ರೂಪಾ ಐಯ್ಯರ್ ಚಿತ್ರಗಳಲ್ಲಿ ನಟನೆ, ನಿರ್ಮಾಣ ಹಾಗೂ ನಿರ್ದೇಶನದ ಜೊತೆಗೆ ಹಲವು ಸಮಾಜಮುಖಿ ಕಾರ್ಯಗಳನ್ನು ಮಾಡುತ್ತಾ ಬಂದಿದ್ದಾರೆ. 'ಮುಖಪುಟ' ಎಂಬ ಸಿನಿಮಾ ಮೂಲಕ ಹೆಚ್ಐವಿ ಮಕ್ಕಳ ಕಥೆಯನ್ನು ಹೇಳಿ ಅವರ ಕಷ್ಟಕ್ಕೆ ರೂಪಾ ಶ್ರಮಿಸಿದ್ದರು.
ನಮ್ಮ ಮನೆ, ವಿಶ್ವ ಹಿಂದೂ ಮಹಿಳಾ ಪ್ರತಿಷ್ಠಾನ, ಬ್ರಹ್ಮಜ್ಞಾನ ಪೀಠ ದೇವ, ಬ್ರಾಹ್ಮಣ ಸಮುದಾಯ ಎಂಬ ಟ್ರಸ್ಟ್ಗಳ ಮೂಲಕ ರೂಪಾ ಐಯ್ಯರ್ ತಮ್ಮ ಕೈಲಾದ ಸಮಾಜ ಸೇವೆ ಮಾಡುತ್ತಾ ಬರುತ್ತಿದ್ದಾರೆ. ಇದೀಗ ಕೇಂದ್ರ ಸರ್ಕಾರದ ಮಹತ್ವಾಕಾಂಕ್ಷೆಯ 'ಆಯುಷ್ಮಾನ್ ಭಾರತ್' ಯೋಜನೆ ಆರೋಗ್ಯ ಕಾರ್ಡುಗಳನ್ನು ಕನ್ನಡ ಚಿತ್ರರಂಗದಲ್ಲಿ ಕೆಲಸ ಮಾಡುವವರಿಗೆ ಕೊಡಿಸುವ ಕೆಲಸ ಮಾಡುತ್ತಿದ್ದಾರೆ ರೂಪಾ. ಈ ಕಾರ್ಡ್ ಇದ್ದರೆ ಕುಟುಂಬದ ಯಾವುದೇ ಸದಸ್ಯರು ಅನಾರೋಗ್ಯಕ್ಕೀಡಾದರೆ ಅಥವಾ ಶಸ್ತ್ರಚಿಕಿತ್ಸೆ ಮಾಡಿಸಬೇಕಿದ್ದರೆ ವಾರ್ಷಿಕ ಒಂದು ಕುಟುಂಬಕ್ಕೆ 5 ಲಕ್ಷ ರೂಪಾಯಿ ವೆಚ್ಚದವರೆಗೂ ಉಚಿತವಾಗಿ ಚಿಕಿತ್ಸೆ ನೀಡಲಾಗುವುದು. ಅಂದರೆ ಈ ವೆಚ್ಚವನ್ನು ಕೇಂದ್ರ ಸರ್ಕಾರವೇ ಭರಿಸಲಿದೆ.
ಸದ್ಯಕ್ಕೆ ಈ ಕಾರ್ಯಕ್ರಮ ಚಾಮರಾಜಪೇಟೆಯಲ್ಲಿರುವ ಕನ್ನಡ ಕಲಾವಿದರ ಸಂಘದಲ್ಲಿ ಜರುಗುತ್ತಿದೆ. ಚಿತ್ರರಂಗದ ತಂತ್ರಜ್ಞರು, ಸಹ ಕಲಾವಿದರು, ಮೇಕಪ್ ಆರ್ಟಿಸ್ಟ್, ಸಹ ನೃತ್ಯಗಾರರು, ಸ್ಟಿಲ್ ಫೋಟೋಗ್ರಾಫರ್ಗಳು, ನಿರ್ದೇಶಕರು, ನಿರ್ಮಾಪಕರು, ಗಾಯಕರು, ಸ್ಟಂಟ್ ಕಲಾವಿದರು, ಆರ್ಟ್ ಡಿಪಾರ್ಟ್ಮೆಂಟ್ ಕುಟುಂಬದವರು ಈ ಹೆಲ್ತ್ ಕಾರ್ಡನ್ನು ಮಾಡಿಸಿಕೊಳ್ಳುತ್ತಿದ್ದಾರೆ. ಈಗಾಗಲೇ ಸುಮಾರು 8 ಸಾವಿರಕ್ಕೂ ಹೆಚ್ಚು ಫಲಾನುಭವಿಗಳು ಈ ಆಯುಷ್ಮಾನ್ ಭಾರತ್ ಯೋಜನೆ ಕಾರ್ಡ್ ಮಾಡಿಸಿಕೊಂಡಿದ್ದಾರೆ. ಈ ವಿಮೆ ಪಡೆಯಲು ಸ್ವತಃ ರೂಪಾ ಐಯ್ಯರ್ ತಾಯಿ ಬಹಳ ತೊಂದರೆ ಪಟ್ಟರಂತೆ. ಹೀಗಾಗಿ ಇಂತಹ ತೊಂದರೆ ಬೇರೆಯವರಿಗೆ ಆಗಬಾರದು ಎಂಬ ಉದ್ದೇಶಕ್ಕೆ ರೂಪಾ ಅಯ್ಯರ್ ಮುಂದೆ ನಿಂತು ಎಲ್ಲರಿಗೂ ಈ ಕಾರ್ಡ್ ಕೊಡಿಸಲು ಪ್ರಯತ್ನಿಸುತ್ತಿದ್ದಾರೆ.
