಕುಮಾರ್, ಕಿಶನ್ಕುಮಾರ್ ಬಂಡವಾಳ ಹೂಡಿದ್ದಾರೆ. ಚಿತ್ರದಲ್ಲಿ ಆಯುಷ್ಮಾನ್ ಖುರಾನಾ, ಜೀತೇಂದ್ರ ಕುಮಾರ್, ನೀನಾ ಗುಪ್ತ, ಮಾನ್ವಿ ಗಾಗ್ರೋ ಮುಖ್ಯ ಭೂಮಿಕೆಯಲ್ಲಿ ಕಾಣಿಸಿದ್ದಾರೆ. ಶುಭ್ ಮಂಗಳ್ ಜ್ಯಾದಾ ಸಾವಧಾನ್ ಫೆಬ್ರವರಿ 21ಕ್ಕೆ ತೆರೆಗೆ ಬರುವ ಸಾಧ್ಯತೆಗಳಿವೆ.
