ನಟಿ ಸಂಜನಾ ಗಲ್ರಾನಿಗೆ ಸಿಸಿಬಿಯಿಂದ ನೋಟಿಸ್ ನೀಡುವ ಸಾಧ್ಯತೆ

ಡ್ರಗ್ಸ್​​ ಜಾಲದಲ್ಲಿ ನಟಿಮಣಿಯರು ಸಿಲುಕಿರುವ ಕಾರಣ ಸದ್ಯ ಸಿಸಿಬಿ ಪೊಲೀಸರು ಡ್ರಗ್ಸ್​ ನಂಟಿನಲ್ಲಿ ಭಾಗಿಯಾದವರ ಬೆನ್ನತ್ತಿದ್ದಾರೆ.

ಬೆಂಗಳೂರು: ನಟಿ ಸಂಜನಾ ಗಲ್ರಾನಿ ಆಪ್ತ ರಾಹುಲ್​ನನ್ನ ಖೆಡ್ಡಾಕ್ಕೆ ಕೆಡವಿದ ಸಿಸಿಬಿ ಸದ್ಯ ಸಂಜಾನಾ ಗಲ್ರಾನಿಗೆ ಕೂಡ ನೋಟಿಸ್ ನೀಡಲು ತಯಾರಿ ನಡೆಸಿದ್ದಾರೆ‌ ಎಂದು ತಿಳಿದು ಬಂದಿದೆ.

ನಿನ್ನೆ ರಾಹುಲ್​ನನ್ನ ಸಿಸಿಬಿ ಅಧಿಕಾರಿಗಳು ಕೊರ್ಟ್​​ಗೆ ಹಾಜರುಪಡಿಸಿ 5 ದಿನಗಳ ಕಾಲ ವಶಕ್ಕೆ ಪಡೆದಿದ್ದಾರೆ. ಈತ ಹಲವಾರು ಪಾರ್ಟಿ ಆಯೋಜಕನಾಗಿದ್ದ. ಹಾಗೆಯೇ ಸಂಜನಾ ಗಲ್ರಾನಿ ಜೊತೆ ಪಾರ್ಟಿ, ವಿದೇಶ ಪ್ರಯಾಣ ಹೀಗೆ ಹಲವು ಕಡೆ ಸುತ್ತಾಡಿದ್ದಾನೆ. ಅಷ್ಟು ಮಾತ್ರವಲ್ಲದೆ ಸಂಜನಾ ಮನೆಯಲ್ಲಿ ಹಲವಾರು ಬರ್ತಡೇ ಪಾರ್ಟಿ, ಸಂಜಾನ ಜೊತೆ ಟಿಕ್​ ಟಾಕ್​ನಲ್ಲಿ ಕುಣಿದಾಟ ಹೀಗೆ ಹಲವಾರು ರೀತಿಯಲ್ಲಿ ನಂಟು ಹೊಂದಿದ್ದ ಎನ್ನಲಾಗಿದೆ.

ನಿನ್ನೆ ಸಿಸಿಬಿ, ರಾಹುಲ್​​ನನ್ನ ಸಂಜನಾ ಮನೆಗೆ ಕರೆದೊಯ್ದು ಸ್ಥಳ ಮಹಜರು ನಡೆಸಿದೆ. ನಟಿ ಸಂಜನಾ ಜೊತೆ ನಿಕಟ ಸಂಬಂಧ ಇರುವ ಕಾರಣ ಸಿಸಿಬಿ ಪೊಲೀಸರು ಸಂಜನಾಗೆ ನೋಟಿಸ್ ನೀಡಲು ತಯಾರಿ ನಡೆಸಿದ್ದು, ಇಂದು ಬಹುತೇಕವಾಗಿ ನೋಟಿಸ್ ಕೊಟ್ಟು ವಿಚಾರಣೆಗೆ ಬರುವಂತೆ ತಿಳಿಸುವ ಸಾಧ್ಯತೆ ಇದೆ.