ಚಾಟ್ ಜಿಪಿಟಿ ಸರ್ಚ್‌ ಇಂಜಿನ್ ಮೂಲಕ ಗೂಗಲ್ಗೆ ತಲೆನೋವು ತಂದಿಟ್ಟ ಮೈಕ್ರೊಸಾಫ್ಟ್ ಇದೀಗ ಮತ್ತೊಂದು ಹೆಜ್ಜೆ ಮುಂದಿಟ್ಟಿದೆ. ಗೂಗಲ್, ಆ್ಯಪಲ್ ವಿರುದ್ಧ ಸಮರಕ್ಕಿಳಿದಿರುವ ಕಂಪನೆ ಐಫೋನ್ ಮತ್ತು ಆ್ಯಂಡ್ರೊಯ್ಡ್ ಸ್ಮಾರ್ಟ್ಫೋನ್ಗಳಿಗಾಗಿ ತನ್ನದೇ ಆದ ಮೊಬೈಲ್ ಗೇಮ್ ಸ್ಟೋರ್ ಅಭಿವೃದ್ಧಿ ಪಡಿಸುವ ಕುರಿತು ಘೋಷಿಸಿದೆ.
ಈ ಗೇಮಿಂಗ್ ಸ್ಟೋರ್ ಅಭಿವೃದ್ಧಿಗಾಗಿ ಮೈಕ್ರೋಸಾಫ್ಟ್ 77 ಶತಕೋಟಿ ಡಾಲರ್‌ಗೆ ವಿಡಿಯೋ ಗೇಮ್ ಡೆವಲಪರ್ ಆಗಿರುವ ಆಕ್ಟಿವಿಸನ್ ಬ್ಲಿಝಾರ್ಡ್ ಸ್ವಾಧೀನಪಡಿಸಿಕೊಳ್ಳಲು ಮುಂದಾಗಿದೆ. ನಿಯಂತ್ರಕಗಳು ಅನುಮೋದಿಸಿದರೆ ಮುಂದಿನ ವರ್ಷದಿಂದಲೇ ಐಫೋನ್ ಮತ್ತು ಆಂಡ್ರಾಯ್ಡ್ ಸ್ಮಾರ್ಟ್ಫೋನ್ಗಳಿಗಾಗಿ ತನ್ನದೇ ಆದ ಮೊಬೈಲ್ ಗೇಮ್ಸ್ ಸ್ಟೋರ್ ಅಭಿವೃದ್ಧಿಪಡಿಸಲು ಮೈಕ್ರೋಸಾಫ್ಟ್ ಯೋಜನೆ ರೂಪಿಸಿದೆ ಎಂದು ಮಾಧ್ಯಮಗಳು ವರದಿ ಮಾಡಿವೆ.
ನಿಯಂತ್ರಕರ ಅನುಮೋದನೆ ಕಡ್ಡಾಯ: ಮೈಕ್ರೋಸಾಫ್ಟ್ ಗೇಮಿಂಗ್ ಮುಖ್ಯಸ್ಥ ಫಿಲ್ ಸ್ಪೆನ್ಸರ್ ಪ್ರಕಾರ, 2024ರಲ್ಲಿ ಜಾರಿಗೆ ಬರುವ ಇಯು ಡಿಜಿಟಲ್ ಮಾರ್ಕೆಟ್ ಆಕ್ಟ್ (ಡಿಎಂಎ) ಅನುಸಾರ ಕಂಪನಿ ತನ್ನದೇ ಆದ ಮೊಬೈಲ್ ಆ್ಯಪ್ ಸ್ಟೋರ್ ರೂಪಿಸುವ ಮಹತ್ವಾಕಾಂಕ್ಷೆ ಹೊಂದಿದೆ. ಐಫೋನ್ ಮತ್ತು ಆ್ಯಂಡ್ರೋಯ್ಡ್ ಫೋನ್ಗಳಲ್ಲಿ ತಮ್ಮ ಅಪ್ಲಿಕೇಶನ್ ಸ್ಟೋರ್ ಲೋಡ್ ಮಾಡಲು ಅನುಮತಿ ಕೇಳುತ್ತದೆ.
ಸದ್ಯ ಸ್ಮಾರ್ಟ್ ಫೋನ್ಗಳಲ್ಲಿ ಗೇಮಿಂಗ್ ಮತ್ತು ಅಪ್ಲಿಕೇಶನ್‌ಗಳ ವಿತರಣೆಯಲ್ಲಿ ಹೆಚ್ಚಾಗಿ ಆ್ಯಪಲ್ ಮತ್ತು ಗೂಗಲ್ ಹಿಡಿತ ಸಾಧಿಸಿದೆ. ಮೈಕ್ರೋಸಾಫ್ಟ್ ಈ ಸ್ಪರ್ಧೆಗೆ ಕಾಲಿಟ್ಟರೆ ಏನು ಗತಿ ಎಂಬ ಕಳವಳ ಟೆಕ್ ಜಗತ್ತಿನ ದಿಗ್ಗಜರಲ್ಲಿ ಮೂಡಿದೆ. ಈ ಹಿಂದೆ ಗೇಮಿಂಗ್ ಆ್ಯಪ್ಗಳಲ್ಲಿ ನಾವು ಕಾಣಿಸಿಕೊಳ್ಳುವ ಸ್ಥಿತಿಯಲ್ಲಿರಲಿಲ್ಲ. ಥರ್ಡ್ ಪಾರ್ಟಿ ಪಾಲುದಾರರಿಂದ ಎಕ್ಸ್ಬಾಕ್ಸ್ಗೆ ನಾವು ಇರಲಿಲ್ಲ. ಆದರೆ ಮುಂದಿನ ದಿನಗಳಲ್ಲಿ ನಾವು ಮೊಬೈಲ್ಗಳಲ್ಲಿ ಹೊಸ ಪ್ರಪಂಚ ಸೃಷ್ಟಿಸಲು ಮುಂದಾಗುತ್ತೇವೆ ಎಂದಿದ್ದಾರೆ.
ಸ್ಪರ್ಧೆ ಹೆಚ್ಚುವ ಸಂಭವ: ಅಮೆರಿಕ, ಯೂರೋಪ್ ಮತ್ತು ಬ್ರಿಟನ್ನಲ್ಲಿ ಅನೇಕ ನಿಯಂತ್ರಣಗಳ ವಿರುದ್ಧ ಮೈಕ್ರೋಸಾಫ್ಟ್ ಹೋರಾಡುತ್ತಿದೆ. ಮೈಕ್ರೋಸಾಫ್ಟ್ ಗೇಮಿಂಗ್ ವಲಯಕ್ಕೆ ಕಾಲಿಟ್ಟರೆ ಇದು ಎಕ್ಸ್ಬಾಕ್ಸ್ ಕನ್ಸೋಲ್ ಮೇಲೆ ಪರಿಣಾಮ ಬೀರಲಿದೆ. ಜಗತ್ತಿನ ಜನಪ್ರಿಯ ಆಟಗಳ ಫ್ರಾಂಚೈಸಿಯಲ್ಲಿ ಒಂದಾಗಿರುವ ಕಾಲ್ ಆಫ್ ಡ್ಯೂಟಿಯ ಡೆವಲಪರ್ ಸ್ವಾಧೀನಪಡಿಸಿಕೊಳ್ಳುವುದರಿಂದ ಸ್ಪರ್ಧೆ ಉಂಟಾಗುವ ಸಾಧ್ಯತೆ ಇದೆ. ಈ ಹಿನ್ನೆಲೆಯಲ್ಲಿ ಮೈಕ್ರೋಸಾಫ್ಟ್ ಅನೇಕ ನಿಯಂತ್ರಕಕ್ಕೆ ಒಳಗಾಗಿದೆ.
ಆಕ್ಟಿವಿಷನ್ ಬ್ಲಿಜಾರ್ಡ್ ಸ್ವಾಧೀನಕ್ಕೆ ಮುಂದಾಗಿರುವ ಮೈಕ್ರೋಸಾಫ್ಟ್ ಪ್ರಸ್ತಾಪಕ್ಕೆ ಯುರೋಪಿಯನ್ ಒಕ್ಕೂಟ ಎಚ್ಚರಿಕೆ ನೀಡಿದೆ. ವಿಡಿಯೋ ಗೇಮಿಂಗ್ ಮಾರುಕಟ್ಟೆಯಲ್ಲಿ ಸ್ಪರ್ಧೆ ಮತ್ತು ಬೆದರಿಕೆ ಕುರಿತು ವರದಿ ಆಗಿದೆ. ವಿಡಿಯೋ ಗೇಮ್ ಡೆವಲಪರ್ ಆಕ್ಟಿವಿಸನ್ ಬ್ಲಿಝಾರ್ಡ್ ಸ್ವಾಧೀನ ಪಡಿಸಿಕೊಳ್ಳುವುದನ್ನು ತಡೆಯಲು ಯುಎಸ್ ಫೆಡರಲ್ ಟ್ರೇಡ್ ಕಮಿಷನ್ (ಎಫ್ಟಿಸಿ) ಮೈಕ್ರೋಸಾಫ್ಟ್ ವಿರುದ್ಧ ಮೊಕದ್ಧಮೆ ಹೂಡಿದೆ. ಈ ಸಂಬಂಧ ಮೈಕ್ರೋಸಾಫ್ಟ್ ಮೇಲ್ಮನವಿ ಸಲ್ಲಿಸಬಹುದು. ಮಾರ್ಚ್ ಗಡುವನ್ನು ಮೀರಿ ಜಾರಿ ವಿಳಂಬಗೊಳಿಸಬಹುದು ಎಂದು ವರದಿ ಹೇಳಿದೆ.
ಇದನ್ನೂ ಓದಿ: 45 ಲಕ್ಷಕ್ಕೆ ಹರಾಜಿನಲ್ಲಿ ಮಾರಾಟವಾಯಿತು ಮೊದಲ ತಲೆಮಾರಿನ ಐಫೋನ್
