ನವದೆಹಲಿ: ಹೊಸ ಐಟಿ ಕಾಯ್ದೆ 2021ರ ಅಡಿ, ಈ ಜುಲೈನಲ್ಲಿ ಭಾರತದಲ್ಲಿ ಬಳಕೆದಾರರಿಂದ ಗೂಗಲ್ಗೆ ದಾಖಲೆಯ 1,37,657 ದೂರುಗಳು ಬಂದಿದ್ದು, 6,89,457 ತಪ್ಪು ಮಾಹಿತಿ ನೀಡುವ ತುಣುಕುಗಳನ್ನು ಅದೇ ತಿಂಗಳು ಗೂಗಲ್ ತೆಗೆದುಹಾಕಿದೆ. ಭಾರತೀಯ ಬಳಕೆದಾರರಿಂದ ಸ್ವೀಕರಿಸಿದ ಹೆಚ್ಚಿನ ದೂರುಗಳು ಹಕ್ಕುಸ್ವಾಮ್ಯ ಉಲ್ಲಂಘನೆಗಳಿಗೆ (135,341) ಸಂಬಂಧಿಸಿವೆ. ಇತರ ವರ್ಗಗಳಲ್ಲಿ ಟ್ರೇಡ್‌ಮಾರ್ಕ್, ನ್ಯಾಯಾಲಯದ ಆದೇಶ, ಗ್ರಾಫಿಕ್ ಲೈಂಗಿಕ ವಿಷಯ, ವಂಚನೆ ಮತ್ತು ಇತರೆ ವಿಷಯಗಳು ಸೇರಿವೆ.
ವಿವಿಧ ಗೂಗಲ್ ಪ್ಲಾಟ್‌ಫಾರ್ಮ್‌ಗಳಲ್ಲಿ ಸ್ಥಳೀಯ ಕಾನೂನುಗಳು ಅಥವಾ ವೈಯಕ್ತಿಕ ಹಕ್ಕುಗಳನ್ನು ಉಲ್ಲಂಘಿಸುತ್ತದೆ ಎಂದು ನಂಬಲಾದ ಮೂರನೇ ವ್ಯಕ್ತಿಯ ವಿಷಯಕ್ಕೆ ಸಂಬಂಧಿಸಿದಂತೆ, ಅದೇ ಅವಧಿಯಲ್ಲಿ ದೇಶದಲ್ಲಿ ಗೊತ್ತುಪಡಿಸಿದ ಕಾರ್ಯವಿಧಾನಗಳ ಮೂಲಕ ಗೂಗಲ್ ಕಂಪನಿಯು ವೈಯಕ್ತಿಕ ಬಳಕೆದಾರರಿಂದ 37,173 ದೂರುಗಳನ್ನು ಸ್ವೀಕರಿಸಿದೆ. ಜೂನ್‌ನಲ್ಲಿ, ಬಳಕೆದಾರರ ದೂರುಗಳ ಆಧಾರದ ಮೇಲೆ ಗೂಗಲ್ 1,11,493 ತಪ್ಪು ಮಾಹಿತಿಗಳನ್ನು ತೆಗೆದುಹಾಕಿದೆ.
ದೂರುಗಳು ವಿವಿಧ ವರ್ಗಗಳನ್ನು ಒಳಗೊಂಡಿರುತ್ತವೆ. ಕೆಲವು ವಿನಂತಿಗಳು ಬೌದ್ಧಿಕ ಆಸ್ತಿ ಹಕ್ಕುಗಳ ಉಲ್ಲಂಘನೆಗೆ ಸಂಬಂಧಿಸಿದ್ದವಾಗಿರಬಹುದು. ಇನ್ನು ಕೆಲವರು ಮಾನನಷ್ಟದಂತಹ ಆಧಾರದ ಮೇಲೆ, ವಿಷಯದ ಪ್ರಕಾರಗಳನ್ನು ನಿಷೇಧಿಸುವ ಸ್ಥಳೀಯ ಕಾನೂನುಗಳ ಉಲ್ಲಂಘನೆಯನ್ನು ಪ್ರತಿಪಾದಿಸಬಹುದು ಎಂದು ಗೂಗಲ್ ಹೇಳಿಕೆಯಲ್ಲಿ ತಿಳಿಸಿದೆ.
ನಮ್ಮ ಬಳಕೆದಾರರ ವರದಿಗಳ ಜೊತೆಗೆ, ಆನ್‌ಲೈನ್‌ನಲ್ಲಿ ಹಾನಿಕಾರಕ ವಿಷಯದ ವಿರುದ್ಧ ಹೋರಾಡಲು ನಾವು ಹೆಚ್ಚು ಪ್ರಯತ್ನ ಮಾಡುತ್ತೇವೆ ಮತ್ತು ನಮ್ಮ ಪ್ಲಾಟ್‌ಫಾರ್ಮ್‌ಗಳಿಂದ ಅದನ್ನು ಪತ್ತೆಹಚ್ಚಲು ಮತ್ತು ತೆಗೆದುಹಾಕಲು ತಂತ್ರಜ್ಞಾನವನ್ನು ಬಳಸುತ್ತೇವೆ ಎಂದು ಅದು ತನ್ನ ಮಾಸಿಕ ಅನುಸರಣೆ ವರದಿಯಲ್ಲಿ ಹೇಳಿದೆ. ತನ್ನ ಸ್ವಯಂಚಾಲಿತ ಪತ್ತೆ ಪ್ರಕ್ರಿಯೆಗಳ ಭಾಗವಾಗಿ, ದೇಶದಲ್ಲಿ 5,51,800 ಖಾತೆಗಳನ್ನು ತೆಗೆದುಹಾಕಲಾಗಿದೆ ಎಂದು ಕಂಪನಿ ಹೇಳಿದೆ.
ಮಾಹಿತಿ ತಂತ್ರಜ್ಞಾನ (ಮಧ್ಯವರ್ತಿ ಮಾರ್ಗಸೂಚಿಗಳು ಮತ್ತು ಡಿಜಿಟಲ್ ಮಾಧ್ಯಮ ನೀತಿಸಂಹಿತೆ) ನಿಯಮಗಳು, 2021 (ಐಟಿ ನಿಯಮಗಳು) ಅನುಸಾರವಾಗಿ, ಗೂಗಲ್ ಸೇರಿದಂತೆ ಇತರ ಸಾಮಾಜಿಕ ಮಾಧ್ಯಮ ಪ್ಲಾಟ್‌ಫಾರ್ಮ್‌ಗಳು ಭಾರತದಲ್ಲಿನ ಬಳಕೆದಾರರಿಂದ ಸ್ವೀಕರಿಸಿದ ದೂರುಗಳ ವಿವರಗಳೊಂದಿಗೆ ಮಾಸಿಕ ಪಾರದರ್ಶಕತೆ ವರದಿಗಳನ್ನು, ಸ್ವಯಂಚಾಲಿತ ಪತ್ತೆಯ ಪರಿಣಾಮವಾಗಿ ತೆಗೆದುಹಾಕುವ ಕ್ರಮಗಳನ್ನು ಪ್ರಕಟಿಸುವುದು ಕಡ್ಡಾಯವಾಗಿದೆ.
ಹಾಗೆಯೇ ಹೊಸ ಐಟಿ ನಿಯಮಗಳು 2021 ರ ಅಡಿಯಲ್ಲಿ, 5 ಮಿಲಿಯನ್ಗೂ ಅಧಿಕ ಬಳಕೆದಾರರನ್ನು ಹೊಂದಿರುವ ದೊಡ್ಡ ಡಿಜಿಟಲ್ ಮತ್ತು ಸಾಮಾಜಿಕ ಮಾಧ್ಯಮ ಪ್ಲಾಟ್‌ಫಾರ್ಮ್‌ಗಳು ಮಾಸಿಕ ಅನುಸರಣೆ ವರದಿಗಳನ್ನು ಪ್ರಕಟಿಸುವುದು ಕಡ್ಡಾಯವಾಗಿದೆ.
ಓದಿ: ಈ ಆ್ಯಪ್‌ಗಳು ನಿಮ್ಮ ಫೋನಲ್ಲಿದ್ರೆ ಅಪಾಯ ಗ್ಯಾರಂಟಿ! ಚೆಕ್ ಮಾಡಿ..
