ಮಾಸ್ಕೋ: ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಮಂಗಳವಾರ ರಾಷ್ಟ್ರವನ್ನುದ್ದೇಶಿಸಿ ತಮ್ಮ ಬಹು ನಿರೀಕ್ಷಿತ ಭಾಷಣ ಮಾಡಲಿದ್ದಾರೆ. ಈ ಭಾಷಣವು ಮುಂದಿನ ವರ್ಷದ ಆಡಳಿತದ ಬಗ್ಗೆ ಮುನ್ಸೂಚನೆ ನೀಡಲಿದೆ ಮತ್ತು ಮತ್ತು ಉಕ್ರೇನ್ ಯುದ್ಧ ಪರಿಸ್ಥಿತಿಯ ಬಗ್ಗೆ ಕ್ರೆಮ್ಲಿನ್ ದೃಷ್ಟಿಕೋನದ ಬಗ್ಗೆ ಬೆಳಕು ಚೆಲ್ಲಲಿದೆ ಎಂದು ನಿರೀಕ್ಷಿಸಲಾಗಿದೆ. ಪುಟಿನ್ ಸಾಂಪ್ರದಾಯಿಕವಾಗಿ ಜನಪ್ರತಿನಿಧಿಗಳು ಮತ್ತು ಸರ್ಕಾರಿ ಅಧಿಕಾರಿಗಳ ದೊಡ್ಡ ಗುಂಪನ್ನು ಉದ್ದೇಶಿಸಿ ಮಾತನಾಡಲಿದ್ದಾರೆ ಮತ್ತು ಭಾಷಣವನ್ನು ರಷ್ಯಾದ ಎಲ್ಲಾ ಸರ್ಕಾರಿ ಟಿವಿ ಚಾನೆಲ್‌ಗಳು ಪ್ರಸಾರ ಮಾಡಲಿವೆ.
ದೇಶದ ಅಧ್ಯಕ್ಷರು ಪ್ರತಿವರ್ಷ ದೇಶವನ್ನುದ್ದೇಶಿಸಿ ಭಾಷಣ ಮಾಡುವುದು ಸಂವಿಧಾನದ ಪ್ರಕಾರ ಕಡ್ಡಾಯವಾಗಿದೆ. ಆದರೆ, 2022ರಲ್ಲಿ ಪುಟಿನ್ ಇಂಥ ಭಾಷಣ ಮಾಡಲಿಲ್ಲ. 2022 ರಲ್ಲಿ ಪುಟಿನ್ ಉಕ್ರೇನ್ ಮೇಲೆ ದಾಳಿ ನಡೆಸಿದ್ದು, ಇದರಲ್ಲಿ ರಷ್ಯಾ ಪಡೆಗಳಿಗೆ ಹಿನ್ನಡೆಯಾಗಿದೆ ಎನ್ನಲಾಗಿದೆ. ಇದೇ ಕಾರಣದಿಂದ ಅವರು ರಾಷ್ಟ್ರವನ್ನುದ್ದೇಶಿಸಿ ಭಾಷಣ ಮಾಡಿಲ್ಲ ಎನ್ನಲಾಗಿದೆ. ಈಗ ಉಕ್ರೇನ್ ಮೇಲೆ ಯುದ್ಧ ಆರಂಭವಾಗಿ ಒಂದು ವರ್ಷವಾಗುವ ಕೆಲವೇ ದಿನಗಳಿಗೂ ಮುಂಚೆ ಪುಟಿನ್ ಭಾಷಣ ಮಾಡಲಿದ್ದಾರೆ.
ಉಕ್ರೇನ್ ಮೇಲಿನ ಯುದ್ಧದ ಬಗ್ಗೆ ಭಾಷಣದಲ್ಲಿ ಪ್ರಸ್ತಾಪ ಸಾಧ್ಯತೆ: ಉಕ್ರೇನ್ ಮೇಲಿನ ಯುದ್ಧದ ಬಗ್ಗೆ ವಿಶೇಷವಾಗಿ ರಷ್ಯಾ ಅಧ್ಯಕ್ಷರು ಮಾತನಾಡಬಹುದು ಎಂದು ಕ್ರೆಮ್ಲಿನ್ ವಕ್ತಾರ ಡಿಮಿಟ್ರಿ ಪೆಸ್ಕೋವ್ ಹೇಳಿದ್ದಾರೆ. ಇನ್ನು ಪಾಶ್ಚಿಮಾತ್ಯ ರಾಷ್ಟ್ರಗಳೊಂದಿಗೆ ರಷ್ಯಾದ ಶೀತಲ ಸಮರದ ಬಗ್ಗೆಯೂ ಅವರು ಮಾತನಾಡಬಹುದು ಎಂದು ವಿಶ್ಲೇಷಕರು ನಿರೀಕ್ಷಿಸಿದ್ದಾರೆ. ಭಾಷಣ ಆರಂಭವಾಗುವ ಮುನ್ನ ಸೋಮವಾರದಿಂದಲೇ ಹಲವಾರು ಟಿವಿ ಚಾನಲ್ಗಳು ತಮ್ಮ ಸ್ಕ್ರೀನ್ ಮೇಲ ಕೌಂಟ್ ಡೌನ್ ಶುರು ಮಾಡಿವೆ. ಅಧ್ಯಕ್ಷರ ಇಂದಿನ ಭಾಷಣವು ಐತಿಹಾಸಿಕವಾಗಿರಬಹುದು ಎಂದು ರಷ್ಯಾದ ಸರ್ಕಾರಿ ಸುದ್ದಿ ಸಂಸ್ಥೆ RIA ನೊವೊಸ್ಟಿ ಹೇಳಿದೆ.
ಭಾಷಣದ ವರದಿಗಾರಿಕೆಗೆ ಈ ವರ್ಷ ತನಗೆ ಸ್ನೇಹಿಯಲ್ಲದ ದೇಶಗಳ ಮಾಧ್ಯಮಗಳನ್ನು ರಷ್ಯಾ ನಿರ್ಬಂಧಿಸಿದೆ. ಅಮೆರಿಕ, ಯುನೈಟೆಡ್ ಕಿಂಗಡಂ ಮತ್ತು ಯುರೋಪಿಯನ್ ಯುನಿಯನ್ ರಾಷ್ಟ್ರಗಳು ನಿರ್ಬಂಧಿತ ರಾಷ್ಟ್ರಗಳ ಪಟ್ಟಿಯಲ್ಲಿವೆ. ಈ ರಾಷ್ಟ್ರಗಳ ಪತ್ರಕರ್ತರು ಭಾಷಣದ ನೇರ ಪ್ರಸಾರವನ್ನು ವೀಕ್ಷಿಸುವ ಮೂಲಕ ವರದಿಗಾರಿಕೆ ಮಾಡಬಹುದು ಎಂದು ಪೆಸ್ಕೋವ್ ಹೇಳಿದರು.
ಪಾಶ್ಚಿಮಾತ್ಯ ರಾಷ್ಟ್ರಗಳ ಬಗ್ಗೆ ಕಠೋರ ನಿಲುವು ಸಾಧ್ಯತೆ: ಪಾಶ್ಮಿಮಾತ್ಯ ರಾಷ್ಟ್ರಗಳೊಂದಿಗೆ ಸಂಬಂಧ ಕಡಿದುಕೊಳ್ಳುವ ನಿಟ್ಟಿನಲ್ಲಿ ಪುಟಿನ್ ಕಠೋರ ಮಾತುಗಳನ್ನಾಡಬಹುದು. ಅಮೆರಿಕ ಅಧ್ಯಕ್ಷ ಜೋ ಬೈಡನ್ ಸೋಮವಾರ ಕೀವ್ಗೆ ಭೇಟಿ ನೀಡಿದ ಹಿನ್ನೆಲೆಯಲ್ಲಿ ಪುಟಿನ್ ಭಾಷಣ ಇನ್ನೂ ತೀಕ್ಷ್ಣವಾಗಿರಬಹುದು ಎಂದು ರಾಜಕೀಯ ವಿಶ್ಲೇಷಕ ಟಟಯಾನಾ ಸ್ಟ್ಯಾನೋವಾಯಾ ಹೇಳಿದ್ದಾರೆ. ಪುಟಿನ್ ಅವರು ಕೆಲಸದ ಒತ್ತಡದಲ್ಲಿ ಇದ್ದುದರಿಂದ ಈ ಭಾಷಣ ವಿಳಂಬವಾಗಿದೆ ಎಂದು ಪೆಸ್ಕೋವ್ ಸುದ್ದಿಗಾರರಿಗೆ ತಿಳಿಸಿದರು. ಆದರೆ, ಉಕ್ರೇನ್ ಯುದ್ಧಭೂಮಿಯಲ್ಲಿ ರಷ್ಯಾ ಪಡೆಗಳಿಗೆ ಉಂಟಾದ ಸತತ ಹಿನ್ನಡೆಗಳ ಕಾರಣದಿಂದಲೇ ಪುಟಿನ್ ಭಾಷಣ ವಿಳಂಬವಾಗಿದೆ ಎಂದು ರಷ್ಯಾದ ಕೆಲ ಮಾಧ್ಯಮಗಳು ವರದಿ ಮಾಡಿವೆ.
ರಷ್ಯಾದ ಅಧ್ಯಕ್ಷರು ಈ ಮುನ್ನವೂ ರಾಷ್ಟ್ರವನ್ನು ಉದ್ದೇಶಿಸಿ ಮಾಡಬೇಕಿದ್ದ ಭಾಷಣವನ್ನು ಮುಂದೂಡಿದ್ದರು. 2017 ರಲ್ಲಿ ಮಾಡಬೇಕಿದ್ದ ಭಾಷಣವನ್ನು 2018 ರ ಆರಂಭದಲ್ಲಿ ಮಾಡಲಾಗಿತ್ತು. ಪುಟಿನ್ ಅವರ ಪತ್ರಿಕಾಗೋಷ್ಠಿ ಮತ್ತು ಫೋನ್-ಇನ್ ಮ್ಯಾರಥಾನ್ ಹೀಗೆ ಎರಡು ದೊಡ್ಡ ಕಾರ್ಯಕ್ರಮಗಳನ್ನು ಕಳೆದ ವರ್ಷ ರಷ್ಯಾ ಸರ್ಕಾರ ರದ್ದು ಮಾಡಿತ್ತು.
ಇದನ್ನೂ ಓದಿ: ಉಕ್ರೇನ್ ಯುದ್ಧಕ್ಕೂ ಮೊದಲು ನನ್ನ ಮೇಲೆ ಪುಟಿನ್ ಕ್ಷಿಪಣಿ ದಾಳಿ ಬೆದರಿಕೆ: ಇಂಗ್ಲೆಂಡ್ ಮಾಜಿ ಪ್ರಧಾನಿ
