ಬೀಜಿಂಗ್ : ಸೆಮಿಕಂಡಕ್ಟರ್ ಮಾರುಕಟ್ಟೆಯಲ್ಲಿ ಭಾರಿ ಕುಸಿತವಾಗಿರುವ ಕಾರಣದಿಂದ ಸ್ಮಾರ್ಟ್ಫೋನ್ ತಯಾರಕ OPPO ತನ್ನ ಚಿಪ್ ವಿನ್ಯಾಸದ ಅಂಗಸಂಸ್ಥೆಯಾದ Zeku ಅನ್ನು ಮುಚ್ಚಿದೆ ಎಂದು ಮಾಧ್ಯಮಗಳು ಶುಕ್ರವಾರ ವರದಿ ಮಾಡಿವೆ. ಸೌತ್ ಚೀನಾ ಮಾಧ್ಯಮಗಳ ಪ್ರಕಾರ, ಈ ಬಗ್ಗೆ ಒಪ್ಪೊ ಪ್ರಕಟಣೆ ಹೊರಡಿಸಿದ್ದು, ಜಾಗತಿಕ ಆರ್ಥಿಕತೆ ಮತ್ತು ಸ್ಮಾರ್ಟ್ಫೋನ್ ಮಾರುಕಟ್ಟೆಯಲ್ಲಿನ ಅನಿಶ್ಚಿತತೆಗಳ ಕಾರಣದಿಂದ ಇಂಥದೊಂದು ಕಷ್ಟಕರ ನಿರ್ಧಾರ ತಳೆಯಲಾಗಿದೆ ಎಂದು ಹೇಳಿದೆ. ಘಟಕವನ್ನು ಬಂದ್ ಮಾಡುತ್ತಿರುವ ಬಗ್ಗೆ ನೌಕರರಿಗೆ ಒಂದು ದಿನಕ್ಕಿಂತ ಕಡಿಮೆ ಅವಧಿಯ ನೋಟಿಸ್ ನೀಡಲಾಗಿದೆ ಎಂದು ವರದಿ ಹೇಳಿದೆ.
ಜಾಗತಿಕ ತಂತ್ರಜ್ಞಾನ ಬ್ರ್ಯಾಂಡ್ ಒಪ್ಪೊ ತನ್ನ ಸಾಧನಗಳಲ್ಲಿ ಬಳಸಬಹುದಾದ ಚಿಪ್‌ಗಳನ್ನು ವಿನ್ಯಾಸಗೊಳಿಸಲು 2019 ರಲ್ಲಿ Zeku ಅನ್ನು ಸ್ಥಾಪಿಸಿತ್ತು. ಶಿಯೋಮಿ ಸೇರಿದಂತೆ ಇತರ ಸ್ಮಾರ್ಟ್ಫೋನ್ ತಯಾರಕರು ತಮ್ಮದೇ ಆದ ಚಿಪ್ ವಿನ್ಯಾಸ ಕಂಪನಿಗಳನ್ನು ಹೊಂದಿವೆ. ಸುಧಾರಿತ ಸೆಮಿಕಂಡಕ್ಟರ್ಗಳ ವಿಷಯದಲ್ಲಿ ಅಮೆರಿಕವು ರಫ್ತು ನಿರ್ಬಂಧಗಳನ್ನು ಹೆಚ್ಚಿಸಿದ ಕಾರಣದಿಂದ ಚೀನಾದಲ್ಲಿ ಚಿಪ್ ತಯಾರಿಕೆಯ ಮೇಲೆ ಪ್ರತಿಕೂಲ ಪರಿಣಾಮವಾಗಿರುವುದರಿಂದ ಕಂಪನಿ ಈ ಕ್ರಮಕ್ಕೆ ಮುಂದಾಗಿದೆ ಎನ್ನಲಾಗಿದೆ.
ಚೀನಾ ಸೆಮಿಕಂಡಕ್ಟರ್ ಇಂಡಸ್ಟ್ರಿ ಅಸೋಸಿಯೇಷನ್ (CSIA) ಇಂಟಿಗ್ರೇಟೆಡ್ ಸರ್ಕ್ಯೂಟ್ ವಿನ್ಯಾಸದ ಅಧ್ಯಕ್ಷ ವೀ ಶಾಜುನ್ ಪ್ರಕಾರ, ಕಳೆದ ವರ್ಷ ಚೀನಾದಲ್ಲಿ 3,243 ಫ್ಯಾಬ್ಲೆಸ್ ಚಿಪ್ ತಯಾರಿಕಾ ಕಂಪನಿಗಳಿದ್ದವು. ಆದರೆ, ಇವುಗಳ ಪೈಕಿ 566 ಮಾತ್ರ 100 ಮಿಲಿಯನ್ ಯುವಾನ್ ($ 14.4 ಮಿಲಿಯನ್) ಗಿಂತ ಹೆಚ್ಚಿನ ಮಾರಾಟವನ್ನು ಹೊಂದಿವೆ ಎಂದು ವರದಿ ಉಲ್ಲೇಖಿಸಿದೆ. ಜಾಗತಿಕ ಸೆಮಿಕಂಡಕ್ಟರ್ ಮಾರುಕಟ್ಟೆ ಆದಾಯವು 2023 ರಲ್ಲಿ ಶೇಕಡಾ 11.2 ರಷ್ಟು ಕಡಿಮೆಯಾಗಿ 532 ಶತಕೋಟಿ ಡಾಲರ್ಗೆ ತಲುಪಲಿದೆ ಎಮದು ನಿರೀಕ್ಷಿಸಲಾಗಿದೆ. 2022 ರಲ್ಲಿ ಸೆಮಿಕಂಡಕ್ಟರ್ ಮಾರುಕಟ್ಟೆ ಒಟ್ಟು 599.6 ಬಿಲಿಯನ್ ಡಾಲರ್ ಆಗಿತ್ತು. ಇದು 2021 ರಿಂದ ಶೇಕಡಾ 0.2 ರ ಕನಿಷ್ಠ ಬೆಳವಣಿಗೆಯಾಗಿದೆ. ಪಿಸಿ, ಟ್ಯಾಬ್ಲೆಟ್ ಮತ್ತು ಸ್ಮಾರ್ಟ್ಫೋನ್ ಸೆಮಿಕಂಡಕ್ಟರ್ ಮಾರುಕಟ್ಟೆಗಳು ಸ್ಥಗಿತಗೊಳ್ಳುತ್ತಿವೆ.
ಕಂಪ್ಯೂಟರ್ ಚಿಪ್ ಒಂದು ಸಣ್ಣ ಎಲೆಕ್ಟ್ರಾನಿಕ್ ಸರ್ಕ್ಯೂಟ್ ಆಗಿದ್ದು, ಇದನ್ನು ಇಂಟಿಗ್ರೇಟೆಡ್ ಸರ್ಕ್ಯೂಟ್ ಎಂದೂ ಕರೆಯಲಾಗುತ್ತದೆ. ಇದು ಹೆಚ್ಚಿನ ರೀತಿಯ ಎಲೆಕ್ಟ್ರಾನಿಕ್ ಸಾಧನಗಳ ಮೂಲ ಅಂಶಗಳಲ್ಲಿ ಒಂದಾಗಿದೆ. ವಿಶೇಷವಾಗಿ ಕಂಪ್ಯೂಟರ್ನ ಪ್ರಮುಖ ಘಟಕವಾಗಿದೆ. ಕಂಪ್ಯೂಟರ್ ಚಿಪ್‌ಗಳು ಚಿಕ್ಕದಾಗಿರುತ್ತವೆ ಮತ್ತು ಸಾಮಾನ್ಯವಾಗಿ ಸಿಲಿಕಾನ್‌ನಿಂದ ರಚಿತವಾಗಿರುವ ಸೆಮಿಕಂಡಕ್ಟರ್‌ಗಳಿಂದ ಮಾಡಲ್ಪಟ್ಟಿರುತ್ತವೆ. ಇದರಲ್ಲಿ ಟ್ರಾನ್ಸಿಸ್ಟರ್‌ಗಳು ಸೇರಿದಂತೆ ಹಲವಾರು ಸಣ್ಣ ಘಟಕಗಳನ್ನು ಅಳವಡಿಸಲಾಗಿರುತ್ತದೆ ಮತ್ತು ಎಲೆಕ್ಟ್ರಾನಿಕ್ ಡೇಟಾ ಸಂಕೇತಗಳನ್ನು ರವಾನಿಸಲು ಬಳಸಲಾಗುತ್ತದೆ.
ಸಣ್ಣ ಗಾತ್ರ, ಕಡಿಮೆ ವೆಚ್ಚ, ಹೆಚ್ಚಿನ ಕಾರ್ಯಕ್ಷಮತೆ ಮತ್ತು ಉತ್ಪಾದನೆಯ ಸುಲಭತೆಯಿಂದಾಗಿ 20 ನೇ ಶತಮಾನದ ಉತ್ತರಾರ್ಧದಲ್ಲಿ ಇವು ಭಾರಿ ಜನಪ್ರಿಯವಾದವು. ಅನಲಾಗ್, ಡಿಜಿಟಲ್ ಮತ್ತು ಮಿಶ್ರ ಸಿಗ್ನಲ್ ಪ್ರಭೇದಗಳನ್ನು ಒಳಗೊಂಡಂತೆ ಕಂಪ್ಯೂಟರ್ ಚಿಪ್‌ಗಳಲ್ಲಿ ಹಲವಾರು ಮೂಲಭೂತ ವರ್ಗೀಕರಣಗಳಿವೆ. ಕಂಪ್ಯೂಟರ್ ಚಿಪ್‌ಗಳ ಈ ವಿಭಿನ್ನ ವರ್ಗೀಕರಣಗಳು ಅವು ಸಂಕೇತಗಳನ್ನು ಹೇಗೆ ರವಾನಿಸುತ್ತವೆ ಮತ್ತು ಶಕ್ತಿಯನ್ನು ನಿರ್ವಹಿಸುತ್ತವೆ ಎಂಬುದನ್ನು ಆಧರಿಸಿವೆ.
ಇದನ್ನೂ ಓದಿ : ಸೀಟ್ ಬೆಲ್ಟ್ ಅಲಾರ್ಮ್ ಸ್ಟಾಪರ್ ಮಾರಾಟ ನಿಲ್ಲಿಸುವಂತೆ ಇ -ಕಾಮರ್ಸ್ ಪ್ಲಾಟ್ಫಾರ್ಮ್ಗಳಿಗೆ ಆದೇಶ
