ನವದೆಹಲಿ: ಇಸ್ರೇಲ್ ಮೂಲದ ಪೆಗಾಸಸ್ ಎಂಬ ಸ್ಪೈವೇರ್ ಅಪ್ಲಿಕೇಶನ್ ದೇಶದಲ್ಲಿ ದೊಡ್ಡ ಸಂಚಲನ ಮೂಡಿಸಿದೆ. ಈಗ ದೊರೆತಿರುವ ಮಾಹಿತಿ ಪ್ರಕಾರ, ಈ ಸಾಫ್ಟ್ವೇರ್ ಅನ್ನು ರಹಸ್ಯವಾಗಿ ಉದ್ದೇಶಿತ ಫೋನ್ ಅಥವಾ ಕಂಪ್ಯೂಟರ್ನಲ್ಲಿ ಇನ್ಸ್ಟಾಲ್ ಮಾಡಿದರೆ, ರಿ ಸೆಟ್ಟಿಂಗ್ ಅಥವಾ ರಿ ಬೂಟಿಂಗ್ ಮೂಲಕ ಅದನ್ನು ಅಳಿಸಿ ಹಾಕಲು ಸಾಧ್ಯವಿಲ್ಲ.
ಸಂಪುಟ ಸಚಿವರು ಸೇರಿದಂತೆ ಪ್ರಮುಖ ರಾಜಕಾರಣಿಗಳು, ನ್ಯಾಯಾಧೀಶರು, ಪತ್ರಕರ್ತರು ಮತ್ತು ಸಾಮಾಜಿಕ ಕಾರ್ಯರ್ತರ ಮೇಲೆ ಇಸ್ರೇಲ್ ಮೂಲದ ಪೆಗಾಸಸ್ ಸಾಫ್ಟ್ವೇರ್ ಮೂಲಕ ಕೇಂದ್ರ ಸರ್ಕಾರ ಕಣ್ಣಿಟ್ಟಿದೆ ಎಂಬ ಪ್ರತಿಪಕ್ಷಗಳ ಆರೋಪ ದೇಶದಲ್ಲಿ ದೊಡ್ಡಮಟ್ಟದ ಚರ್ಚೆಗೆ ಕಾರಣವಾಗಿದೆ.
ದಿ ವೈರ್ ಸೇರಿದಂತೆ 16 ಅಂತಾರಾಷ್ಟ್ರೀಯ ಮಾಧ್ಯಮಗಳು ಕಾರ್ಯಾಚರಣೆ ನಡೆಸಿ ಪೆಗಾಸಸ್ ದಾಳಿಯ ಬಗ್ಗೆ ಬಹಿರಂಗಪಡಿಸಿದ ಬಳಿಕ, ಇದರ ಬಗ್ಗೆ ಜನರಿಗೆ ಕುತೂಹಲ ಹೆಚ್ಚಾಗಿದೆ. ಹಾಗಾಗಿ ಪೆಗಾಸಸ್ ಬಗ್ಗೆ ಮಾಹಿತಿ ಹುಡುಕಾಟ ಹೆಚ್ಚಾಗಿದೆ. ಹುಡುಕುತ್ತಾ ಹೋದಂತೆ ಪೆಗಾಸಸ್ ಬಗ್ಗೆ ಹಲವು ಮಾಹಿತಿಗಳು ಲಭ್ಯವಾಗುತ್ತಿದೆ.
ಓದಿ : 'ಪೆಗಾಸಸ್' ಫೋನ್ ನಂಬರ್‌ ಹ್ಯಾಕ್: ಮೋದಿ ತನಿಖೆಗೊಳಪಡಲಿ, ಶಾ ರಾಜೀನಾಮೆ ನೀಡಲಿ- ಕಾಂಗ್ರೆಸ್ ಪಟ್ಟು
ಪೆಗಾಸಸ್ ಸಾಫ್ಟ್ವೇರ್ ಮಾರಾಟಗಾರ ಆಫ್ರಿಕನ್ ದೇಶವೊಂದರ ಜೊತೆಗೆ 2015 ರಲ್ಲಿ ಮಾಡಿಕೊಂಡ ಒಪ್ಪಂದದ ಪ್ರತಿ ಈಟಿವಿ ಭಾರತ್ಗೆ ಲಭ್ಯವಾಗಿದೆ. ಇದರಲ್ಲಿ ಪೆಗಾಸಸ್ ಸಾಫ್ಟ್ವೇರ್ನ ಇನ್ಸ್ಟಾಲೇಶನ್ ಮತ್ತು ಅದರ ದೃಢತೆಯ ಬಗ್ಗೆ ತಿಳಿಸಲಾಗಿದೆ.
ಒಪ್ಪಂದದಲ್ಲಿ ಪ್ರಮುಖವಾಗಿ ಪೆಗಾಸಸ್ ಬಗ್ಗೆ ಮೂರು ಅಂಶಗಳನ್ನು ಉಲ್ಲೇಖಿಸಲಾಗಿದೆ.
1 ನಿರಂತರ (Persistency): ಪೆಗಾಸಸ್ ಉದ್ದೇಶಿತ ಫೋನ್, ಕಂಪ್ಯೂಟರ್ಗಳಲ್ಲಿ ಇನ್ಸ್ಟಾಲ್ ಮಾಡಿದರೆ, ಬಳಿಕ ಆ ಸಾಧನಗಳನ್ನು ರಿ ಸ್ಟಾರ್ಟ್, ರಿ ಬೂಟ್, ಸ್ವಿಚ್ ಆಫ್ ಮಾಡುವುದು ಅಥವಾ ಬ್ಯಾಟರಿ ತೆಗೆದು ಹಾಕಿದರೂ ಸಾಫ್ಟ್ವೇರ್ ಅಳಿಸಿ ಹೋಗುವುದಿಲ್ಲ.
2. ಫ್ಯಾಕ್ಟರಿ ರಿ ಸೆಟ್ : ಪೆಗಾಸಸ್ ಸಾಫ್ಟ್ವೇರ್ ಫ್ಯಾಕ್ಟರಿ ರಿ ಸೆಟ್ ವ್ಯವಸ್ಥೆಯನ್ನು ಹೊಂದಿದೆ.
3. ಒಎಸ್ ಅಪ್ಗ್ರೇಡ್ ಬ್ಲಾಕ್ : ಪೆಗಾಸಸ್ ಇನ್ಸ್ಟಾಲ್ಡ್ ಸಾಧನಗಳಲ್ಲಿ ಒಎಸ್ ಅಪ್ಗ್ರೇಡ್ ( ಆಪರೇಟಿಂಗ್ ಸಿಸ್ಟಮ್ ಅಪ್ಗ್ರೇಡ್ ) ಅನ್ನು ತಡೆ ಹಿಡಿಯುತ್ತದೆ.
ಫ್ಯಾಕ್ಟರಿ ರಿ ಸೆಟ್ಟಿಂಗ್ ಅಥವಾ ಮಾಸ್ಟರ್ ರಿ ಸೆಟ್ ವ್ಯವಸ್ಥೆಯಲ್ಲಿ ಪೆಗಾಸಸ್ ಇನ್ಸ್ಟಾಲ್ ಆಗಿರುವ ಸಾಧನದ ಶಾಶ್ವತ ಡೇಟಾಗಳನ್ನು ಸಾಫ್ಟ್ವೇರ್ ಡೆವಲಪರ್ ಅಳಿಸಿ ಹಾಕಬಹುದು.
ಪೆಗಾಸಸ್ ಗೂಡಚರ್ಯೆ, ಕದ್ದಾಲಿಕೆ, ಹ್ಯಾಕಿಂಗ್ಗೆ ಬಳಕೆಯಾಗುತ್ತಿದ್ದರೂ, ಸರ್ಕಾರ, ತನಿಖಾ ಸಂಸ್ಥೆಗಳ ಅಗತ್ಯಕ್ಕೋಸ್ಕರ ಅಂತಿಮ ಬಳಕೆದಾರರ ಮಾಹಿತಿಗಳನ್ನು ಸಂಗ್ರಹಿಸಲಾಗುತ್ತದೆ ಎಂದು ಸಾಫ್ಟ್ವೇರ್ ಅಭಿವೃದ್ದಿಪಡಿಸಿದ ಇಸ್ರೇಲ್ ಮೂಲದ ಎನ್ಎಸ್ಒ ಗ್ರೂಪ್ ಮತ್ತು ಸಾಫ್ವೇರ್ ಖರೀದಿದಾರರ ನಡುವಿನ ರಹಸ್ಯ ಒಪ್ಪಂದದಲ್ಲಿ ಈ ಅಂಶವನ್ನು ತಿಳಿಸಲಾಗಿದೆ.
