ಮಾಯಾ ಲೋಕವೇ ಹಾಗೆ. ನಿಜ ಜೀವನದಲ್ಲಿ ಏನು ಸಾಧ್ಯವಿಲ್ಲವೋ ಅದೆಲ್ಲ ಕ್ಯಾಮರಾ ಮುಂದೆ ಸಾಧ್ಯವಾಗಿ ಬಿಡುತ್ತದೆ. ‘ಕಾಲ ಪಾನಿ’ ಮಲಯಾಳಂ ಚಿತ್ರದಲ್ಲಿ ನಟ ಮೋಹನ್ ಲಾಲ್ ಪೊಲೀಸರ ಬೂಟು ನೆಕ್ಕುವುದು ಕಂಡಿದ್ದೇವೆ. ಅದೇ ರೀತಿ ಮಲಯಾಳಂ ನ ಮೇರು ನಟ ಮಮ್ಮುಟ್ಟಿ ಕನ್ನಡ ಚಿತ್ರ ರಂಗದ ರಂಗಕರ್ಮಿ ಪಿ. ಡಿ. ಸತೀಶ್ ಅವರ ಕಾಲು ಒತ್ತುವ ನಟನೆ ಮಾಡಿದ್ರಂತೆ.
ಹೌದು, ಅದು 2010ರಲ್ಲಿ ಬಿಡುಗಡೆಯಾಗಿ ಜಯಭೇರಿ ಭಾರಿಸಿದ ಮಲಯಾಳಂ ಚಿತ್ರ ‘ಕುಟ್ಟಿ ಸ್ರಾಂಕ್’ನ ಸನ್ನಿವೇಶ. ಪಿ. ಡಿ. ಸತೀಶ್ ಅವರದ್ದು ಮುಖ್ಯ ವಿಲನ್ ಪಾತ್ರ. ಇದು ಸತೀಶ್ ಅವರ ಮೊದಲ ಮಲಯಾಳಂ ಸಿನಿಮಾ. ಇವರಿಗೆ ಮಮ್ಮುಟ್ಟಿ ಅಂದರೆ ಮೊದಲೇ ಕಾಲು ನಡುಕ. ಅಂತಹದ್ರಲ್ಲಿ ಮೊದಲ ದೃಶ್ಯದಲ್ಲೇ ಅಂತಹ ದಿಗ್ಗಜ ನಟ ನನ್ನ ಕಾಲಿನ ಚಪ್ಪಲಿ ತೆಗೆದು ಕಾಲು ಒತ್ತುವುದು ಅಂದ್ರೆ ನಿಜಕ್ಕೂ ಎಂತಹವರೂ ಒಮ್ಮೆ ತಬ್ಬಿಬ್ಬಾಗುತ್ತಾರೆ. ಅದೇ ರೀತಿ ಸತೀಶ್ ಕಾಲುಗಳು ನಡುಗುತ್ತಿದ್ದವಂತೆ. ಆಗ, ಅದನ್ನು ಗಮನಿಸಿದ ಮಮ್ಮುಟಿ ಸತೀಶ್ ಅವರನ್ನು ಸಮಾಧಾನಿಸಿದ್ದಾರೆ. ಜೊತೆಗೆ ಊಟದ ವೇಳೆ ಸತೀಶ್ ಅವರಿಗೆ ಬಾಯಿಲ್ಡ್ ರೈಸ್ ಬಡಿಸಿ ಕಾಳಜಿ ತೋರಿದ್ದನ್ನು ಸತೀಶ್ ಸ್ಮರಿಸಿಕೊಂಡಿದ್ದಾರೆ.
ಇಂತಹ ಒಂದು ಅಮೋಘ ಘಳಿಗೆಯನ್ನು ಪಿ. ಡಿ. ಸತೀಶ್ 10 ವರ್ಷಗಳ ಬಳಿಕ ಇತ್ತೀಚಿಗೆ ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ದಾರೆ. ಕನ್ನಡದಲ್ಲಿ ಸತೀಶ್ ಸದ್ಯ ಬಹಳ ಬೇಡಿಕೆಯ ನಟ. ತಂತ್ರಜ್ಞಾನ ವಿಭಾಗದಲ್ಲಿ ವೃತ್ತಿ ಆರಂಭಿಸಿದ ಸತೀಶ್, ನಂತರ ‘ಪಾಪ ಪಾಂಡು 2’ ನಲ್ಲಿ ಪಾತ್ರ ನಿರ್ವಹಿಸಿದ್ದಾರೆ. ಅದಕ್ಕೂ ಮೊದಲು ರಂಗಭೂಮಿಯಲ್ಲಿ, ರೇಡಿಯೋ, ಮಿರ್ಚಿ 98, ‘ಪಾಂಡು ರಂಗ ವಿಠ್ಠಲ’, ಇಂಗ್ಲೀಷ್ ಹಾಗೂ ಕನ್ನಡ ನಾಟಕಗಳಲ್ಲಿ ಪಾತ್ರ ನಿರ್ವಹಿಸಿದ್ದಾರೆ.
ಕನ್ನಡ ಸಿನಿಮಗಳಾದ ರೇ, ಅಭಿಮನ್ಯು, ಯಜಮಾನ, ಐ ಲವ್ ಯು, 99, ಬೆಲ್ ಬಾಟಮ್, ಶಿವಾಜಿ ಸುರತ್ಕಲ್, ರಮೇಶ್ ಅರವಿಂದ್ 100, ತ್ರಿದೇವಿ, ಆಮ್ಲೆಟ್ ಹೀಗೆ ಇವರ ನಟಿಸಿರುವ ಸಿನಿಮಾಗಳ ಪಟ್ಟಿ ಬೆಳೆಯುತ್ತದೆ.
