ಈ ನಟ ಹೊಸ ಸಿನಿಮಾಗಳ 'ಅಕ್ಷಯ' ಪಾತ್ರೆ: 'ರಾಕ್ಷಸನ್' ರಿಮೇಕ್‌ನಲ್ಲಿ ಮಿಂಚಲು ರೆಡಿ

ತಮಿಳಿನ ಜನಪ್ರಿಯ 'ರಾಕ್ಷಸನ್' ಹಿಂದಿಗೆ ರಿಮೇಕ್ ಆಗುತ್ತಿದ್ದು, ನಟ ಅಕ್ಷಯ್ ಕುಮಾರ್ ಲೀಡ್ ರೋಲ್​ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.

ಬಹುಶಃ ಇಡೀ ದೇಶದಲ್ಲಿ ಬ್ಯುಸಿಯಾಗಿರುವ ನಟ ಎಂದರೆ ಅದು ಅಕ್ಷಯ್ ಕುಮಾರ್ ಒಬ್ಬರೇ ಇರಬೇಕು. ಅಕ್ಷಯ್ ಅಭಿನಯದ ಸೂರ್ಯವಂಶಿ, ಬೆಲ್​​ಬಾಟಂ ಚಿತ್ರಗಳು ಇನ್ನಷ್ಟೇ ಬಿಡುಗಡೆ ಆಗಬೇಕಿದೆ. ಬಚ್ಚನ್ ಪಾಂಡೆ, ಅತರಂಗಿ ರೇ ಮತ್ತು ಪೃಥ್ವಿರಾಜ್ ಚಿತ್ರಗಳ ಚಿತ್ರೀಕರಣವನ್ನು ಅವರು ಮುಗಿಸಿದ್ದು, ಆ ಚಿತ್ರಗಳು ಮುಂದಿನ ವರ್ಷ ಬಿಡುಗಡೆಯಾಗಲಿವೆ.

ಇನ್ನು ರಾಮ್​ ಸೇತು ಮತ್ತು ರಕ್ಷಾ ಬಂಧನ್ ಎಂಬ ಎರಡು ಚಿತ್ರಗಳ ಚಿತ್ರೀಕರಣದಲ್ಲಿ ಅಕ್ಷಯ್ ತೊಡಗಿಸಿಕೊಂಡಿದ್ದು, ಆ ಚಿತ್ರಗಳ ಚಿತ್ರೀಕರಣ ಸಹ ಇದೇ ವರ್ಷ ಮುಗಿಯಲಿವೆ. ಈ ಮಧ್ಯೆ, ಅಕ್ಷಯ್ ಇನ್ನೂ ಒಂದು ಹೊಸ ಚಿತ್ರವನ್ನು ಒಪ್ಪಿಕೊಂಡಿದ್ದಾರೆ. ವಿಶೇಷವೆಂದರೆ, ಲಕ್ಷ್ಮೀ ನಂತರ ಅಕ್ಷಯ್ ಯಾವೊಂದು ರೀಮೇಕ್ ಚಿತ್ರವನ್ನೂ ಒಪ್ಪಿಕೊಂಡಿರಲಿಲ್ಲ.

ಇದೀಗ ತಮಿಳಿನ ಜನಪ್ರಿಯ ಚಿತ್ರ 'ರಾಕ್ಷಸನ್' ಹಿಂದಿಗೆ ರಿಮೇಕ್ ಆಗುತ್ತಿದ್ದು, ಅದರಲ್ಲಿ ಇನ್​​ಸ್ಪೆಕ್ಟರ್​ ಪಾತ್ರವನ್ನು ಅಕ್ಷಯ್ ಕುಮಾರ್ ನಿಭಾಯಿಸಲಿದ್ದಾರೆ. ಚಿತ್ರಕ್ಕೆ 'ಮಿಷನ್ ಸಿಂಡ್ರೆಲಾ' ಎಂದು ಹೆಸರಿಡಲಾಗಿದೆ. ಅಕ್ಷಯ್​ಗೆ ನಾಯಕಿಯಾಗಿ ರಾಕುಲ್ ಪ್ರೀತ್ ಸಿಂಗ್ ಆಯ್ಕೆಯಾಗಿದ್ದಾರೆ.

ಇದನ್ನೂ ಓದಿ: ವರ್ಷಾಂತ್ಯಕ್ಕೆ ಸೆಟ್ಟೇರಲಿದೆ ಜಲಿಯನ್​ವಾಲಾ ಬಾಗ್, ಶಂಕರನ್ ನಾಯರ್ ಬಯೋಪಿಕ್

ಬೆಲ್ ಬಾಟಂ ನಿರ್ಮಾಪಕ ಜಾಕಿ ಭಗ್ನಾನಿ ಈ ಚಿತ್ರವನ್ನು ನಿರ್ಮಿಸುತ್ತಿದ್ದಾರೆ. ಆಗಸ್ಟ್​ನಲ್ಲಿ ಚಿತ್ರೀಕರಣ ಪ್ರಾರಂಭವಾಗಲಿದೆ. ರಂಜಿತ್ ತಿವಾರಿ ಈ ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ. ಇದೊಂದು ಕಡಿಮೆ ಬಜೆಟ್​, ಕಡಿಮೆ ಅವಧಿಯಲ್ಲಿ ಚಿತ್ರೀಕರಣವಾಗಲಿರುವ ಚಿತ್ರ. ಇದಕ್ಕಾಗಿ 40 ದಿನಗಳ ಕಾಲ್​​ಶೀಟ್​ ಕೊಟ್ಟಿದ್ದಾರಂತೆ ಅಕ್ಷಯ್.

ಆಗಸ್ಟ್​​ನಲ್ಲಿ ಚಿತ್ರದ ಚಿತ್ರೀಕರಣ ಪ್ರಾರಂಭವಾದರೆ, ಅಕ್ಟೋಬರ್ ಹೊತ್ತಿಗೆ ಮುಗಿಯಲಿದೆ. ಅದರ ನಂತರ ಅಕ್ಷಯ್ ಇನ್ಯಾವ ಚಿತ್ರಕ್ಕೆ ಹಾರುತ್ತಾರೋ ಎಂಬ ಕುತೂಹಲ ಎಲ್ಲರಿಗೂ ಇದೆ. ಸದ್ಯ ಅಕ್ಷಯ್ ತಮ್ಮ ಮುಂದಿನ ಚಿತ್ರ ಯಾವುದು ಎಂದು ಇನ್ನೂ ಹೇಳಿಕೊಂಡಿಲ್ಲ.