ಯಜಮಾನ ಯಶಸ್ವಿ; ಅಭಿಮಾನಿಗಳಿಗೆ ಚಾಲೆಂಜಿಂಗ್​ ಸ್ಟಾರ್​ ಥ್ಯಾಂಕ್ಸ್​

ಚಾಲೆಂಜಿಂಗ್​ ಸ್ಟಾರ್​ ದರ್ಶನ್ ಮೈಸೂರಿನಲ್ಲಿ ಯಜಮಾನ ಚಿತ್ರದ ಯಶಸ್ಸಿನ ಕುರಿತು ಮಾತನಾಡಿದರು.

ಮೈಸೂರು: ಯಜಮಾನ ಚಿತ್ರದ ಯಶಸ್ಸಿನ ಖುಷಿಯಲ್ಲಿರುವ ಚಾಲೆಂಜಿಂಗ್​ ಸ್ಟಾರ್​ ದರ್ಶನ್ ನಿನ್ನೆ ಮೈಸೂರಿಗೆ ಭೇಟಿ ನೀಡಿದ್ದರು.

ಈ ವೇಳೆ ನಗರದ ಖಾಸಗಿ ಹೋಟೆಲ್‌ನಲ್ಲಿ ಸುದ್ದಿಗೋಷ್ಠಿ ನಡೆಸಿದ ಅವರು, ಯಜಮಾನ ಸಿನಿಮಾ ಯಶಸ್ವಿಯಾಗಿ ಪ್ರದರ್ಶನಗೊಳ್ಳುತ್ತಿರುವುದಕ್ಕೆ ಸಂತಸವಾಗಿದೆ. ವಿದ್ಯಾರ್ಥಿಗಳಿಗೆ ಪರೀಕ್ಷೆ, ಜನರಿಗೆ ಕ್ರಿಕೆಟ್ ಪಂದ್ಯ ಇದ್ದರೂ ಸಿನಿಮಾ ಸಕ್ಸಸ್ ಆಗಿದೆ. ಸಿನಿ ಪ್ರಿಯರಿಗೆ, ಅಭಿಮಾನಿಗಳಿಗೆ ಥ್ಯಾಂಕ್ಸ್ ಎಂದು ಕೃತಜ್ಞತೆ ಸಲ್ಲಿಸಿದರು.

ಮಂಡ್ಯ ಪ್ರಚಾರ ವಿಚಾರ ಬೇಡ:

ಮಂಡ್ಯದಲ್ಲಿ ಸುಮಲತಾ ಪರ ಚುನಾವಣಾ ಪ್ರಚಾರದ ಬಗ್ಗೆ ಪ್ರಶ್ನೆ ಕೇಳಿದಾಗ, ಇದು ಯಜಮಾನ ಚಿತ್ರದ ಸುದ್ದಿಗೋಷ್ಠಿ.ಯಜಮಾನ ಸಿನಿಮಾ ಬಗ್ಗೆ ಏನಾದರೂ ಪ್ರಶ್ನೆ ಇದ್ರೆ ಕೇಳಿ, ಹೇಳ್ತಿನಿ. ಇಲ್ಲಿಗೆ ನಾನು ಬಂದಿರೋದು ಯಜಮಾನನಾಗಿ. ಬೇರೆ ವಿಚಾರಗಳ ಬಗ್ಗೆ ಬೇರೆ ಕಡೆ ನಾನು ಮಾತನಾಡ್ತೇನೆ ಎಂದು ಹೇಳಿದರು.

19 ಕೋಟಿ ಆಫರ್ ಬಂದಿಲ್ಲ:

ಚಿತ್ರವೊಂದರಲ್ಲಿ ನಟಿಸಲು ನನಗೆ 19 ಕೋಟಿ ರೂ. ಸಂಭಾವನೆಯ ಆಫರ್ ಬಂದಿದೆ ಎನ್ನುವ ವಿಚಾರ ನಿಮಗೆ ಹೇಳಿದ್ದು ಯಾರು? ಅವರನ್ನೇ ಕರ್ಕೊಂಡು ಬನ್ನಿ. ನಾಳೆ ಬೆಳಗ್ಗೆನೇ ಸಿನಿಮಾ ಮಾಡ್ತೀನಿ ಎಂದು ಪ್ರಶ್ನೆಯೊಂದಕ್ಕೆ ದರ್ಶನ್ ವ್ಯಂಗ್ಯವಾಡಿದರು.

ಐಟಿಯವ್ರು ನಮ್ಮನ್ನು ಕೇಳ್ತಾರೆ

ಇನ್ನು ಈ ಬಾರಿಯು ಸಿನಿಮಾ ಕಲೆಕ್ಷನ್ ಬಗ್ಗೆ ಮಾಹಿತಿ ಬಿಟ್ಟುಕೊಡದ ಅವರು, ಅದನ್ನು ಕಟ್ಕೊಂಡು ಏನ್ ಮಾಡ್ತಿರಾ? ನಿಮಗೆ ಅದರಿಂದ ಉಪಯೋಗ ಆಗೋದಾದ್ರೆ ಪೂರ್ತಿ ದಾಖಲೆ ಕೊಡ್ತೀನಿ. ಹಾಗೂ ಬೇಕಂದ್ರೆ ನೀವೇ ಎಷ್ಟು ಥಿಯೇಟರ್‌ಗಳಲ್ಲಿ ಚಿತ್ರ ಇದೆ, ಒಂದು ಶೋಗೆ ಎಷ್ಟು ಕಲೆಕ್ಷನ್ ಆಗುತ್ತೆ, ಹಾಗೇ ದಿನಕ್ಕೆ ಎಷ್ಟು ಕಲೆಕ್ಷನ್ ಆಗುತ್ತೆ ಅಂತ ಲೆಕ್ಕ ಹಾಕಿ. ನೀವು ಹೀಗೆ ಕೇಳಿದ್ರೆ ಐಟಿಯವರು ನಮ್ಮನ್ನು ಲೆಕ್ಕ ಕೇಳ್ತಾರೆ. ಅವರಿಗೆ ಕನ್ನಡಭಾಷೆ ಬರೋದಿಲ್ಲ. ದರ್ಶನ್, ತುಮಾರಾ ಪಾಸ್ ಇತ್ನಾ ಪೈಸಾ ಹೇ ಅಂತ ಕೇಳ್ತಾರೆ ಎಂದು ನಗುತ್ತಲೇ ಉತ್ತರಿಸಿದರು.