ನವದೆಹಲಿ : ಮೆಟಾ ಒಡೆತನದ ಟ್ವಿಟರ್ ಮಾದರಿಯ ಆ್ಯಪ್ Threads ಈಗ ಎಲ್ಲೆಡೆ ಸದ್ದು ಮಾಡುತ್ತಿದೆ. ಕೊನೆಗೂ ಟ್ವಿಟರ್ಗೆ ನಿಜವಾದ ಪೈಪೋಟಿ ನೀಡಬಲ್ಲ ಆ್ಯಪ್ ಬಂದಿದೆ ಎಂಬ ಚರ್ಚೆ ಇಂಟರ್ನೆಟ್ನಲ್ಲಿ ವ್ಯಾಪಕವಾಗಿದೆ. ಆದರೆ ಮಾಜಿ ಟ್ವಿಟರ್ ಸಹ ಸಂಸ್ಥಾಪಕ ಜಾಕ್ ಡಾರ್ಸೆ ಅವರು ಮೆಟಾದ ಥ್ರೆಡ್ಸ್ ಆ್ಯಪ್ ಅನ್ನು ತಮ್ಮ ಟ್ವಿಟರ್ನ ನಕಲು (Twitter clone) ಎಂದು ಟೀಕಿಸಿದ್ದು, ತಾವು ಸ್ಥಾಪಿಸಿದ ಟ್ವಿಟರ್ನ ಬೆಂಬಲಕ್ಕೆ ನಿಂತಿದ್ದಾರೆ.
ಆದರೆ ಈ ಮಧ್ಯೆ ಭಾರತೀಯ ಮೂಲದ ಮಾಜಿ ಟ್ವಿಟರ್ ಸಿಇಒ ಪರಾಗ್ ಅಗರವಾಲ್ ಮತ್ತು ಟ್ವಿಟರ್ನ ಕಾನೂನು ವಿಭಾಗದ ಮಾಜಿ ಮುಖ್ಯಸ್ಥೆ ವಿಜಯಾ ಗದ್ದೆ (ಇಬ್ಬರೂ ಡಾರ್ಸೆಯಿಂದ ನೇಮಕಗೊಂಡಿದ್ದರು) ಇಬ್ಬರೂ ಎಲ್ಲಿಯೂ ಕಾಣಿಸಿಕೊಳ್ಳದಿರುವುದು ಅಚ್ಚರಿ ಮೂಡಿಸಿದೆ.
ಕಳೆದ ವರ್ಷ ಟ್ವಿಟರ್ ತೊರೆದಾಗಿನಿಂದ ಇಬ್ಬರೂ ಎಲ್ಲಿಯೂ ಮಾತನಾಡಿಲ್ಲ ಅಥವಾ ಎಲ್ಲಿಯೂ ಕಾಣಿಸಿಕೊಂಡಿಲ್ಲ. ಅಕ್ಟೋಬರ್‌ನಲ್ಲಿ ಎಲೋನ್ ಮಸ್ಕ್ ಟ್ವಿಟರ್ ಅನ್ನು ತಮ್ಮ ಸ್ವಾಧೀನಕ್ಕೆ ಪಡೆದುಕೊಂಡ ನಂತರ, ಇಡೀ ಸಂಸ್ಥೆಯಲ್ಲಿ ಮೇಲಿನಿಂದ ಕೆಳಗಿನವರೆಗೆ ಹಲವಾರು ಉದ್ಯೋಗಿಗಳನ್ನು ವಜಾ ಮಾಡಿದ್ದು ಗಮನಾರ್ಹ.
ಅಗರವಾಲ್ ಕಳೆದ ವರ್ಷ ಅಕ್ಟೋಬರ್ 6 ರಂದು ಟ್ವಿಟರ್‌ನಲ್ಲಿ ಕೊನೆಯ ಬಾರಿಗೆ ಸಕ್ರಿಯರಾಗಿದ್ದರು. (ಇವರು 601.9K ಫಾಲೋವರ್ಸ್ ಹೊಂದಿದ್ದಾರೆ). ಅದರ ನಂತರ ಇವರು ಯಾವುದೇ ಇತರ ಸಾಮಾಜಿಕ ಮಾಧ್ಯಮ ಪ್ಲಾಟ್‌ಫಾರ್ಮ್‌ನಲ್ಲಿ (ಮೆಟಾ ಥ್ರೆಡ್ಸ್ ಸೇರಿದಂತೆ) ಸಕ್ರಿಯವಾಗಿರುವುದು ಕಂಡುಬಂದಿಲ್ಲ. ಹೀಗಾಗಿ ಇವರು ಈಗೆಲ್ಲಿದ್ದಾರೆ, ಏನು ಮಾಡುತ್ತಿದ್ದಾರೆ ಎಂಬ ಚರ್ಚೆ ಇಂಟರ್ನೆಟ್ನಲ್ಲಿ ಶುರುವಾಗಿದೆ.
ಇದೇ ವಿಚಾರ ಕುರಿತಾಗಿ ಶನಿವಾರ ಟ್ವೀಟ್ ಮಾಡಿರುವ ಏಂಜೆಲ್ ಹೂಡಿಕೆದಾರ ಅಲೆಕ್ಸ್ ಕೊಹೆನ್, ಪರಾಗ್ ಅಗರವಾಲ್ ಕೇವಲ 11 ತಿಂಗಳು ಟ್ವಿಟರ್ನ ಸಿಇಒ ಆಗಿದ್ದರು ಮತ್ತು ಅದಕ್ಕಾಗಿ 60 ಮಿಲಿಯನ್ ಡಾಲರ್ ಪಡೆದುಕೊಂಡರು. ಅಷ್ಟೊಂದು ಹಣ ಪಡೆದ ನಂತರ ಈಗ ನಡೆಯುತ್ತಿರುವುದನ್ನು ಎಲ್ಲೋ ಕುಳಿತು ಮೌನವಾಗಿ ನೋಡುತ್ತಿದ್ದಾರೆ ಎಂಬುದನ್ನು ಈಗಲೂ ನಂಬಲಾಗುತ್ತಿಲ್ಲ ಎಂದಿದ್ದಾರೆ.
ಇದಕ್ಕೆ ಪ್ರತಿಕ್ರಿಯೆ ನೀಡಿರುವ, ಹಸ್ಲ್ ಫಂಡ್‌ನಲ್ಲಿ ತನ್ನನ್ನು ತಾನು 'ಮಿನಿವ್ಯಾನ್ ಉತ್ಸಾಹಿ' ಎಂದು ಕರೆದುಕೊಳ್ಳುವ ಎರಿಕ್ ಬಾನ್- ಖಂಡಿತವಾಗಿಯೂ ಅವರಿಗೆ ಯಾವುದೇ ಹಣ ಪಾವತಿಯಾಗಿಲ್ಲ ಎಂದು ಹೇಳಿದ್ದಾರೆ.
ಅಗರವಾಲ್, ಗದ್ದೆ ಮತ್ತು ಮಾಜಿ ಟ್ವಿಟರ್ ಮುಖ್ಯ ಹಣಕಾಸು ಅಧಿಕಾರಿ ನೆಡ್ ಸೆಗಲ್ ಈ ವರ್ಷದ ಏಪ್ರಿಲ್‌ನಲ್ಲಿ ಕೊನೆಯದಾಗಿ ಸುದ್ದಿಯಲ್ಲಿದ್ದರು. ಎಲೋನ್ ಮಸ್ಕ್ ನಡೆಸುತ್ತಿರುವ ಟ್ವಿಟರ್ ತಮಗೆ ನೀಡಬೇಕಿರುವ 1 ಮಿಲಿಯನ್ ಡಾಲರ್ಗಿಂತಲೂ ಹೆಚ್ಚು ಹಣವನ್ನು ಬಾಕಿ ಉಳಿಸಿಕೊಂಡಿದೆ ಎಂದು ಇವರು ಮೊಕದ್ದಮೆ ಹೂಡಿದ್ದಾರೆ. ಕಳೆದ ವರ್ಷ ಅಕ್ಟೋಬರ್‌ನಲ್ಲಿ, ಮಸ್ಕ್ ಟ್ವಿಟರ್ನ ಒಡೆತನ ಪಡೆದ ಮೇಲೆ ಅಗರವಾಲ್, ಗದ್ದೆ ಮತ್ತು ಸೆಗಲ್ ಅವರನ್ನು ಕಂಪನಿಯಿಂದ ಹೊರ ಹಾಕಿದ್ದರು.
ಯುಎಸ್‌ನ ಡೆಲವೇರ್ ಚಾನ್ಸೆರಿ ನ್ಯಾಯಾಲಯದಲ್ಲಿ ದಾಖಲಾದ ಮೊಕದ್ದಮೆಯ ಪ್ರಕಾರ, ಕಂಪನಿಯಲ್ಲಿದ್ದಾಗ ತಾವು ಕಂಪನಿಗೆ ನೀಡಿದ ಕಾನೂನು ಸೇವೆಗಳ ಶುಲ್ಕವಾಗಿ ಟ್ವಿಟರ್ ತಮಗೆ 1 ಮಿಲಿಯನ್ ಡಾಲರ್ಗಿಂತಲೂ ಹೆಚ್ಚು ಮೊತ್ತ ಪಾವತಿಸಬೇಕಿದೆ ಎಂದು ಹೇಳಿದ್ದಾರೆ. ಅಗರವಾಲ್ ಮತ್ತು ಸೆಗಲ್ ಅವರನ್ನು ಸೆಪ್ಟೆಂಬರ್‌ನಲ್ಲಿ ಸೆಕ್ಯುರಿಟೀಸ್ ಕ್ಲಾಸ್ ಆಕ್ಷನ್‌ನಲ್ಲಿ ಪ್ರತಿವಾದಿಗಳಾಗಿ ಹೆಸರಿಸಲಾಗಿದೆ.
ಆಗ ಇಬ್ಬರೂ ಇನ್ನೂ ಟ್ವಿಟರ್‌ನಲ್ಲಿ ಕೆಲಸ ಮಾಡುತ್ತಿದ್ದರು. ಈ ವರ್ಷದ ಫೆಬ್ರವರಿಯಲ್ಲಿ ಸೆಕ್ಯುರಿಟೀಸ್ ಕ್ಲಾಸ್ ಆಕ್ಷನ್‌ನಲ್ಲಿ ಗದ್ದೆ ಅವರನ್ನು ಪ್ರತಿವಾದಿಯನ್ನಾಗಿ ಹೆಸರಿಸಲಾಯಿತು. ಆ ಕ್ರಮದಲ್ಲಿ ಫಿರ್ಯಾದುದಾರರು ಮೊಕದ್ದಮೆಯ ಪ್ರಕಾರ ತಿದ್ದುಪಡಿ ಮಾಡಿದ ಕ್ಲಾಸ್ ಆಕ್ಷನ್ ದೂರನ್ನು ಸಲ್ಲಿಸಿದರು. ವರದಿಗಳ ಪ್ರಕಾರ, ಈ ಮೂವರು ಉನ್ನತ ಅಧಿಕಾರಿಗಳು ಟ್ವಿಟ್ಟರ್ ಅನ್ನು ತೊರೆದಾಗ ಸುಮಾರು 90 ರಿಂದ 100 ಮಿಲಿಯನ್ ಡಾಲರ್ ನಿರ್ಗಮನ ಪ್ಯಾಕೇಜ್ ಹೊಂದಿದ್ದರು.
ಇದನ್ನೂ ಓದಿ : Social Mediaದಲ್ಲಿ ಬೇಕಾಬಿಟ್ಟಿ ಸಲಹೆಗಳಿಗೆ ಕಡಿವಾಣ; ಇನ್ಫ್ಲುಯೆನ್ಸರ್ಗಳಿಗೂ ಬರ್ತಿದೆ ಮಾರ್ಗಸೂಚಿ
