ಬೆಂಗಳೂರು: ಜುಲೈ ಆರಂಭದಲ್ಲಿ ಯಶಸ್ವಿಯಾಗಿ ಲಾಂಚ್ ಆಗಿ, ಮೊದಲ ವಾರದಲ್ಲೇ ಮಿಲಿಯನ್ಗಟ್ಟಲೇ ಬಳಕೆದಾರರನ್ನು ಪಡೆದುಕೊಂಡಿದ್ದ ಮೈಕ್ರೊಬ್ಲಾಗಿಂಗ್ ಪ್ಲಾಟ್ಫಾರ್ಮ್ ಥ್ರೆಡ್ಸ್ ಈಗ ಬಳಕೆದಾರರನ್ನು ತನ್ನ ಪ್ಲಾಟ್‌ಫಾರ್ಮ್‌ಗೆ ಆಕರ್ಷಿಸಲು ವಿಫಲಾಗುತ್ತಿದೆ. ಈಗಾಗಲೇ ಜನಪ್ರಿಯ ಮೈಕ್ರೊಬ್ಲಾಗಿಂಗ್ ಪ್ಲಾಟ್ಫಾರ್ಮ್ ಆಗಿರುವ ಟ್ವಿಟರ್ ಅನ್ನು ಎಲೋನ್ ಮಸ್ಕ್ ಸ್ವಾಧೀನಕ್ಕೆ ಪಡೆದು, ಹಲವಾರು ಬದಲಾವಣೆಗಳನ್ನು ಜಾರಿಗೆ ತಂದ ನಂತರ ಮಿಲಿಯನ್ಗಟ್ಟಲೇ ಬಳಕೆದಾರರು ಟ್ವಿಟರ್ನಿಂದ ದೂರವಾಗಿದ್ದರು. ಹೀಗಾಗಿ ಮೆಟಾ ಒಡೆತನದ ಥ್ರೆಡ್ಸ್ ಪ್ಲಾಟ್ಫಾರ್ಮ್ ಅನ್ನು ಟ್ವಿಟರ್ನ ಕಿಲ್ಲರ್ ಎಂದೇ ಹೇಳಲಾಗಿತ್ತು.
ಮಾರುಕಟ್ಟೆ ವಿಶ್ಲೇಷಣಾ ಸಂಸ್ಥೆ ಸೆನ್ಸರ್ ಟವರ್‌ನ ಮಾಹಿತಿಯ ಪ್ರಕಾರ, ಥ್ರೆಡ್ಸ್ ಜುಲೈ 6 ರಂದು ಪ್ರಾರಂಭವಾದಾಗಿನಿಂದ ಅದರ ಟ್ರಾಫಿಕ್ ಶೇಕಡಾ 75 ರಷ್ಟು ಕುಸಿದಿದೆ. ಏತನ್ಮಧ್ಯೆ, ಥ್ರೆಡ್ಸ್ ಅಪ್ಲಿಕೇಶನ್‌ನಲ್ಲಿ ಬಳಕೆದಾರರು ಕಳೆಯುವ ಸರಾಸರಿ ಸಮಯವು iOS ನಲ್ಲಿ 19 ನಿಮಿಷಗಳಿಂದ 4 ನಿಮಿಷಗಳಿಗೆ ಮತ್ತು Android ನಲ್ಲಿ 21 ನಿಮಿಷಗಳಿಂದ 5 ನಿಮಿಷಗಳಿಗೆ ಇಳಿದಿದೆ ಎಂದು ಡೇಟಾ ತೋರಿಸಿದೆ.
ಥ್ರೆಡ್ಸ್ ಇದು ಇದುವರೆಗೆ ಅತ್ಯಂತ ವೇಗವಾಗಿ ಬೆಳೆಯುತ್ತಿರುವ ಅಪ್ಲಿಕೇಶನ್ ಆಗಿದ್ದು, ಪ್ರಾರಂಭವಾದ ಕೇವಲ 5 ದಿನಗಳಲ್ಲಿ 100 ಮಿಲಿಯನ್‌ಗಿಂತಲೂ ಹೆಚ್ಚು ಸಕ್ರಿಯ ಬಳಕೆದಾರರನ್ನು ಹೊಂದಿದ್ದು, OpenAI ಯ ChatGPTಗಳ ಜನಪ್ರಿಯತೆಯ ರೇಟಿಂಗ್‌ಗಳನ್ನು ಸಹ ಮೀರಿಸಿದೆ. ಡೇಟಾ ಡಾಟ್ ಎಐ ಇಂಟೆಲಿಜೆನ್ಸ್ ಪ್ರಕಾರ ಮೆಟಾದ ಥ್ರೆಡ್ಸ್ ಸಾಮಾಜಿಕ ಮಾಧ್ಯಮ ಅಪ್ಲಿಕೇಶನ್ ಅನ್ನು ಪ್ರಪಂಚದಾದ್ಯಂತ 184 ಮಿಲಿಯನ್ ಬಾರಿ ಡೌನ್‌ಲೋಡ್ ಮಾಡಲಾಗಿದೆ.
ಥ್ರೆಡ್ಸ್ ಟ್ರಾಫಿಕ್ ಕಡಿಮೆಯಾಗುತ್ತಿರುವುದೇಕೆ?: ಆ್ಯಪ್ ತಾನು ಹೇಗಿರಬೇಕು ಎಂಬುದರ ಸ್ಪಷ್ಟತೆಯ ಕೊರತೆಯಿಂದ ಥ್ರೆಡ್ಸ್ ಬಳಕೆದಾರರನ್ನು ಕಳೆದುಕೊಳ್ಳಲು ಪ್ರಮುಖ ಕಾರಣವಾಗಿದೆ ಎನ್ನಲಾಗಿದೆ. ಪ್ರಾರಂಭದಲ್ಲಿ ಅತೃಪ್ತ ಟ್ವಿಟರ್ ಬಳಕೆದಾರರನ್ನು ಇನ್ಸ್ಟಾಗ್ರಾಮ್ ಮೂಲಕ ಥ್ರೆಡ್ಸ್ಗೆ ಕರೆತರಲು ಪ್ರಯತ್ನಿಸಲಾಗಿತ್ತು. ಆದಾಗ್ಯೂ, ಥ್ರೆಡ್ಸ್ ಮತ್ತು ಟ್ವಿಟರ್ ವಿಭಿನ್ನ ಗ್ರಾಹಕರನ್ನು ಗುರಿಯಾಗಿರಿಸಿಕೊಂಡಿವೆ ಎಂದು ತೋರುತ್ತದೆ.
ಕಳೆದ ಕೆಲ ವರ್ಷಗಳಲ್ಲಿ ಟ್ವಿಟರ್ ಸುದ್ದಿ ಮತ್ತು ರಾಜಕೀಯದ ವೇದಿಕೆ ಎಂದು ಗುರುತಿಸಿಕೊಂಡಿದೆ. ಪತ್ರಕರ್ತರು, ಪ್ರಸಿದ್ಧ ವ್ಯಕ್ತಿಗಳು, ಕ್ರೀಡಾಪಟುಗಳು ಮತ್ತು ರಾಜಕಾರಣಿಗಳಂತಹ ಜನಪ್ರಿಯ ವ್ಯಕ್ತಿಗಳು ತಮ್ಮ 'ರಾಜಕೀಯ' ಮತ್ತು ಕೆಲವೊಮ್ಮೆ ವಿವಾದಾತ್ಮಕ ಅಭಿಪ್ರಾಯಗಳನ್ನು ಇಲ್ಲಿ ಹಂಚಿಕೊಳ್ಳುತ್ತಾರೆ. ಇದಕ್ಕೆ ಹೋಲಿಸಿದರೆ ಇನ್ಸ್ಟಾಗ್ರಾಮ್ ಮತ್ತು ಇತರ ಮೆಟಾ ಆ್ಯಪ್ಗಳು ರಾಜಕೀಯದಿಂದ ದೂರವಿರಲು ಬಯಸುತ್ತವೆ ಮತ್ತು ಚಿತ್ರಗಳು ಮತ್ತು ವೀಡಿಯೊಗಳ ಶೇರಿಂಗ್ಗೆ ಹೆಚ್ಚಿನ ಪ್ರಾಧಾನ್ಯತೆ ನೀಡುತ್ತವೆ.
ಥ್ರೆಡ್ಸ್ ಇದು ತನ್ನನ್ನು ರಾಜಕೀಯ ಅಥವಾ ವಿವಾದಾತ್ಮಕ ಸುದ್ದಿಗಳಲ್ಲಿ ತೊಡಗಿಸಿಕೊಳ್ಳಲು ಬಯಸುವುದಿಲ್ಲ ಎಂದು ಇನ್ಸ್ಟಾಗ್ರಾಮ್ ಮತ್ತು ಥ್ರೆಡ್‌ಗಳ ಮುಖ್ಯಸ್ಥ ಆಡಮ್ ಮೊಸ್ಸೆರಿ ಸ್ಪಷ್ಟಪಡಿಸಿದ್ದಾರೆ. ಸುದ್ದಿ ಮತ್ತು ರಾಜಕೀಯ ವಿಷಯವನ್ನು ಅಳವಡಿಸಿಕೊಳ್ಳಲು ಥ್ರೆಡ್ಸ್ನ ಹಿಂಜರಿಕೆಯು, ಅದು ಯಾವ ರೀತಿಯ ಗ್ರಾಹಕರನ್ನು ಸೆಳೆಯಲು ಬಯಸುತ್ತಿದೆ ಎಂಬುದರ ಬಗ್ಗೆ ಗೊಂದಲ ಮೂಡಿಸುತ್ತಿದೆ. ಸ್ಪ್ಯಾಮ್ ಖಾತೆಗಳ ಸಂಖ್ಯೆಯನ್ನು ಕಡಿಮೆಗೊಳಿಸಲು ಥ್ರೆಡ್ಸ್ ಪೋಸ್ಟ್‌ಗಳ ಸಂಖ್ಯೆ ಮೇಲೆ ಮಿತಿಯನ್ನು ಪರಿಚಯಿಸುವ ಪ್ರಕ್ರಿಯೆಯಲ್ಲಿದೆ.
ಇದನ್ನೂ ಓದಿ : 2023ರಲ್ಲಿ ISROಗೆ ಬಿಡುವಿಲ್ಲದ ವರ್ಷ; ಇನ್ನೂ ಯಾವೆಲ್ಲ ಉಪಗ್ರಹ ಉಡಾವಣೆ? ಇಲ್ಲಿದೆ ಮಾಹಿತಿ
