ಕೀವ್: ಉಕ್ರೇನ್ ಜೊತೆ ಸುದೀರ್ಘ ಸಮರಕ್ಕಿಳಿದಿರುವ ರಷ್ಯಾ ಆ ದೇಶದ 9 ಸಾವಿರಕ್ಕೂ ಅಧಿಕ ಸೈನಿಕರನ್ನು ಆಪೋಷನ ಪಡೆದಿದೆ. ಇದಕ್ಕಿಂತಲೂ ಆಘಾತಕಾರಿ ಅಂಶವೆಂದರೆ ರಷ್ಯಾದ 70 ರಿಂದ 80 ಸಾವಿರ ಸೈನಿಕರು ಪ್ರಾಣ ತ್ಯಾಗ ಮಾಡಿದ್ದಾರೆ ಎಂಬ ವಿಷಯ ಹೊರಬಿದ್ದಿದೆ.
ಈ ಬಗ್ಗೆ ಉಕ್ರೇನ್ ಸೇನೆಯ ಜನರಲ್ ಮಾಹಿತಿ ನೀಡಿದ್ದು, ಕಳೆದ 6 ತಿಂಗಳಿನಿಂದ ನಡೆಯುತ್ತಿರುವ ಯುದ್ಧದಲ್ಲಿ ನಮ್ಮ ದೇಶದ 9 ಸಾವಿರಕ್ಕೂ ಅಧಿಕ ಸೈನಿಕರು ಪ್ರಾಣ ಅರ್ಪಿಸಿದ್ದಾರೆ. ರಷ್ಯಾದ ಸೇನೆಯ ಸೈನಿಕರ ಸಾವಿನ ಸಂಖ್ಯೆ ನಮಗಿಂತಲೂ ದುಪ್ಪಟ್ಟಾಗಿದೆ. ಆ ದೇಶದ 70 ರಿಂದ 8 ಸಾವಿರಕ್ಕೂ ಅಧಿಕ ಸೈನಿಕರು ಯುದ್ಧದಲ್ಲಿ ಸಾವಿಗೀಡಾಗಿರಬಹುದು ಎಂದು ಹೇಳಿಕೆ ನೀಡಿದ್ದಾರೆ.
ರಷ್ಯಾದ ಬಾಂಬ್ ದಾಳಿಗೆ ಈವರೆಗೂ 5,587 ಉಕ್ರೇನಿಯನ್ ನಾಗರಿಕರು ಮೃತಪಟ್ಟಿದ್ದಾರೆ. 7,890 ಮಂದಿ ಗಾಯಗೊಂಡಿದ್ದಾರೆ. ಜೊತೆಗೆ ಕನಿಷ್ಠ 972 ಮಕ್ಕಳು ವಿವಿಧ ಕಾರಣಕ್ಕಾಗಿ ಅಸುನೀಗಿದ್ದಾರೆ. ಈ ಸಂಖ್ಯೆ ಅಂದಾಜಿಸಿದ್ದಕ್ಕಿಂತಲೂ ಹೆಚ್ಚಿರಬಹುದು ಎಂದು ವಿಶ್ವಸಂಸ್ಥೆ ಹೇಳುತ್ತಿದೆ.
ಹೆಚ್ಚು ನಷ್ಟ ಅನುಭವಿಸಿದ್ದು ಯಾರು?: ಉಕ್ರೇನ್ ಮೇಲೆ ದಾಳಿ ಮಾಡಿದ ರಷ್ಯಾ ಮಾರ್ಚ್ನಲ್ಲಿ ತಮ್ಮ 1351 ಸೈನಿಕರು ಸಾವಿಗೀಡಾಗಿದ್ದಾರೆ ಎಂದು ತಿಳಿಸಿತ್ತು. ಇದು ನಂಬಲರ್ಹವಾಗಿಲ್ಲ ಎಂದು ಉಕ್ರೇನ್ ಹೇಳಿದೆ. 6 ತಿಂಗಳ ಯುದ್ಧದಲ್ಲಿ ಆ ದೇಶದ 70 ರಿಂದ 80 ಸಾವಿರ ಸೈನಿಕರು ಪ್ರಾಣ ತೆತ್ತಿದ್ದಾರೆ. ಸಾವಿರಾರು ಯೋಧರು ಗಾಯಗೊಂಡಿದ್ದಾರೆ ಎಂದು ಅಂದಾಜಿಸಿದೆ.
ದಾಳಿ ನಿರಂತರ: ನಿರಂತರವಾಗಿ ದಾಳಿ ನಡೆಸುತ್ತಿರುವ ರಷ್ಯಾ ಸೋಮವಾರದಂದು ಉಕ್ರೇನ್ನ ನಿಕೋಪೋಲ್ ಪ್ರದೇಶದ ಮೇಲೆ ನಡೆಸಿದ ಶೆಲ್ ದಾಳಿಗೆ ನಾಲ್ವರು ಗಾಯಗೊಂಡಿದ್ದಾರೆ. ಈ ಪ್ರದೇಶ ನಿರಂತರ ದಾಳಿಗೆ ಒಳಗಾಗಿದ್ದು, ಸುಮಾರು 850 ಕಟ್ಟಡಗಳು ಧ್ವಂಸವಾಗಿವೆ. ಇಲ್ಲಿನ 1 ಲಕ್ಷ ಜನರಲ್ಲಿ ಅರ್ಧಕ್ಕೂ ಅಧಿಕ ಜನರು ಪಲಾಯನ ಮಾಡಿದ್ದಾರೆ ಎಂದು ಹೇಳಲಾಗಿದೆ.
ರಷ್ಯಾ ಈವರೆಗೂ ಉಕ್ರೇನ್ ಮೇಲೆ 3,500 ಕ್ಕೂ ಅಧಿಕ ಕ್ಷಿಪಣಿಗಳನ್ನು ಬಳಸಿ ಪ್ರಾಣ, ಆಸ್ತಿ ಹಾನಿ ಉಂಟು ಮಾಡಿದೆ. ರಷ್ಯಾದ ಫಿರಂಗಿಗಳ ದಾಳಿಯನ್ಉ ನಿಖರವಾಗಿ ಎಣಿಕೆ ಮಾಡಲು ಅಸಾಧ್ಯವಾಗಿದೆ. ಪ್ರಬಲ ಮತ್ತು ಸಾಧಾರಣ ಅಸ್ತ್ರಗಳನ್ನು ಆ ದೇಶ ಬಳಸುತ್ತಿದೆ ಎಂದು ಉಕ್ರೇನ್ ಅಧ್ಯಕ್ಷ ಜೆಲೆನ್ಸ್ಕಿ ಹೇಳಿದ್ದಾರೆ.
ನಾಳೆ ಉಕ್ರೇನ್ನಲ್ಲಿ ಸ್ವಾತಂತ್ರ್ಯೋತ್ಸವ: ಯುದ್ಧದ ಭೀಕರತೆ ನಡುವೆಯೇ ಉಕ್ರೇನ್ ಆಗಸ್ಟ್ 24 ರಂದು ಸ್ವಾತಂತ್ರ್ಯ ಸಂಭ್ರಮ ಆಚರಿಸಲಿದೆ. 1991 ರಲ್ಲಿ ಸೋವಿಯತ್ ಒಕ್ಕೂಟದಿಂದ ಬೇರ್ಪಟ್ಟು ಉಕ್ರೇನ್ ಸ್ವತಂತ್ರ ರಾಷ್ಟ್ರವಾಗಿ ಗುರುತಿಸಿಕೊಂಡಿತು.
ಗಡಿ ಸಮಸ್ಯೆ ಮತ್ತು ನ್ಯಾಟೋಗೆ ಸೇರಲು ಇಚ್ಚಿಸಿದ ಉಕ್ರೇನ್ ವಿರುದ್ಧ ರಷ್ಯಾ ಫೆಬ್ರವರಿ 24 ರಂದು ಯುದ್ಧ ಸಾರಿ ಅಂದಿನಿಂದ ನಿರಂತರವಾಗಿ ದಾಳಿ ನಡೆಸುತ್ತಿದೆ. ಉಕ್ರೇನ್ ಅಮೆರಿಕಾ, ಇಂಗ್ಲೆಂಡ್, ಜರ್ಮನಿ, ಫ್ರಾನ್ಸ್ ಸೇರಿದಂತೆ ವಿವಿಧ ಪಾಶ್ಚಿಮಾತ್ಯ ರಾಷ್ಟ್ರಗಳ ನೆರವಿನಿಂದ ರಷ್ಯಾ ದಾಳಿಯನ್ನು ಎದುರಿಸುತ್ತಲೇ ಬಂದಿದೆ.
ಇದನ್ನೂ ಓದಿ: ಸಂಕಷ್ಟದಲ್ಲಿರುವ ಶ್ರೀಲಂಕಾಗೆ 21 ಸಾವಿರ ಟನ್ ರಾಸಾಯನಿಕ ರಸಗೊಬ್ಬರ ನೀಡಿದ ಭಾರತ
