ಟೆಲಿಗ್ರಾಮ್ ಹೊಸ ಅಪ್ಡೇಟ್: ಕಸ್ಟಮ್ ವಾಲ್​ಪೇಪರ್, ಶೇರೆಬಲ್ ಚಾಟ್ ಫೋಲ್ಡರ್

ಜನಪ್ರಿಯ ಮೆಸೇಜಿಂಗ್ ಆ್ಯಪ್ ಟೆಲಿಗ್ರಾಮ್ ಹೊಸ ಅಪ್ಡೇಟ್​ ಬಿಡುಗಡೆ ಮಾಡಿದೆ. ಚಾಟ್​ ಪೋಲ್ಡರ್​ಗಳನ್ನು ಹಂಚಿಕೊಳ್ಳಬಹುದಾದ ಹೊಸ ವೈಶಿಷ್ಟ್ಯವನ್ನು ಆ್ಯಪ್ ಜಾರಿಗೆ ತಂದಿದೆ.

ಸ್ಯಾನ್ ಫ್ರಾನ್ಸಿಸ್ಕೋ : ಟೆಲಿಗ್ರಾಮ್ ಮೆಸೆಂಜರ್ ತನ್ನ ಅಪ್ಲಿಕೇಶನ್​​ನಲ್ಲಿ ಹಂಚಿಕೊಳ್ಳಬಹುದಾದ ಚಾಟ್ ಫೋಲ್ಡರ್‌ಗಳು (shareable chat folders), ಕಸ್ಟಮ್ ವಾಲ್‌ಪೇಪರ್‌ಗಳು ಮತ್ತು ಇನ್ನೂ ಹೆಚ್ಚಿನ ವೈಶಿಷ್ಟ್ಯಗಳನ್ನು ಹೊಂದಿರುವ ಅಪ್ಡೇಟ್​ ಹೊರತಂದಿದೆ. ಹೊಸ ಅಪ್‌ಡೇಟ್ ಬಳಕೆದಾರರಿಗೆ ಸಂಪೂರ್ಣ ಚಾಟ್ ಫೋಲ್ಡರ್‌ಗಳನ್ನು ಒಂದೇ ಲಿಂಕ್‌ನೊಂದಿಗೆ ಹಂಚಿಕೊಳ್ಳಲು, ವೈಯಕ್ತಿಕ ಚಾಟ್‌ಗಳಿಗಾಗಿ ಕಸ್ಟಮ್ ವಾಲ್‌ಪೇಪರ್‌ಗಳನ್ನು ರಚಿಸಲು, ಯಾವುದೇ ಚಾಟ್‌ನಲ್ಲಿ ವೆಬ್ ಅಪ್ಲಿಕೇಶನ್‌ಗಳನ್ನು ಬಳಸಲು ಮತ್ತು ಇನ್ನೂ ಹೆಚ್ಚಿನ ಫೀಚರ್​ಗಳನ್ನು ನೀಡುತ್ತದೆ ಎಂದು ಕಂಪನಿಯ ಹೇಳಿಕೊಂಡಿದೆ.

ಒಂದು ಟ್ಯಾಪ್‌ನೊಂದಿಗೆ ಬಳಕೆದಾರರು ಫೋಲ್ಡರ್ ಅನ್ನು ರಚಿಸಲು ಮತ್ತು ಎಲ್ಲಾ ಚಾಟ್‌ಗಳನ್ನು ಅದಕ್ಕೆ ತಕ್ಷಣವೇ ಸೇರಿಸಲು ಸಾಧ್ಯವಾಗುತ್ತದೆ. ನೀವು ಯಾವುದೇ ಪಬ್ಲಿಕ್ ಚಾಟ್‌ಗಳನ್ನು ಫೋಲ್ಡರ್​ಗೆ ಸೇರಿಸಬಹುದು. ಹಾಗೆಯೇ ನೀವು ಆ್ಯಡ್ಮಿನ್ ಅಧಿಕಾರ ಹೊಂದಿರುವ ಚಾಟ್​ಗಳನ್ನು ಇದಕ್ಕೆ ಸೇರಿಸಬಹುದು ಎಂದು ಟೆಲಿಗ್ರಾಮ್ ಬ್ಲಾಗ್‌ಪೋಸ್ಟ್‌ನಲ್ಲಿ ಹೇಳಿದೆ.

ನಿರ್ದಿಷ್ಟ ಚಾಟ್​ಗಳಲ್ಲಿ ಈಗ ನಿಮ್ಮ ಮೆಚ್ಚಿನ ಚಿತ್ರಗಳು ಮತ್ತು ಬಣ್ಣಗಳ ಸಂಯೋಜನೆಯನ್ನು ಕಸ್ಟಮ್ ವಾಲ್ ಪೇಪರ್​ ಆಗಿ ಮಾಡಿಕೊಳ್ಳಬಹುದು. ಅಂದರೆ ಯಾವುದೇ ಒಂದು ಚಾಟ್​ನಲ್ಲಿ ಕಸ್ಟಮ್ ವಾಲ್ ಪೇಪರ್ ಸೆಟ್ ಮಾಡಿಕೊಳ್ಳಬಹುದು. ವಾಲ್‌ಪೇಪರ್ ಬದಲಾಯಿಸಲು ಚಾಟ್ ಹೆಡರ್‌ಗೆ ಹೋಗಿ ಮತ್ತು Android ನಲ್ಲಿ 'ವಾಲ್‌ಪೇಪರ್ ಹೊಂದಿಸಿ' (Set Wallpaper) ಕ್ಲಿಕ್ ಮಾಡಿ ಅಥವಾ ಪ್ರೊಫೈಲ್ ತೆರೆಯಿರಿ ಮತ್ತು iOS ನಲ್ಲಿ 'ವಾಲ್‌ಪೇಪರ್ ಬದಲಿಸಿ' ಟ್ಯಾಪ್ ಮಾಡಿ. ಇದಲ್ಲದೆ, ಟೆಲಿಗ್ರಾಮ್ ಕೂಡ 'ಉತ್ತಮ ಬಾಟ್‌ಗಳ'ನ್ನು ತಯಾರಿಸಲು ಕಾರ್ಯೋನ್ಮುಖವಾಗಿದೆ.

ಇತ್ತೀಚಿನ ಅಪ್ಡೇಟ್​ ಯಾವುದೇ ಚಾಟ್‌ನಲ್ಲಿ ಪ್ರಾರಂಭಿಸಬಹುದಾದ ತಡೆರಹಿತ ವೆಬ್ ಅಪ್ಲಿಕೇಶನ್‌ಗಳ ಏಕೀಕರಣವನ್ನು ಒಳಗೊಂಡಿದೆ. ಈ ಬಾಟ್‌ಗಳನ್ನು ಪ್ರೈವೇಟ್​ ಅಥವಾ ಗ್ರೂಪ್ ಚಾಟ್‌ಗಳ ಮೂಲಕ ಮಾತ್ರವಲ್ಲದೆ ಸಹಭಾಗಿತ್ವದಲ್ಲಿ ಕೂಡ ಬಳಸಬಹುದು. ಈ ವೈಶಿಷ್ಟ್ಯವನ್ನು ಬೆಂಬಲಿಸುವ ಬಾಟ್‌ಗಳ ವೆಬ್ ಅಪ್ಲಿಕೇಶನ್‌ಗಳನ್ನು ನೇರ ಲಿಂಕ್ ಮೂಲಕ ಅಥವಾ ಟೆಲಿಗ್ರಾಮ್‌ನಲ್ಲಿನ ಯಾವುದೇ ಚಾಟ್‌ನಲ್ಲಿ ಬಾಟ್​ನ ಬಳಕೆದಾರರ ಹೆಸರನ್ನು ನಮೂದಿಸುವ ಮೂಲಕ ಪ್ರವೇಶಿಸಬಹುದು ಎಂದು ಕಂಪನಿ ಹೇಳಿದೆ.

ಟೆಲಿಗ್ರಾಮ್ ಇದು ರಷ್ಯಾದ ವಾಣಿಜ್ಯೋದ್ಯಮಿ ಪಾವೆಲ್ ಡುರೊವ್ ಎಂಬುವರು ಸ್ಥಾಪಿಸಿದ ಬಹು ಪ್ಲಾಟ್‌ಫಾರ್ಮ್ ಮೆಸೇಜಿಂಗ್ ಆ್ಯಪ್ ಆಗಿದೆ. ಆದಾಗ್ಯೂ ಇದನ್ನು ರಷ್ಯಾದಲ್ಲಿ ತಾತ್ಕಾಲಿಕವಾಗಿ ನಿಷೇಧಿಸಲಾಗಿದೆ ಮತ್ತು ಯಾವುದೇ ಸರ್ಕಾರ ಅಥವಾ ಕಂಪನಿಯೊಂದಿಗೆ ಯಾವುದೇ ಸಂಬಂಧವನ್ನು ಹೊಂದಿಲ್ಲ. ಇದನ್ನು ಪ್ರಥಮ ಬಾರಿಗೆ 2013 ರ ಕೊನೆಯಲ್ಲಿ iOS ಮತ್ತು Android ಗಾಗಿ ಆರಂಭಿಸಲಾಯಿತು. ಈಗ ಅಂದಾಜು 550 ಮಿಲಿಯನ್ ಮಾಸಿಕ ಬಳಕೆದಾರರನ್ನು ಹೊಂದಿದೆ.

ಟೆಲಿಗ್ರಾಮ್​​ನ ಗೌಪ್ಯತೆ, ಎನ್‌ಕ್ರಿಪ್ಶನ್ ಮತ್ತು ಓಪನ್ ಸೋರ್ಸ್ API ಮೇಲೆ ಅದರ ಗಮನ ಇವು ಆ್ಯಪ್​​ನ ವಿಶೇಷತೆಗಳಾಗಿವೆ. ಅಧಿಕೃತ ಟೆಲಿಗ್ರಾಮ್ ಅಪ್ಲಿಕೇಶನ್‌ಗಳು ಮತ್ತು ವೆಬ್ ಇಂಟರ್‌ಫೇಸ್‌ ಬಳಸಲು ಲೆಕ್ಕವಿಲ್ಲದಷ್ಟು ಅನಧಿಕೃತ ಕ್ಲೈಂಟ್‌ಗಳಿವೆ. ಇವು ಒಂದೇ ಸಾಧನದಲ್ಲಿ ಬಹು ಖಾತೆಗಳನ್ನು ಬಳಸಲು ಅವಕಾಶ ನೀಡುತ್ತವೆ. ಟೆಲಿಗ್ರಾಮ್‌ ಪ್ರಮುಖವಾಗಿ ಇತರ ಮೆಸೇಜಿಂಗ್ ಆ್ಯಪ್​ಗಳಂತೆಯೇ ಕೆಲಸ ಮಾಡುತ್ತದೆ.

ಇದನ್ನೂ ಓದಿ : ಟ್ವಿಟರ್ ಯೂಟರ್ನ್: ಪೇ ಮಾಡದಿದ್ದರೂ ಅನೇಕರಿಗೆ ಮರಳಿ ಸಿಕ್ಕ ಬ್ಲೂಟಿಕ್!