ಸ್ಯಾನ್ ಫ್ರಾನ್ಸಿಸ್ಕೋ (ಅಮೆರಿಕ) : ಸ್ಪೈವೇರ್ ಸಾಫ್ಟ್ವೇರ್ (ಗೂಢಚಾರಿಕೆ ಸಾಫ್ಟ್ವೇರ್) ತಯಾರಕ ಕಂಪನಿ ಲೆಟ್ ಮಿ ಸ್ಪೈ (LetMeSpy) ತನ್ನ ಎಲ್ಲ ಕಾರ್ಯಾಚರಣೆಗಳನ್ನು ಸ್ಥಗಿತಗೊಳಿಸಿದೆ. ಹ್ಯಾಕರ್ಗಳು ಕಂಪನಿಯ ಸರ್ವರ್ಗಳನ್ನು ಹ್ಯಾಕ್ ಮಾಡಿ ಸರ್ವರ್ನಲ್ಲಿದ್ದ ಸಂಪೂರ್ಣ ಡೇಟಾವನ್ನು ಡಿಲೀಟ್ ಮಾಡಿದ ನಂತರ ಲೆಟ್ ಮಿ ಸ್ಪೈ ಕಂಪನಿಯನ್ನೇ ಮುಚ್ಚುವ ನಿರ್ಧಾರಕ್ಕೆ ಬಂದಿದೆ.
ಈ ಬಗ್ಗೆ ತನ್ನ ವೆಬ್ಸೈಟ್ನಲ್ಲಿ ಮಾಹಿತಿ ನೀಡಿರುವ ಕಂಪನಿ, ಆಗಸ್ಟ್ ಅಂತ್ಯದ ವೇಳೆಗೆ ಸಂಪೂರ್ಣ ಕಾರ್ಯಾಚರಣೆಯನ್ನು ನಿಲ್ಲಿಸುವುದಾಗಿ ಹೇಳಿದೆ. ಬಳಕೆದಾರರು ಇನ್ನು ಮುಂದೆ ತನ್ನ ಸೇವೆಗಳಿಗೆ ಲಾಗಿನ್ ಆಗದಂತೆ ಅಥವಾ ಹೊಸ ಅಕೌಂಟ್ ರಚಿಸದಂತೆ ಬ್ಲಾಕ್ ಮಾಡುತ್ತಿದೆ.
"ಜೂನ್ 21, 2023ರಂದು ನಡೆದ ಡೇಟಾ ಸುರಕ್ಷತೆಯ ಧಕ್ಕೆಯ ಘಟನೆಯಿಂದಾಗಿ, ಭದ್ರತಾ ಕಾರಣಗಳಿಗಾಗಿ ಬಳಕೆದಾರರ ಖಾತೆಗಳಿಗೆ ಪ್ರವೇಶವನ್ನು ನಿರ್ಬಂಧಿಸಲಾಗಿದೆ. ಆ ದಿನಾಂಕದ ನಂತರ, ಲೆಟ್ ಮಿ ಸ್ಪೈ ಸೇವೆಯನ್ನು ನಿಷ್ಕ್ರಿಯಗೊಳಿಸಲಾಗಿದೆ. ಜೊತೆಗೆ ಬಳಕೆದಾರರ ಖಾತೆಗಳಿಗೆ ಲಾಗ್ ಇನ್ ಮಾಡುವ ಮತ್ತು ಸೈಟ್ನಲ್ಲಿ ಹೊಸ ಬಳಕೆದಾರ ಖಾತೆಗಳನ್ನು ನೋಂದಾಯಿಸುವ ಆಯ್ಕೆಯನ್ನು ನಿಷ್ಕ್ರಿಯಗೊಳಿಸಲಾಗಿದೆ." ಎಂದು ಕಂಪನಿ ಹೇಳಿದೆ.
ಸದ್ಯ ಕಾರ್ಯನಿರ್ವಹಿಸದ ಲೆಟ್ ಮಿ ಸ್ಪೈ ಲಾಗಿನ್ ಪುಟದಲ್ಲಿನ ಪ್ರತ್ಯೇಕ ಸೂಚನೆಯ ಪ್ರಕಾರ, ಕಂಪನಿಯ ಸರ್ವರ್ಗಳನ್ನು ಹ್ಯಾಕ್ ಮಾಡಿರುವ ಹ್ಯಾಕರ್ ಅದರಲ್ಲಿನ ಡೇಟಾವನ್ನು ಸಹ ಅಳಿಸಿದ್ದಾರೆ ಎಂದು ಹೇಳಲಾಗಿದೆ.
ಹ್ಯಾಕಿಂಗ್ ಘಟನೆಯಲ್ಲಿ ಲೆಟ್ ಮಿ ಸ್ಪೈ ವೆಬ್ಸೈಟ್ನ ಡೇಟಾಬೇಸ್ಗೆ ಪ್ರವೇಶ ಪಡೆಯಲಾಗಿದೆ, ಡೇಟಾ ಡೌನ್ಲೋಡ್ ಮಾಡಲಾಗಿದೆ ಮತ್ತು ಡೇಟಾವನ್ನು ಅಳಿಸಲಾಗಿದೆ. ಬಳಕೆದಾರರ ಲಾಗಿನ್ ಇಮೇಲ್ ಐಡಿ, ಅವರ ಫೋನ್ ಕರೆಗಳ ಲಾಗ್ಗಳು, ಎಸ್ಎಂಎಸ್ಗಳು ಮತ್ತು ಲೊಕೇಶನ್ ಡೇಟಾ ಹೀಗೆ ಎಲ್ಲ ಡೇಟಾಗೆ ಅನಧಿಕೃತವಾಗಿ ಹ್ಯಾಕರ್ಗಳು ಪ್ರವೇಶ ಪಡೆದಿದ್ದಾರೆ ಎಂದು ಕಂಪನಿ ತಿಳಿಸಿದೆ.
ಲೆಟ್ ಮಿ ಸ್ಪೈ ಎಂಬುದು ಒಬ್ಬರಿಗೆ ಗೊತ್ತಾಗದಂತೆ ಅವರ ಮೊಬೈಲ್ನಲ್ಲಿ ಇನ್ಸ್ಟಾಲ್ ಮಾಡಿ, ಅವರ ಫೋನ್ನಲ್ಲಿ ನಡೆಯುವ ಎಲ್ಲ ಚಟುವಟಿಕೆಗಳನ್ನು ಗಮನಿಸಲು ಸಹಾಯ ಮಾಡುವ ಗೂಢಚಾರಿಕೆ ಆ್ಯಪ್ ಆಗಿದೆ. ಬಳಕೆದಾರರು ತಮ್ಮ ಯೂಸರ್ ಅಕೌಂಟ್ನಲ್ಲಿನ ಮಾಹಿತಿ ಪಡೆಯಲು ಬಯಸಿದರೆ ಅಂಥವರು ಸೆಪ್ಟೆಂಬರ್ 30, 2023ರೊಳಗೆ ವೈಯಕ್ತಿಕವಾಗಿ ಕಂಪನಿಯೊಂದಿಗೆ ಸಂಪರ್ಕ ಸಾಧಿಸಬೇಕೆಂದು ಕಂಪನಿ ಹೇಳಿದೆ.
ಮೊಬೈಲ್ ಸ್ಪೈವೇರ್ ಎಂಬುದು ಸ್ಮಾರ್ಟ್ಫೋನ್ನಲ್ಲಿ ಇನ್ಸ್ಟಾಲ್ ಮಾಡಬಹುದಾದ ಸಾಫ್ಟ್ವೇರ್ ಅಥವಾ ಅಪ್ಲಿಕೇಶನ್ ಆಗಿದ್ದು, ಇದು ಫೋ ನ್ನಲ್ಲಿನ ಚಟುವಟಿಕೆಗಳನ್ನು ದೂರದಿಂದಲೇ ಮೇಲ್ವಿಚಾರಣೆ ಮಾಡಲು ಬೇರೊಬ್ಬರಿಗೆ ಅನುವು ಮಾಡಿಕೊಡುತ್ತದೆ. ಸ್ಪೈವೇರ್ ಪ್ರಕಾರವನ್ನು ಅವಲಂಬಿಸಿ ಇದು ಫೋನ್ ನಂಬರ್, ಕರೆ ದಿನಾಂಕ ಮತ್ತು ಸಮಯ, ಕಾಲ್ ಹಿಸ್ಟರಿ, SMS, ಕಾಂಟ್ಯಾಕ್ಟ್ಗಳು, ಇಂಟರ್ನೆಟ್ ಬ್ರೌಸಿಂಗ್, ಫೋನ್ ಲೊಕೇಶನ್, ಫೋನ್ನಲ್ಲಿ ತೆಗೆದ ಫೋಟೋಗಳು, ಇಮೇಲ್ ಮುಂತಾದವುಗಳನ್ನು ಬೇರೊಬ್ಬರಿಗೆ ರವಾನಿಸುತ್ತದೆ.
ಇದನ್ನೂ ಓದಿ : Zuck vs Musk fight: ಜುಕರ್ಬರ್ಗ್ ವಿರುದ್ಧ ಕೇಜ್ ಫೈಟ್ ಟ್ವಿಟರ್ನಲ್ಲಿ ನೇರಪ್ರಸಾರ; ಮಸ್ಕ್ ಘೋಷಣೆ
