'ದುನಿಯಾ' ಸಿನಿಮಾ ಮೂಲಕ ಕನ್ನಡ ಚಿತ್ರರಂಗದಲ್ಲಿ ಲೂಸ್ ಮಾದ ಎಂದೇ ಫೇಮಸ್ ಆಗಿ ಪ್ರೇಕ್ಷಕರ ಮನ ಗೆದ್ದ ನಟ ಯೋಗೀಶ್. 'ಲಂಬೋದರ' ಹಾಗೂ 'ದುನಿಯಾ 2' ಚಿತ್ರದ ಮೂಲಕ ಸೆಕೆಂಡ್ ಇನ್ನಿಂಗ್ಸ್ ಶುರು ಮಾಡಿರುವ ಲೂಸ್ ಮಾದ ಯೋಗಿಗೆ ಇಂದು ಹುಟ್ಟುಹಬ್ಬದ ಸಂಭ್ರಮ.
30ನೇ ವಸಂತಕ್ಕೆ ಕಾಲಿಟ್ಟಿರುವ ಯೋಗೀಶ್ ಸದ್ಯಕ್ಕೆ 'ಪರಿಮಳ ಲಾಡ್ಜ್', 'ಒಂಬತ್ತನೇ ದಿಕ್ಕು' , 'ಅಕಟಕಟ' , 'ಕಂಸ' ಹೀಗೆ ಬ್ಯಾಕ್ ಟು ಬ್ಯಾಕ್ ಸಿನಿಮಾಗಳನ್ನು ಮಾಡುತ್ತಿದ್ದಾರೆ. ಯೋಗಿ ಹುಟ್ಟುಹಬ್ಬಕ್ಕೆ 'ಅಕಟಕಟ' ಸಿನಿಮಾ ತಂಡ ಫಸ್ಟ್ ಲುಕ್ ರಿವೀಲ್ ಮಾಡುವ ಮೂಲಕ ಬರ್ತ್ಡೇ ಉಡುಗೊರೆ ನೀಡಿದೆ. 'ದಿ ಬೆಸ್ಟ್ ಆ್ಯಕ್ಟರ್' ಎಂಬ ಕಿರುಚಿತ್ರ ಮಾಡಿದ್ದ ನಾಗರಾಜ್ ಸೋಮಯಾಜಿ 'ಅಕಟಕಟ' ಚಿತ್ರವನ್ನು ನಿರ್ದೇಶಿಸುತ್ತಿದ್ದಾರೆ. ಕೇವಲ ಹತ್ತೇ ನಿಮಿಷದಲ್ಲಿ ಕಥೆ ಕೇಳಿ ಸಿನಿಮಾಗೆ ಕಾಲ್ಶೀಟ್ ಕೊಟ್ರಂತೆ ಯೋಗಿ. ಅವರು ಹೇಳುವ ಪ್ರಕಾರ ಇದು ಯೋಗಿ ವೃತ್ತಿ ಬದುಕಿನಲ್ಲಿ ವಿಭಿನ್ನ ಸಿನಿಮಾವಂತೆ.
- " class="align-text-top noRightClick twitterSection" data="">
ಇದರೊಂದಿಗೆ ನಿರ್ದೇಶಕ ದಯಾಳ್ ಪದ್ಮನಾಭನ್ ಅವರ 'ಒಂಬತ್ತನೇ ದಿಕ್ಕು' ಚಿತ್ರದ ಟೀಸರ್ ಕೂಡಾ ಇಂದು ಬೆಳಗ್ಗೆ ಬಿಡುಗಡೆಯಾಗಿದೆ. ಈ ಚಿತ್ರ ಯೋಗಿಗೆ ಬ್ರೇಕ್ ನೀಡುವ ಎಲ್ಲಾ ಲಕ್ಷಣ ಇದೆ ಎನ್ನಲಾಗುತ್ತಿದೆ. ಚಿತ್ರದಲ್ಲಿ ಯೋಗಿ ಜೊತೆಯಾಗಿ ಅದಿತಿ ಪ್ರಭುದೇವ ನಟಿಸಿದ್ದಾರೆ. ಈಗಾಗಲೇ ಬಿಡುಗಡೆಯಾಗಿರುವ ಚಿತ್ರದ ಪೋಸ್ಟರ್ಗಳು ಭಾರೀ ಕುತೂಹಲ ಹುಟ್ಟುಹಾಕಿವೆ. ಕೊರೊನಾ ಭೀತಿ ಮುಗಿದ ನಂತರ ಸಿನಿಮಾ ಬಿಡುಗಡೆಯಾಗಲಿದೆ ಎಂದು ದಯಾಳ್ ಪದ್ಮನಾಭನ್ ಹೇಳಿದ್ದಾರೆ. ಇದರೊಂದಿಗೆ 'ಕಂಸ' ಎಂಬ ಕ್ಯಾಚಿ ಟೈಟಲ್ ಹೊಂದಿರುವ ಸಿನಿಮಾದಲ್ಲಿ ಕೂಡಾ ಯೋಗಿ ನಟಿಸುತ್ತಿದ್ದಾರೆ.
ಇನ್ನು ಮನೆಯವರೊಂದಿಗೆ ಸಿಂಪಲ್ ಆಗಿ ಈ ಬಾರಿ ಹುಟ್ಟುಹಬ್ಬ ಆಚರಿಸಿಕೊಂಡಿದ್ದಾರೆ ಯೋಗಿ. ಹುಟ್ಟುಹಬ್ಬಕ್ಕೆ ಪತ್ನಿ ಸಾಹಿತ್ಯ ಯೋಗಿಗೆ ಹೊಸ ಬಟ್ಟೆಗಳನ್ನು ಕೊಡಿಸಿದ್ದಾರಂತೆ. ಎಲ್ಲಕ್ಕಿಂತ ಮುಖ್ಯವಾಗಿ ಮಗಳು ಹುಟ್ಟಿರುವುದು ನನಗೆ ದೊಡ್ಡ ಗಿಫ್ಟ್ ಎನ್ನುತ್ತಾರೆ ಯೋಗಿ.
